ރީތި މިސްކިތެއް ބިނާކުރެވޭއިރު އެ މިސްކިތް ޒީނަތްތެރިކުރުވަން ޖެހޭނީ އަޅުކަމުން: ނާއިބުރައީސް
އެންމެންގެ އަމަލުތައް ވެސް އިސްލާމީ ސިފަތަކުން ޒީނަތްތެރި ކުރަން ޖެހޭ
ނާއިބުރައީސް ފައިސަލް ނަސީމް
ރީތި މިސްކިތެއް ބިނާކުރެވޭއިރު އެ މިސްކިތް ޒީނަތްތެރިކުރުވަން ޖެހޭނީ އަޅުކަމުން ކަމަށް ނާއިބުރައީސް ފައިސަލް ނަސީމް ވިދާޅުވެއްޖެއެވެ.
މި މަސައްކަތަކީ ދިގު އިންތިޒާރެއްގެ ނިމުން ކަމަށާއި 18 އަހަރު ފަހުން މި މިސްކިތުގެ އަމަލީ މަސައްކަތް ފެށިގެންދާ ކަމަށް ނާއިބުރައީސް ވިދާޅުވިއެވެ. ވަރަށް ރީތި މިސްކިތެއް ބިނާކުރެވޭއިރު އެ މިސްކިތް ޒީނަތްތެރިކުރުވަން ޖެހޭނީ އަޅުކަމުން ކަމަށް ވެސް ވިދާޅުވިއެވެ.
އިސްލާމް ދީނަކީ އަޚްލާޤު ކަމަށާއި ކުދިންނަށް މިސާލު ދައްކަން ޖެހޭ ކަމަށް ނައިބްރައީސް ވިދާޅުވިއެވެ. ތަރައްޤީގެ ކަންކަން ބާރު ސްޕީޑުގައި ކުރިއަށްދާއިރު މީހުން ކުރާ ކަންތައްތަކުގެ ގޯސް ވާހަކަތައް ދެއްކުމުގެ ބަދަލުގައި އެހީތެރިވާން ޖެހޭ ކަމަށް އެމަނިކުފާނު ވިދާޅުވިއެވެ.
މިސްކިތްތަކުގައި ޤުރުއާން ކިޔަވައިދިނުމުގެ ޕްރޮގްރާމު މި ސަރުކާރުން ވަރަށް ކާމިޔާބު ކަމާއެކު ކުރިއަށް ގެންދިޔަކަން ފާހަގަކުރައްވާ ނައިބުރައީސް ވިދާޅުވީ ރާއްޖޭއިން ބޭރުގައި ތިބި މީހުންނަށް ވެސް މި ޕްރޮގްރާމް ހިންގި ކަމަށެވެ. ނަމަވެސް ކޮވިޑާއި ގުޅިގެން ޕްރޮގްރާމް ހުއްޓާލަން ޖެހުނު ކަމަށެވެ.
ފުވައްމުލަކުގައި އުމްރާނީ ތަރައްޤީގެ ގިނަ މަޝްރޫއުތައް ފެންނަކަން ފާހަގަކުރައްވާ ނައިބްރައީސް ފައިސަލް ވިދާޅުވީ ޒުވާނުންނަށް ކުރިމަތިވެފައިވާ ވަބާ އަކީ މަސްތުވާތަކެތި ކަމަށެވެ.
އަދި އެކަށީގެންވާ ނިޒާމެއްގެ ތެރެއިން އެފަދަ މީހުންނަށް ފަރުވާ ދިނުމުގެ ނިޒާމެއް ޤާއިމުކުރެވިފައިނުވާއިރު އެންމެން ގުޅިގެން މިކަމަށް ހައްލު ހޯދަން މަސައްކަތް ކުރަން ޖެހޭ ކަމަށް ނައިބުރައީސް ވިދާޅުވިއެވެ.
އެންމެންގެ އަމަލުތައް ވެސް އިސްލާމީ ސިފަތަކުން ޒީނަތްތެރި ކުރަން ޖެހޭ ކަމަށް އެމަނިކުފާނު ވިދާޅުވިއެވެ.
