ޓިއުނީޝިއާގެ އައު ސަފީރު އެކަމަނާގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާއަށް އަރުވައިފި

ޓިއުނީޝިއާ ސަރުކާރުން ރާއްޖެއަށް ކަނޑައެޅުއްވި އައު ސަފީރު، ހަޔެތް ތަލްބީ ބިލެލް އެކަމަނާގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް އަރުވައިފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި މި ރަސްމިއްޔާތުގައި ޓިއުނީޝިއާގެ އައު ސަފީރު އެކަމަނާ ސަފީރުކަމާ ހަވާލުވެވަޑައިގަތުމާ ގުޅިގެން ރައީސުލްޖުމްހޫރިއްޔާ ވަނީ އެކަމަނާއަށް މަރުޙަބާ ވިދާޅުވެފައެވެ.

މި ބައްދަލުކުރެއްވުމުގައި ދެ ބޭފުޅުން ވަނީ ދެ ޤައުމުގެ ގުޅުން ބަދަހިކުރުމާއި ގުޅޭގޮތުންނާއި ކޮވިޑް-19 ގެ ހާލަތާއި ގުޅޭގޮތުންނާއި ތަރައްޤީގެ ދާއިރާއިން ގުޅުން ބަދަހިކުރުމާއި އަދި ބައިނަލްވާމީ ގުޅުންތައް ބަދަހިކުރުންފަދަ މައުޟޫޢުތަކުގައި މަޝްވަރާ ކުރައްވާފައެވެ. މި ބައްދަލު ކުރެއްވުމުގައި ރައީސުލްޖުމްހޫރިއްޔާ ވަނީ ޓިއުނީޝިއާއަކީ ވެސް ރާއްޖެފަދައިން އައްސޭރިފަށުގެ ޤައުމެއްކަމާއި އިސްލާމީ ގުޅުންތަކުގެ މައްޗަށް ބިނާވެފައި އޮންނަ ޤައުމެއްކަން ފާހަގަކުރައްވައި ދެ ޤައުމުގެ ހުރި އެއްގޮތް ކަންތައްތަކާއި ގުޅޭގޮތުން ވާހަކަފުޅު ދައްކަވާފައެވެ.

މި ބައްދަލު ކުރެއްވުމުގައި ވާހަކަފުޅު ދައްކަވަމުން ދެ ޤައުމުން ވެސް އިސްކަންދޭ ކަންކަމުގައި، ބޭނުންވާ އަމާޒަށް ވާޞިލުވުމަށްޓަކައި ޓިއުނީޝިއާއާއެކު ރާއްޖެއިން މަސައްކަތް ކުރާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ. މީގެ އިތުރުން ވިޔަފާރިއާއި އިންވެސްޓްމަންޓުގެ ދާއިރާއިން އިތުރަށް ގުޅުން ބަދަހިކުރެއްވުމާއި އަދި މަސްވެރިކަމާއި، ދަނޑުވެރިކަމާއި، ފަތުރުވެރިކަން ތަރައްޤީ ކުރެއްވުމުގެ ދާއިރާއިން ދެޤައުމުގެ ދެމެދުގައި ފަންނީ ތަޖުރިބާ ބަދަލުކުރުމުގެ ޝައުޤުވެރިކަން ރައީސުލްޖުމްހޫރިއްޔާ ފާޅުކުރެއްވިއެވެ.

ރައީސުލްޖުމްހޫރިއްޔާ ވަނީ އ.ދ. އާއި، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) އާއި، ނޮން-އެލައިންޑް މޫވްމަންޓު (ނާމް) ފަދަ ބައިނަލްއަޤްވާމީ ފަރާތްތަކާއި ގުޅިގެން، އިންސާނީ ޙައްޤުތަކާއި، ކައުންޓަރ ޓެރަރިޒަމާއި، ޞުލްޙައާއި، ސަލާމަތާއި ރައްކާތެރިކަމުގެ ދާއިރާތައް ފަދަ ދާއިރާތަކުން ގުޅުން ބަދަހިކުރުމާ ގުޅޭގޮތުން ވާހަކަފުޅު ދައްކަވާފައެވެ.

މި ބައްދަލުކުރެއްވުމުގައި ޓިއުނީޝިއާގެ ސަފީރު ދެއްކެވި ވާހަކަފުޅުގައި، ބައިނަލްއަޤްވާމީ މައިދާނުގައި ޚާއްޞަކޮށް އ.ދ.ގައި ރާއްޖެއިން އަދާކުރަމުންދާ ދައުރަށް ތަޢުރީފު ކުރެއްވިއެވެ. އަދި ބައިނަލްއަޤްވާމީ މައިދާނުގައި ޓިއުނީޝިއާއިން ރާއްޖެއަށް އަބަދުވެސް އެއްބާރުލުން ދެމުން ގެންދާނެކަމުގައި ސަފީރު ވިދާޅުވިއެވެ.

ރައީސުލްޖުމްހޫރިއްޔާ އާއި ޓިއުނީޝިއާގެ ސަފީރުގެ މި ބައްދަލުކުރެއްވުން ނިންމަވާލައްވަމުން ދެ ބޭފުޅުން ވަނީ މުސްތަޤުބަލުގައި ދެ ޤައުމުގެ ގުޅުން އިތުރަށް ބަދަހިވެގެން ދިއުމަށް އެދިވަޑައިގެންފައެވެ.

ދިވެހިރާއްޖެއާ ޓިއުނީޝިއާއާ ދެމެދު ސިޔާސީ ގުޅުން ޤާއިމުކޮށްފައި ވަނީ 1983 ވަނަ އަހަރުގެ ސެޕްޓެންބަރު މަހުގެ 10 ވަނަ ދުވަހުގައެވެ.