މާލެސިޓީއަކީ ކާރޫބާރު ބޮޑު ސިޓީއެކެވެ. އެތަނުން ގިނަ ޚިދުމަތްތަކެއް ލިބުނު ނަމަވެސް ހޯދަން އުނދަގޫ ކަންކަންތަކެއް ވެއެވެ. މީހުން ބުނާ ގޮތުންނަމަ މާލެއިން ހޯދަން އުނދަގުލީ ތިން ކަމަކެވެ. އެއީ އުޅަނދު ޕާކު ކުރާނެ ތަނަކާއި ބޯހިޔަވާހިކަމާއި މައުލޫމާތެވެ. މިއީ މުޅިއަކުން ދޮގު ވާހަކައެއް ވެސް ނޫނެވެ.
ޕާކިންގ ސްލޮޓެއް މާލެސިޓީން ހޯދުމަކީ ރަން ބިސް އަޅާ ކުކުޅެއް ލިބުން ފަދަ ކަމެކެވެ. މި މައްސަލަ ހައްލު ކުރުމަށް އެކި މުއައްސަސާތަކުން މަސައްކަތް ކުރަމުންދާއިރު މާލެސިޓީ ކައުންސިލުން ވެސް ވަނީ މި މައްސަލަ ހައްލު ކުރުމުގެ މަސައްކަތް ފަށާފައެވެ. އެގޮތުން މާލެ ސިޓީ ކައުންސިލުން ވަނީ, ފައިސާ ދައްކާ އުސޫލުން ޕާކިންގ ސްލޮޓްތަކަށް ކުރިމަތިލުމަށް ހުޅުވާލާފައެވެ.
މާލެ ސިޓީ ކައުންސިލުން އިއުލާނު ކޮށްފައިވާ ޕާކިންގ ސްލޮޓްތަކުގެ ގުރުއަތުލުން އާދިއްތަ ދުވަހުގެ ރޭ ބާއްވާފައިވާއިރު, މި ގުރުލުން ކުރިއަށް ދިޔަ ގޮތާމެދު ވަރަށް ގިނަ ބަޔެއްގެ ހިތުގައި ވަނީ ސުވާލު އުފެދިފައެވެ. އަދި ސިޓީ ކައުންސިލުގެ ނަޒާހަތްތެރިކަމާމެދު މިވަނީ ސުވާލުތައް ވެސް އުފައްދަން ފަށާފައެވެ. ޕާކިންގ ސްލޮޓްތަކުގެ ގުރުނެގުން ކުރިއަށް ގެންދިޔަ އުސޫލާމެދު ވެސް ހިތްހަމަޖެހުންތަކެއް އެބަހުއްޓެވެ.
ޕާކިންގ ސްލޮޓަށް ކުރިމަތިލި މީހަކު ރާއްޖެއެމްވީއަށް މައުލޫމާތު ދެމުން ބުނީ، އޭނާއަށް ގުރުލުމުގެ ކަންތައްތައް ކުރިއަށް ގެންދިޔަ ގޮތާމެދު ހިތްހަމަނުޖެހޭ ކަމަށެވެ. އެގޮތުން ގުރުނެގުން ބޭއްވިއިރު ވެސް ގިނަ މީހުންނަށް އެކަން ނޭނގޭ ކަމަށާއި، ވަރަށް އަވަސް އަރުވާލައިގެން ކުރިކަމެއްގެ ގޮތުގައި އޭނާ ވަނީ ސިފަކޮށްފައެވެ.
އެމީހާ ބުނީ އޭނައަށް ވެސް ޕާކިންގ ސްލޮޓެއް ލިބުނު ކަމަށާއި އެހެންނަމަވެސް މިގޮތަށް ކަންތައްތައް ކުރިއަށް ގެންދިޔުމުން އެއީ އެންމެ ރަނގަޅަށް ހިނގައިދިޔަ ކަމެއް ކަމަށް ގަބޫލުނުކުރާ ކަމަށެވެ.
ޑެޑްލައިނަށް ފަހު ވެސް ފޯމު ބަލައިގަތް ކަމަށް ބެލެވޭ. ދެން އަނެއްކާ ގުރުއަތުލުން ބޭއްވިއިރު ވެސް ނާންގާ. މީހަކު ދިމާވެގެން ބުނި ގުރުލުން އެބައޮތޭ. އަޅުގަނޑު ބުނިން މެއިލެއް ވެސް ނާދެޔޭ މެސެޖެއް ވެސް ނާދެޔޭ. އެއްވެސް އެއްޗެއް ނެތޭ. ބައެއް ކައުންސިލަރުންނަށް ވެސް އެކަން ނޭނގޭ. ޑެޕިއުޓީ މޭޔަރ ނަރީޝްގެ ޓުވީޓެއް އިން އޮންނާނެ ކަމަށް. އިތުރު ތަފްސީލެއް ނެތް އެކަމަކު. 07:50ގައި ޓުވީޓުކޮށްފައި ވަނީ 09:00 ޖަހާއިރު ގުރުލުން ނަގާނެ ކަމަށް ބުނެ. ގުރުލުން ނެގިއިރު ވެސް ގަނޑުކޮޅު ރަނގަޅަށް ނުދައްކާ، ގަނޑުކޮޅުތައް ބިންމައްޗަށް ވެސް ވެއްޓޭ. ބެލެވެނީ ބަޔަކު މީހުން ތުހުމަތުކުރެވޭ ގޮތުގައި މާކުރިން ޕާކިންގ ސްލޮޓްތައް މީހުންނަށް ވިއްކައިގެން މި އުޅެނީ. އެމީހުންނަށް އަވަހަށް ދޭން ޖެހޭތީ މިއުޅެނީ. މިހާ އަވަހަށް މިކަން ކުރީ ހަމަ ވަކި ބަޔަކަށް ދޭން ވެގެންޕާކިންގ ސްލޮޓަށް ކުރިމަތިލި މީހަކު
ޕާކިންގ ސްލޮޓްތަކުގެ ގުރުއަތުލުން އާދިއްތަ ދުވަހުގެ ރޭ ކުރިއަށް ގެންގޮސްފައިވާއިރު މާލެސިޓީ ކައުންސިލްގެ ޑެޕިއުޓީ މޭޔަރ އަހްމަދު ނަރީޝް ދިޔައީ ނަންބަރުތައް އިއުލާންކުރައްވަމުންނެވެ.
211 ސްލޮޓަށް 969 މީހަކު ކުރިމަތިލާފައިވާއިރު މި ސްލޮޓްތަކަށް ކުރިމަތިލި ކޮންމެ ފަރާތަކަށްވެސް ސްލިޕެއް ހަވާލުކުރި ކަމަށް މާލެސިޓީ ކައުންސިލުން ވަނީ ބުނެފައެވެ. ގުރުއަތު ނެގުމަށް ބޭނުންކޮށްފައިވަނީ ސްލިޕް ނަންބަރު ކަމަށާއި، މި ސްލިޕް ނަންބަރުތައް ކަމަށް ވެސް އެ ކައުންސިލުން ވަނީ ބުނެފައެވެ.
ބައެއް މީހުންނަށް ސްލިޕް ދޫކުރިއިރު ފޯމް ނަންބަރު ކައުންސިލުގެ ފަރާތުން ޖަހާފައި ނެތް މައްސަލަ ވެސް ވަނީ ފެންމަތިވެފައެވެ. އަދި މިފަދަ ގިނަ ސްލިޕްތަކެއް ވަނީ ސޯޝަލް މީޑީއާގައި ދައުރުވެފައެވެ. މިކަމާއި ގުޅިގެން ނަރީޝް ވިދާޅުވީ ނަންބަރުތައް ނެތް ސްލިޕް ހުރެދާނެ ކަމަށެވެ.
އަޅުގަނޑުމެންނަށް ސްލިޕް ދޫކުރިއިރު އިދާރީ ގޮތުން ނަންބަރުތައް ދޫނުކުރެވި އެބަހުރި. އެއީ އަޅުގަނޑުމެން ޤަބޫލުކުރާ ކަމެއް. އެކަމަކު ހުރިހާ ބޭފުޅުންނަށް ފޯމް ހުށަހެޅި ތަރުތީބުން ސްލިޕް ނަންބަރު ދޫނުކުރެވި ހުރިކަމުގައި ވިޔަސް މިކޮޅުން އިނީ ސްލިޕް ނަންބަރު ޖެނެރޭޓްކޮށްފައި. މިހާރު އާންމުކޮށްފައިވާ ލިސްޓް ބެއްލެވުން އެނގިލައްވާނެ. ނަރީޝް ވިދާޅުވީ އައިޑީކާޑު ނަންބަރު ނުޖެހީ، އެއް މީހަކު ދެ ވެހިކަލަށް ވެސް އެދި ހުށަހައަޅައިފައިވުމުން އެއީ ކޮން ވެހިކަލެއްކަން ނޭނގޭނެތީ ކަމަށެވެ. އަދި ފޯން ނަންބަރު ވެސް އެއް ސްލިޕަށް ވުރެން ގިނަ ސްލިޕުގައި ހުންނަ ކަމަށެވެ. އެހެންކަމުން ވެރިފައި ކުރަން ފަސޭހައެއް ނުވާނެ. ވެރިފައި ކުރެވެން އޮތް ހަމައެކަނި ގޮތަކީ ސްލިޕް ނަންބަރު ޖަހައިގެން ކަމަށްވާތީ އެގޮތަށް ކަންތައްތައް ކުރީ.ނަރީޝް
ނަރީޝް މިހެން ވިދާޅުވެފައިވާއިރު ރާއްޖެއެމްވީއަށް އެ ކައުންސިލްގެ މެމްބަރަކު ވެސް ވަނީ މައުލޫމާތު ދެއްވާފައެވެ. އެބޭފުޅާ ވިދާޅުވީ އެންމެ ފުރަތަމަ ގުރުނެގުން ކުރިއަށް ގެންދަން ނިންމީ ޑިޖިޓަލްކޮށް ކަމަށެވެ. އެހެންނަމަވެސް މާލެސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު އެކަން މެނުއަލްކޮށް ކުރިއަށް ގެންދަވާނެ ކަމަށް ވިދާޅުވުމުން އެކަން އެގޮތަށް ކުރުމަށް ކައުންސިލުން ނިންމި ކަމަށެވެ. އަދި ގުރުނެގުން ވެސް ބޭއްވީ ކޮމެޓީއާ މަޝްވަރާ ނުކޮށް ކުއްލި ގޮތަކަށް ކަމަށާއި، އެކަން ކުރުވީ ވެސް ސެކެޓެރިއޭޓް ސްޓާފެއް ލައްވާ ކަމަށެވެ. ސްލިޕް ނަންބަރު ކީއިރު ސްލިޕް ނުލިބޭ މީހުންނާއި ނަންބަރު ނެތް މީހުން ވެސް ހިމެނޭ ކަމަށް އޭނާ ވިދާޅުވިއެވެ. މިކަން ކުރިއަށް ގެންދިޔައީ ދެފުށް ފެންނަ ގޮތަށް ނޫން ކަމަށާއި އެހެންކަމުން އެންޓި ކޮރަޕްޝަން ކޮމިޝަނަށް މައްސަލަ ހުށައަޅުއްވާނެ ކަމަށް އޭނާ ވިދާޅުވިއެވެ.
މިފަދަ ދެ ފުށްފެންނަ ގޮތަކަށް ކުރިއަށް ގެންދަންޖެހޭ ކަމެއްގައި ސިޓީ ކައުންސިލަށް ބައެއް މީހުން ޝައްކުގެ ނަޒަރަކުން ބަލަމުންދާއިރު ނަރީޝް ވިދާޅުވީ ނަޒާހަތްތެރިކަމާމެދު ސުވާލު އުފައްދާނަމަ، އެކަން ހުށަހަޅަން ޖެހޭ މުއައްސަސާއަކަށް ހުށަހެޅިޔަސް އެކަމުގައި އެއްވެސް މައްސަލައެއް ނެތް ކަމަށެވެ. އަދި އެކަންތައްތައް އޭސީސީއަށް ހުށަހުޅުމަށް ބޭނުންވާނަމަވެސް ނަރީޝް ވަނީ އެކަމަށް މަރުހަބާ ވިދާޅުވެފައެވެ.
މިފަދަ މައްސަލައެއް ފެންމަތިވެފައިވާއިރު، ޑރ. މުހައްމަދު މުއިއްޒު ހައުސިންގ މިނިސްޓަރުކަމުގެ މަގާމުގައި ހުންނެވިއިރު 2017 ވަނަ އަހަރު ވެސް މިފަދަ މައްސަލައެއް ވަނީ ފެންމަތިވެފައެވެ. އޭރު ގެދޮރުވެރިކުރުން ޕްރޮގްރާމްގެ ދަށުން ފްލެޓް ލިބުނު މީހުންގެ ވެސް އާންމުކޮށްފައިވަނީ ފޯމް ނަންބަރުތަކެއް އެކަންޏެވެ. އެކަމާ ގުޅިގެން ބައެއް މީހުން ވަނީ ފްލެޓް ލިބުނު މީހުންގެ ލިސްޓު އާއްމުކުރުން ލަސްވި ސަބަބާމެދު ސުވާލު އުފައްދާ އެއީ ވަކި ބަޔަކަށް ދޭން ކުރަމުން އަންނަ ކަމެއް ކަމަށް ތުހުމަތުކޮށްފައެވެ.
މި ތުހުމަތުތަކާ ގުޅިގެން އޭރުގެ ހައުސިންގ މިނިސްޓަރ ވިދާޅުވީ، އެކަކަށް ދެ ފްލެޓެއް ނުދޭނެ ކަމަށާއި އާއްމުކުރި ލިސްޓުގައި ފޯމް ނަންބަރު އެކަނި ހިމެނީ ފްލެޓް ލިބޭ މީހުންގެ އަދި ނުލިބޭ މީހުންގެ ވެސް ހައްގުތައް ރައްކާތެރި ކޮށްދިނުމުގެ ގޮތުން ކަމަށެވެ.
211 ޕާކިންގ ސްލޮޓް ލިބުނު މީހުންގެ މައުލޫމާތު ފުރިހަމަނުކޮށް އޮތުމުން، އާންމުން ކުރަމުންދާ ސުވާލަކީ، މިފަހަރު ވެސް ޑރ. މުއިއްޒުގެ ހިންގެވުމުގެ ދަށުން މާލެސިޓީ ކައުންސިލުން މިގޮތަށް އަމަލު ކުރީ ހަމަ ސްލޮޓް ލިބުނު މީހުންގެ ހައްގުތައް ރައްކާތެރިކުރަންތޯއެވެ؟
