ހއ. އަތޮޅު ކައުންސިލްގެ އެންމެ ބޮޑު އަމާޒަކީ 2026 ވަނަ އަހަރު ނިމުމުގެ ކުރީން ހއ. އަތޮޅުގައި ޓްރާންޝިޕްމަންޓް ބަނދަރެއް ޤާއިމްކުރެވިގެން ދިއުން ކަމަށް ހއ. އަތޮޅު ކައުންސިލުން ހާމަކޮށްފިއެވެ.

ހއ. އަތޮޅު ކައުންސިލުން މި ޕްލޭން ހާމަކޮށްފައިވަނީ، ކުރިއަށް އޮތް 5 އަހަރަށް ތައްޔާރުކޮށްފައިވާ ހއ. އަތޮޅުގެ ތަރައްޤީގެ ޕްލޭނުގައި "ޓްރާންޝިޕްމަންޓް ބަނދަރު ހެދުމުގެ ތަޞައްވަރު" ޕްލޭން ހއ. އަތޮޅު ކައުންސިލުން ފާސްކުރުމަށްފަހުއެވެ. ކައުންސިލުން ބުނީ ހއ އަތޮޅުގެ އިޤްތިޞާދް ކުރިއަށްދާނީ ދެމެހެއްޓެނިވި ގޮތެއްގައި ޓުރާންޝިޕްމަންޓް ބަނދަރެއް ޤާއިމްކުރެވިގެން ކަމަށެވެ.

ކައުންސިލުން ހާމޮކޮށްފައިވާ ގޮތުގައި ޤުދުރަތީގޮތުން އިހަވަންދިއްޕޮޅު އުފެދިފައިވަނީ އެއްފަޅެއްގައި ގިނަ ރަށްތަކެއް ހިމެނޭގޮތަށްކަމަށެވެ. އެގޮތުން އެ އަތޮޅު ހުވަހަންދޫއިން ފެށިގެން އިންނަފިނޮޅާ ހަމައަށް އޮތް ބޮޑުފަޅަކީ، މިފަދަ ޕްރޮޖެކްޓެއް ހިންގުމަށް އެންމެ އެކަށީގެންވާ ތަނެއްކަމަށް ކަމާބެހޭ މާހިރުން ވިދާޅުވެފައިވާކަމަށެވެ. ރާއްޖެ އޮތް ސަރަޙައްދުގެ ގޮތުން ވިޔަފާރީގެ ދާއިރާއިން ނެގެން އޮތް ފައިދާއެއް ނެގުން މުހިއްމު ކަމަށާއި، ވިޔަފާރިއާއި އިޤްތިޞާދް ދަންނަ ބޭފުޅުންވެސް މިކަމަށް ބާރުއަޅުއްވާއި އެކި މުނާސަބަތުތަކުގައި ވާހަކަ ދައްކަވާފައިވާ ކަމަށްވެސް ހއ. އަތޮލު ކައުންސިލުން ހާމަކުރިއެވެ.

މީގެ އިތުރުން ހއ އަތޮޅު އުފެދިފައި އޮންނަ ގޮތުން އެއީ ވަރަށް މުހިއްމު ސަރަޙައްދެއްގައި އޮންނަ އަތޮޅަކަށްވެފައި، އިހަވަންދިއްޕޮޅަކީ ދުނިޔޭގެ އިރުމަތީން ފެށިގެން ހުޅަގަށް ބޯޓުފަހަރު ދަތުރުކުރާ މައިގަނޑު ރޫޓެއް ކަމަށްވާއިރު، މިއީ މި ޕޯރޓް ހަދަން އެންމެ ރަނގަޅު ސަރަޙައްދުކަމަށާއި،  މީގެ ސަބަބުން ސަރަޙައްދުގެ އެހެނިހެން ބައިނަލްއަޤްވާމީ ޕޯރޓުތަކާ ރާއްޖެއަށްް ވާދަކުރެވޭނެކަމަށް އިކޮނޮމިކް މިނިސްޓްރީން ބުނެފައިވާ ކަމަށް ހއ. އަތޮޅު ކައުންސިލުން ހާމަކުރިއެވެ. އަދި މި ޕޯރޓާއެކު ރާއްޖޭގެ އުތުރުގައި އިޤްތިޞާދީ ގޮތުން ވަރުގަދަ ވިޔަފާރި ހަބެއް ޤާއިމްކުރެވި، އެހެން ޞިނާޢަތްތަކަށް ފުރުޞަތު ހުޅުވާލެވި، ދިވެހީންނަށް އިތުރު ވަޒީފާގެ ފުރުސަތުތަކެއް ހުޅުވާލެވޭނެކަމަށް އިކޮނޮމިކް މިނިސްޓްރީން ބުނެފައިވާ ކަމަށްވެސް ކައުންސިލުން ހާމަކުރިއެވެ.

މި މަޝްރޫޢު ކާމިޔާބުކަމާއެކު ހިންގިއްޖެނަމަ ރާއްޖޭގެ އިޤްތިޞާދަށް ވަރަށް ފައިދާ ކުރާނެކަމަށްވެސް ހއ. އަތޮޅު ކައުންސިލުން ވަނީ ހާމަކޮށްފައެވެ.