ގައުމީ ނެޓްބޯޅަ މުބާރާތުގެ އަންހެން ޑިވިޝަނުގެ ޗެމްޕިއަންކަން ކުލަބު ގްރީން ސްްޓްރީޓްސްއިން ހޯދިއިރު، ފިރިހެން ޑިވިޝަނުގެ ޗެމްޕިއަންކަން ކުޅުދުއްފުށީ ޔޫތު އެންޑް ރެކްރިއޭޝަން ކުލަބު (ކޭވައިއާރްސީ) އިން ހޯދައިފިއެވެ.

މިދިޔަ ނޮވެމްބަރު މަހުގެ 22 ވަނަ ދުވަހުން ފެށިގެން އާދީއްތަ ދުވަހުގެ ނިޔަލަށް ކުރިއަށްދިޔަ މި މުބާރާތުގެ އަންހެން ޑިވިޝަނުގެ ޗެމްޕިއަންކަން ގްރީން ސްޓްރީޓްސްއިން ހޯދީ އާދީއްތަ ދުވަހުގެރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފައިނަލް މެޗުން ކޭވައިއާރްސީ ބަލިކުރުމަށްފަހުއެވެ. މި އަހަރުގެ ޗެމްޕިއަންކަން

ފޯރިގަދަ ކުޅުމެއް ފެނިގެންދިޔަ މި މެޗު ގްރީން ސްޓްރީޓްސްއިން ކާމިޔާބުކޮށްފައިވަނީ 52-32 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ގްރީން ސްޓްރީޓްސްގެ އައިޝަތު ނާޒިމާއެވެ. ގްރީން ސްޓްރީޓްސްއިން މި މުބާރާތުގެ ޗެމްޕިއަންކަން ހޯދާފައިވަނީ ކުޅުނު ހުރިހާ މެޗެއްވެސް ކާމިޔާބުކޮށްގެންނެވެ. އަދި މި މުބާރާތުގެ އެންމެ މޮޅު ހަތް ކުޅުންތެރިންގެ ތެރޭގައި އެ ޓީމުގެ ދެ ކުޅުންތެރިން ހިމެނުނުއިރު، މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދީ ގްރީން ސްޓްރީޓްސްގެ ރީމް ޝާމެވެ.

މި އަހަރުގެ މުބާރާތުގެ އަންހެން ޑިވިޝަނުގައި އަށް ޓީމެއް ވާދަކުރިއިރު، އެ ޓީމުތަކަކީ ގްރީން ސްޓްރީޓްސް އާއި ކޭވައިއާރްސީގެ އިތުރުން ޒެނިތު ސްޕޯޓްސް ކުލަބާއި، ޔޫތު ޔުނައިޓެޑް ސްޕޯޓްސް ކުލަބާއި، ކުލަބު މެޓްރިކްސް އާއި، މަހިބަދޫ ސްޕޯޓްސް ކުލަބާއި، ކުލަބު ޝައިނިން ސްޓާ އަދި ލޮރެންޒޯ ސްޕޯޓްސް ކުލަބެވެ.

މީގެ އިތުރުން މި އަހަރުގެ މުބާރާތުގެ ފިރިހެން ޑިވިޝަނުގެ ޗެމްޕިއަންކަން ކޭވައިއާރްސީން ހޯދީ ހޮނިހިރު ދުވަހުގެރޭ ކުޅުނު ފައިނަލް މެޗުގައި ކްލަބް މެޓްރިކްސް އަތުން 30-27 އިން މޮޅުވެގެންނެވެ.

ފައިނަލް މެޗުގެ މޮޅު ކުޅުންތެރިއަކީ ކޭވައިއާރްސީގެ މުޙައްމަދު އަރާޝް އައްސަދެވެ. މުޅި މުބާރާތުގެ އެންމެ މޮޅު ކުޅުންތެރިއަކަށް ކޭވައިއާރްސީގެ ހުސެއިން ސަވީލް ހޮވުނުއިރު، އެންމެ މޮޅު ހަތް ކުޅުންތެރިންގެ ތެރޭގައި ހިމެނުނީ ކޭވައިއާރްސީގެ ސަވީލާއި، އަރާޝުގެ އިތުރުން ހުސެއިން ހަލީމާއި، އަޙްމަދު ހުޝާމް އަދި މެޓްރިކްސްގެ އިސްމާޢީލް ފަރުހާނާއި އިބްރާހީމް އިޔާޒް އަދި އަޙްމަދު އަފްޝަން ރަޝާދެވެ.

މި ފަހަރުގެ ގައުމީ މުބާރާތުގެ ފިރިހެން ޑިވިޝަނުގައި ތިން ޓީމެއް ވާދަކުރިއިރު، އެ ޓީމުތަކަކީ ކޭވައިއާރްސީ އާއި މެޓްރިކްސްގެ އިތުރުން ސްކައިލާކެވެ.

އާދީއްތަ ދުވަހުގެރޭ މި މުބާރާތުގެ ކުޅުން ނިންމާލިއިރު، އަންހެން ޑިވިޝަނުގެ ފައިނަލް މެޗު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދެވެ. ކޮވިޑް-19 އާ ގުޅިގެން މިދިޔަ އަހަރު ނެޓްބޯޅައިގެ އެއްވެސް މުބާރާތެއް ބާއްވާފައި ނުވާއިރު، އެންމެ ފަހުން ގައުމީ ނެޓްބޯޅަ މުބާރާތް ބޭއްވީ 2019 ވަނަ އަހަރެވެ.