އޮމިކްރޯން ވޭރިއަންޓާ ގުޅިގެން ކޮވިޑް-19 ފެތުރުން އިތުރުވެފައިވާތީ، އިނގިރޭސި ޕްރިމިއާ ލީގުން އަޅާފައިވާ ފިޔަވަޅުތައް ވަރުގަދަކޮށްފިއެވެ.

އޮމިކްރޯން ވޭރިއަންޓާ ގުޅިގެން އިނގިރޭސިވިލާތުގައި ކޮވިޑް ފެތުރޭ މިންވަރު އިތުރުވެފައިވާއިރު، އޭގެ އަސަރު ޕްރިމިއާ ލީގަށްވެސް ވަނީ ކޮށްފައެވެ. އެގޮތުން ފާއިތުވެދިޔަ ހަފުތާގެ ތެރޭގައި ޕްރިމިއާ ލީގުގެ ކުލަބުތަކުން 42 މީހުން ވަނީ ކޮވިޑަށް ޕޮޒިޓިވްވެފައެވެ. އޭގެ ތެރޭގައި ކުޅުންތެރިންވެސް ހިމެނެއެވެ. މިއީ ޕްރިމިއާ ލީގުން ކޮވިޑަށް ޓެސްޓުކުރަން ފެށިފަހުން ހަފުތާއެއްގެ ތެރޭގައި އެންމެ ގިނަ މީހުން ޕޮޒިޓިވްވި ފަހަރެވެ.

އަދި މި ހަފުތާގައި މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާގެ ޓީމުގެ ތެރޭގައި ކޮވިޑުގެ ކޭސްތަކެއް ފެނުމާއި ގުޅިގެން އެ ދެ ޓީމުން ކުޅެން އޮތް މެޗުތައް ފަސްކުރިއިރު، ބްރައިޓަން، އެސްޓަން ވިލާ، ލެސްޓާ ސިޓީ އަދި ނޮރިޗު ސިޓީންވެސް ވަނީ ޕޮޒިޓިވް ކޭސްތަކެއް ފެނިފައެވެ.

އެއާއެކު ޕްރިމިއާ ލީގުން ފިޔަވަޅުތައް ވަރުގަދަކުރިއިރު، ކުލަބުތަކުގެ ތަމްރީނުތަކަށްވެސް ކުޅުންތެރިންނާއި އޮފިޝަލުންނަށް ދެން ދެވޭނީ ކޮވިޑަށް ޓެސްޓު ކުރުމަށްފަހުގައެވެ. މީގެ އިތުރުން މާސްކު އެޅުމާއި، ގައިދުރުކުރުމުގެ ފިޔަވަޅުތައްވެސް ވަނީ ވަރުގަދަކޮށްފައެވެ.

އިންގްލެންޑުން ކޮވިޑުން ރައްކާތެރިވުމަށް އަޅާފައިވާ ފިޔަވަޅުތައް މީގެ ކުރިން މިދިޔަ ޖުލައި މަހު ނެގުމާއެކު ޕްރިމިއާ ލީގުގެ ކުލަބުތަކުން ވަނީ ދަނޑަށް ސަޕޯޓަރުން ވައްދަން ފަށައިފައެވެ. އެހެންނަމަވެސް އިނގިރޭސި ސަރުކާރުގެ އެދުމާއެކު ބުދަ ދުވަހުން ފެށިގެން ޕްރިމިއާ ލީގުގެ މެޗުތަކަށް ވަދެވޭނީ ނެގަޓިވް ޕީސީއާރް ޓެސްޓު ނުވަތަ ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް އެކަންޏެވެ.