ބަޔާނުން ލީޑު ފުޅާކުރިއިރު، ޑޯޓްމުންޑް އެއްވަރު

ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން ފަހަތުން އަރައި މައިންޒް ބަލިކޮށް އެންމެ ފަހުގެ ޗެމްޕިއަން ބަޔާން މިއުނިކުން ތާވަލުގެ އެއްވަނައިގައި ލީޑު ފުޅާކުރިއިރު، ދެވަނައިގައި އޮތް ބޮރޫޝިއާ ޑޯޓްމުންޑާއި ބޯކުމް ބައްދަލުކުރި މެޗު އެއްވަރުވެއްޖެއެވެ.

އަމިއްލަ ދަނޑުގައި ކުޅުނު މެޗުން ބަޔާން މޮޅުވީ މައިންޒް އަތުން ފަހަތުން އަރައި 2-1 ގެ ނަތީޖާއަކުންނެވެ.

ހޮނިހިރު ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ މައިންޒުންނެވެ. މެޗު ފަށައިގެން 22 ވަނަ މިނެޓުގައި ޖޮނަތަން ބާކާޑްޓް ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ކަރީމް އޮނިސީވޯއެވެ. އެކަމަކު ދެވަނަ ހާފު ފަށައިގެން އަށްވަނަ މިނެޓުގައި ބަޔާނުން ވަނީ ނަތީޖާ އެއްވަރުކޮށްފައެވެ. ކޮރެންޓިން ޓޮލީސޯ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ކިންގްސްލީ ކޯމަންއެވެ.

މި މެޗުގައި ބަޔާނުން ފަހަތުން އަރައި ލީޑު ނަގާފައިވަނީ މެޗުގެ 74 ވަނަ މިނެޓުގައެވެ. ބެންޖަމިން ޕަވާޑް ދިން ބޯޅައިން މި ލަނޑު އެ ޓީމަށް ކާމިޔާބުކޮށްދިނީ ޒުވާން މިޑްފީލްޑަރު ޖަމާލް މުސިއާލާއެވެ.

މި މޮޅާއެކު ބަޔާނުގެ ކޯޗު އުމުރުން 34 އަހަރުގެ ހޫލިއަން ނާގަލްސްމަން ވަނީ ޖަރުމަން ލީގުގައި 100 މޮޅު ހަމަކޮށްފައެވެ. މި ސީޒަނަށް ބަޔާނާ ހަވާލުވުމުގެ ކުރިން ނާގަލްސްމަން ކޯޗުކޮށްދީފައިވަނީ ޖަރުމަނުގެ ދެ ކުލަބު ކަމަށްވާ ހޮފެންހެއިމާއި އާރްބީ ލައިޕްޒީގަށެވެ.

މި މެޗުން ބަޔާން މޮޅުވިއިރު، ތާވަލުގެ އެއްވަނައިގައި ލީޑު ފުޅާކުރުމުގެ ފުރުސަތު އެ ޓީމަށް ލިބުނީ ބޯކުމް އާއި ޑޯޓްމުންޑް ބައްދަލުކުރި މެޗު 1-1 ގެ ނަތީޖާއަކުން އެއްވަރުވުމާ ގުޅިގެންނެވެ.

އަމިއްލަ ދަނޑުގައި ކުޅުނު މެޗުގައި އެންމެ ފުރަތަމަ ލަނޑު ޖަހައި ލީޑު ނެގީވެސް ބޯކުމްއިންނެވެ. ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ސަބެސްޓިއަން ޕޯލްޓާއެވެ. އޭގެ ފަހުން ދެވަނަ ހާފުގެ ކުރީކޮޅު ޑޯޓްމުންޑުގެ މަރިއަސް ވުލްފް ޖެހި ލަނޑެއް ވީޑިއޯ އެސިސްޓަންޓް ރެފުރީ (ވީއޭއާރް) އިން އޮފްސައިޑު ކަމަށް ނިންމި ނަމަވެސް، މެޗު ނިމެން ފަސް މިނެޓަށް ވެފައި ވަނިކޮށް އާލިން ބްރައުޓް ހާލަންޑް ނަގައިދިން ހުރަހަކުން ހޫލިއަން ބްރަންޓް ވަނީ ޑޯޓްމުންޑަށް ނަތީޖާ އެއްވަރުކޮށްދީފައެވެ.

މި ނަތީޖާތަކާއެކު ބަޔާނުން ވަނީ ތާވަލުގެ އެއްވަނައިގައި ހަ ޕޮއިންޓުގެ ލީޑެއް ނަގާފައެވެ. އެގޮތުން އެ ޓީމަށް ކުޅުނު 15 މެޗުން 37 ޕޮއިންޓް ލިބިފައިވާއިރު، ތާވަލުގެ ދެވަނައިގައި އޮތް ޑޯޓްމަންޑަށް 15 މެޗުން ލިބިފައިވަނީ 31 ޕޮއިންޓެވެ.