އަނިޔާ ލިބެމުން ދިޔަ އެކަނިވެރި މަންމައެއްގެ ދިރިއުޅުމަށް ހިނިތުންވުން!

ގެވެށި އަނިޔާގެ ވާހަކައަކީ ރާއްޖޭގައި އަބަދުވެސް ވަރަށް ގަދަޔަށް ދެކެވޭ އެއް ވާހަކައެވެ. މިއަދާ ހަމައަށް ވެސް ހައްލު ނުވެފައިވާ ބޮޑު މައްސަލައަކަށްވާއިރު، މިފަދަ ގިނަ އާއިލާތަކުގައި މައިންބަފައިންގެ ފަރާތުން ދަރިންނަށް ލިބެން ޖެހޭ ލޯތްބާއި އަޅާލުމުން ދަރިން ދަނީ މަހުރޫމްވަމުންނެވެ. ކައިވެނި ރޫޅި ނުވަތަ އެކުގައި އުޅޭއިރު ވެސް, މި އަނިޔާ ތަހައްމަލު ކުރާ ގިނަ މައިންނާއި ދަރިން އުޅޭކަމީ މިއަދުގެ އެއް ހާގީގަތެވެ. ދިރިއުޅޭނެ އެހެން ތަނެއް ނުވަތަ ގޮތެއް ނެތުމަކީ އަނިޔާއަށް ކެތްކުރަން މަޖުބޫރުކުރުވާ އެއްސަބަބު ވެސް މެއެވެ. ނަމަވެސް މިފަދަ މައްސަލަތައް ހައްލު ކުރުމަށް ސަރުކާރާއި، އެކިއެކި އެންޖީއޯތައް ދަނީ އެކި ލެވަލްގައި މަސައްކަތް ކުރަމުންނެވެ. މީގެ ތެރޭގައި އާއްމުން ހޭލުންތެރިކުރުވުމުގެ ޕްރޮގްރާމްތައް އަތޮޅުތެރޭގެ އެކި ރަށްރަށުގައި ހިންގަމުންދެއެވެ.

ކޮންމެ ދުވަހަކު އެތައް މައްސަލައެއް އެކި އެންޖީއޯތަކުގައި ރިޕޯޓު ކުރެވެމުންދާއިރު، އެކަނިވެރި މައެއްގެ ދިރިއުޅުމަށް "މަމްސް އެންޖީއޯ"ގެ ސަމާލުކަން ލިބިގެންދިޔައެވެ.

މަމްސް އެންޖީއޯއިން މައުލޫމާތު ދޭ ގޮތުގައި، ނާޒިމާ އަކީ 12 އަހަރުން ދަށުގެ ފަސް ކުދިންނާއި އުމުރުން ދުވަސްވީ މަންމައާއެކު، މާބަނޑު ހާލުގައި ދިރިއުޅެމުން ދިޔަ މީހެކެވެ. ވޭތުވެ ދިޔަ 12 އަހަރު ދުވަހުގެ ތެރޭގައި މެދުކެނޑުމެއް ނެތި ނާޒިމާއަށް އޭނާގެ ފިރިމީހާގެ ފަރާތުން އެކިވަރުގެ އަނިޔާތައް ލިބެމުން ދިޔައެވެ. މި އަނިޔާތަކުގެ ސަބަބުން ނާޒިމާ ވަނީ ނަފްސާނީ ގޮތުންނާއި ޖިސްމާނީ ގޮތުން ވަރަށް ބޮޑަށް ބަލިކަށި ވެފައެވެ. ނާޒިމާ އިނީ ވަޒީފާއަކަށް ގޮސް އާމްދަނީއެއް ހޯދޭނެ ފަދަ ހާލަތެއްގައި ނޫނެވެ. އަދި އެކަނިވެރި މައިންނަށް ލިބެންޖެހޭ އެލަވަންސްއަށް އެކި ފަހަރުމަތިން ހުށަހަޅައިގެން ވެސް ނާޒިމާއަށް އެ ފައިސާ ލިބޭ ގޮތް ނުވިއެވެ. އަދި ކުދިންގެ ބައްޕަގެ ފަރާތުން ދަރިންނަށް ލިބެންޖެހޭ ޚަރަދުވެސް ނުލިބޭއިރު، ފަސް ކުދިންނާއި ނާޒިމާ، އަދި އޭނާގެ މަންމަ ޒަރޫރީ ބޭނުންތައް ފުއްދަމުން ދިޔައީ އުމުރުން ދުވަސްވީމަންމައަށް ލިބޭ އެލަވަންސުންނެވެ.

ނާޒިމާގެ ހާލަތު މަމްސް އެންޖީއޯއިން އިތުރަށް އޮޅުންފިލުވަން ކުރި މަސައްކަތުން، މިއީ ވަރަށް ބޮޑަށް މުޖުތަމައުން ބާކީކޮށްލެވިފައިވާ އާއިލާއެއްކަން އެނގުނު ކަމަށް އެ އެންޖީއޯއިން މައުލޫމާތު ދެއެވެ.

ނާޒިމާ ދިރިއުޅޭ ގޭގެ ހާލަތަށް ބަލާއިރު، އެއީ ބާވެ ވަރަށް ބޮޑަށް ވީރާނާވެފައިވާ ގެއެކެވެ. އެގޭގައި މުސްކުޅި މަންމައާއި ތުއްތު ކުދިން ގޮވައިގެން ނާޒިމާ ދިރިއުޅެމުން ދިޔައީ ދެ ކޮޓަރީގެ ކުޑަ ތަންކޮޅެއްގައެވެ. ގޭގެފުރާޅުގެ ޓިނުތައް ފޫގޮސްފައި ހުރުމުން، ވާރޭ ވެހޭ ދުވަސްވަރެއްގައި، އެ ތަންތަނުން ގޭތެރެއަށް ފެން ފައިބައެވެ. ގޭތެރެ ފެނުނީ އާއްމު ދިވެހިން ދިރިއުޅެމުންދާ ހާލަތަށްވުރެ މާ ނިކަމެތިކޮށް ކަމަށް މަންމްސް އެންޖީއޯއިން ބުނެއެވެ.

ގޭގައި އެންމެ ފާޚާނާއެއް ހުންނައިރު، އެތަން ހުންނަނީ ކޮޓަރިން ބޭރުގައި ވަކިންނެވެ. އެތަނަކީވެސް ކުޑަކުދިންތަކެއް ބޭނުންކުރަން ރައްކާތެރި ތަނެއް ނޫނެވެ. ފެންވެރުމަށް ފެން ނަގަން ހުންނަނީ ތިން ފޫޓުގެ ތިރި ވަޅެކެވެ. އެ ފާޚާނާގައި އެންމެން ވެސް ފާހަނާ ކުރުމަށް ބޭނުންކުރަމުން ދިޔައީ ތިރި ތައްޓެކެވެ. ނާޒިމާގެ ބަލިހާލަތު ހުރި ގޮތުން އޭނާއާއި އޭނާގެ ތުއްތު ދަރިންގެ ޒިންމާ ނަގަމުންއައީ ނާޒިމާގެ ދުވަސްވީ މަންމަ އެވެ.

ކުދިންގެ ހާލަތާބެހޭގޮތުން މަމްސް އެންޖީއޯއިން ބުނީ، ކައިވެންޏަށް ވީ 12 އަހަރު ތެރޭގައި ނާޒިމާއާއި އޭނާގެ ދަރިންނަށް ކުދިންގެ ބައްޕަގެ ފަރާތުން ޖިސްމާނީ އަދި ނަފްސާނީ ގޮތުން އެތައް އަނިޔާތަކެއް ލިބިފައިވާ ކަމަށެވެ. ނާޒިމާ ބުނާގޮތުން މަސްތުގެ ވަބާގައި ޖެހި އޭނާގެ ކުރީގެ ފިރިމީހާ ހަމަހޭގައި ހުންނަނީ މަދު ފަހަރަކުއެވެ. ފިރިމީހާ ހަމައިގައި ނުހުންނަ ކޮންމެ ފަހަރަކު ނާޒިމާއަށް އެތައް އަނިޔާއަކާ ކުރިމަތިލާން ޖެހެއެވެ.

އަނިޔާތަކުން ސަލާމަތްވުމަށް ނާޒިމާ އޭނާގެ ފިރިމީހާގެ ކިބައިން ވަރިވިއެވެ. ނަމަވެސް ނާޒިމާއަށް ކުރިމަތިވެފައިވާ ގޮންޖެހުންތައް ވަރަށް ގިނައެވެ.

ނާޒިމާގެ އުނދަގޫ ދިރިއުޅުމުގެ ހާލަތު އެނގުމާއެކު، މަމްސް އެންޖީއޯއިން އޭނާއަށް އެހީވުމުގެ މަސައްކަތް ފެށިއެވެ. އެގޮތުން އެންމެ ފުރަތަމަ ކުދިންނާއި ނާޒިމާގެ އާއިލާއަށް ބޭނުންވާނެ، ފައިދާހުރި ކާނާއާއި ހައިޖީން ޕްރޮޑަކްޓްސް ފަދަ ތަކެތި ފޯރުކޮށްދިނެއެވެ.

މީގެ އިތުރުން އެކަނިވެރި މައެއްގެ މިހިތްދަތި ދިރިއުޅުމުގެ ވާހަކަ މަމްސްގެ ސޯޝަލް މީޑިޔާގައި ހިއްސާކޮށް، އެ އާއިލާގެ ދިރިއުޅުމުގެ ފެންވަރު ރަނގަޅުކޮށް، ގެ މަރާމާތުކޮށްދީ ކުދިންނަށް ދިރިއުޅެން ރައްކާތެރި މާހައުލެއް ކަށަވަރު ކުރުމަށް މަމްސްއިން އިސްނަގައިގެން ފަންޑްރައިޒިން ކެމްޕޭނެއް ފެށިއެވެ. އަދި "ހެލްޕް ނާޒިމާ ފެމިލީ" ކެމްޕެއިންނަށް އެހީ ޖަމިއްޔާއިން ގުޅުނު ހިސާބުން ބޮޑު އެހީތެރިކަމެއް ލިބުނެއެވެ.

މިއާއެކު، ކޮންޓްރެކްޓަރ އަކާއެކު އެއްބަސްވެވި، ނާޒިމާގެ ގެ މަރާމާތު ކުރުމުގެ އަމަލީ މަސައްކަތް 24 މޭގައި ފެށިގެން ދިޔައެވެ. ކުދިންނަށް ގެއަކީ ރައްކާތެރި ތަނަކަށް ހެދުމަށް މުޅި ގޭގެ ވަށާފާރު ރޭނުމުގެ މަސައްކަތް ފެށިއެވެ. އިތުރު ފާޚާނާއަކާއި ކޮޓަރިއެއް ހެދި، ޖުމްލަ 3 ކޮޓަރިއާއި 2 ފާޚާނާ އެގޭގައި ހެދިގެން ދިޔަ އެވެ. މުޅިގޭގެ ފުރާޅު ބަދަލުކޮށް، ސީލިންގް ކުރެވި، ގޭގެ ކަރަންޓް ވަޔަރިންގ އެކީ ބަދަލުކުރެވުނެވެ. ޒަމާނީ ފެންވަރަށް ބަދިގެ ހަދައި، ގޭގައި ތަށިމުށި ޖަހައި ރީތިކުރެވުނެވެ. ގޭގައި ބޭނުން ކުރަމުން ދިޔަ ހުރިހާ ފަރުނީޗަރާއި، އިލެކްޓްރޯނިކްސް އައުކޮށް، ގެއަށް ބޭނުންވާ ޒަރޫރީ ތަކެތި ހޯދައި ދެވުނެވެ. އަދި ގޭގައި ދުވަސްވެފައިވާ ޖަންކްޝަން ވަޅުގަނޑު ބަންދުކޮށް، އައު ވަޅުގަނޑެއް ރޭނި، ފާޚާނާތައް ޒަމާނީ ފެންވަރަށް ހަދައި، ފެންވައިރުކުރެވުނެވެ.

މީގެ އިތުރުން ކުދިންގެ ޓިއުޝަނާއި ގުރުއާން ކްލާހަށް ފޮނުވުމަށް ފީ ހަމަޖައްސައިދީ, އެ ކުދިންގެ ސްކޫލަށް ބޭނުންވާ ސާމާނު ވަނީ ހަމަކޮށްދީފައެވެ. އަދި ކުދިންނާއި ނާޒިމާއަށް ބޭނުންވާ ނަފްސާނީ ފަރުވާ ފެށިފައިފައިވާއިރު، ކުރިއަށް އޮތް ހަ މަސް ދުވަހަށް އެ އާއިލާއަށް ބޭނުންވާ ކާބޯތަކެއްޗާއި، ހައިޖީން ޕްރޮޑަކްޓްސްގެ އިތުރުން، ޒަރޫރީ ތަކެތި ހޯދައިދިނުމަށް އެ އެންޖީއޯއިން ވަނީ ނިންމާފައެވެ.

މަމްސް އެންޖީއޯއިން އިސްނައިގެން ފެށި މަސައްކަތުގައި އެތައް ބައެއްގެ އެހީތެރިކަމާއެކު، މިއަދު ނާޒިމާއާއި އޭނާގެ މި ކުޑަ އާއިލާއަށް މިވަނީ ރައްކާތެރި އަދި ސާފު މާހައުލެއް ގާއިމްކޮށްދެވިފައެވެ. ނާޒިމާއާއި އޭނާގެ މަންމަ އަދި ކުދިންގެ މޫނު މަތިން މިއަދު ފެނިގެންދަނީ ހިނިތުންވުމެވެ. ނާޒިމާ ފަދައިން ދަތިހާލުގައި ދިރިއުޅެމުންދާ އެތައް އާއިލާއެއް އެބަތިއްބެވެ. އެފަދަ އާއިލާތަކަށް ބޭނުންވަނީ ދީލަތި އެހީތެރިކަމެކެވެ. އިސްނަގައިގެން މަސައްކަތް ފަށައިދޭނެ ބައެކެވެ!