ރ ފުއްގިރި ޚިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް ދައުލަތުން އުފުލާފައިވާ ދެ ދައުވާއެއްގެ ޝަރީއަތުގެ އަޑުއެހުން ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އެމްއެމްޕީއާރުސީން ރިސޯޓެއްގެ ގޮތުގައި ތަރައްގީކުރުމަށް ކުށްޔަށް ދޫކުރި ރ. ފުއްގިރީގެ މައްސަލައިގައި ރައީސް ޔާމީނުގެ މައްޗަށް އުފުލާފައިވަނީ މަނީ ލޯންޑަރިން ކުށުގެ ދައުވާއަކާއި ރިޝްވަތު ގަބޫލުކުރުމުގެ ކުށުގެ ދައުވާއެކެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ގާޒީ އަހުމަދު ޝަކީލް ވަނީ ދެން އޮންނަ އަޑުއެހުމެއްގައި އޮންނާނީ ޝަރީއަތުގެ ކުރިން ހުށައަޅާ ހުށައެޅުންތަކަށް ގޮތެއް ނިންމުންކަމަށް ވިދާޅުވެފައެވެ. އެހެންނަމަވެސް، ހޯމަ ދުވަހުގެ އަޑުއެހުމަކީ ޔާމީނު ފުރުން މަނާ ކުރުމުގެ އަމުރަކަށް ދައުލަތުން އެދިފައިވުމާއި ގުޅިގެން ބާއްވާފައިވާ އަޑުއެހުމެކެވެ. މި އަޑުއެހުމުގައި ވާހަކަ ދައްކަވަމުން ދައުލަތުގެ ވަކީލާ ވިދާޅުވީ، މި މައްސަލައިގައި ޔާމީނުގެ މައްޗަށް ދައުވާ ކޮށްފައިވާ ކުށުގެ ބާވަތަށް ބަލާއިރު، ފުރުން މަނާ ކުރެވޭނެފަދަ ހާލަތެއް އޮތްކަމަށް ގަބޫލު ކުރައްވާ ކަމަށެވެ.

ދައުލަތުގެ ވަކީލާ ވަނީ ޝަރީއަތް ނިމެންދެން ޔާމީނުގެ ޕާސްޕޯޓު ހިފަހައްޓައިދިނުމަށް އެދިވަޑައިގެންފައެވެ.

ޕާސްޕޯޓު ހިފެހެއްޓުމުގެ އަމުރަކަށް އެދި ހުށައަޅާފައިވާ ފޯމު ލިބުން ލަސްވުމުގެ ޝަކުވާ:

ހޯމަ ދުވަހުގެ އަޑުއެހުމުގައި ވާހަކަ ދައްކަވަމުން ޔާމީނުގެ ވަކީލު ވިދާޅުވީ، ޕާސްޕޯޓު ހިފެހެއްޓުމުގެ އަމުރަކަށް އެދި ހުށައަޅާފައިވާ ފޯމު ހޯދުމަށް އާދިއްތަ ދުވަހުވެސް މަސައްކަތް ކުރެއްވި ކަމަށާއި، ނަމަވެސް އެ ފޯމު ލިބިފައިވަނީ އަޑުއެހުމަށް ވަޑައިގެންނެވުމުން ކަމަށެވެ. ވީމާ އެކަމާ ގުޅޭގޮތުން އިތުރު ވަގުތު ބޭނުންވާކަން ވަކީލު ފާހަގަ ކުރެއްވިއެވެ. ދިފާއީ ވަކީލުން ވަނީ ދެހަފުތާގެ މުއްދަތެއް ދެއްވުމަށް އެދިފައެވެ. ނަމަވެސް ގާޒީ ވިދާޅުވީ، ދެ ހަފުތާގެ މުއްދަތަކީ އެކަމަށް މާ ގިނަ ވަގުތު ކަމަށެވެ.

އެކަމާ ގުޅޭގޮތުން ވާހަކަ ދައްކަވަމުން ޔާމީނު ވިދާޅުވީ، އެމަނިކުފާނު ފިއްލަވާނެ ކަމުގެ ހެކި ހުރިކަމަށް ފުލުހުންނާ ހަވާލާދީ ދައުލަތުން ބުނާއިރު، އެއީ ބޮޑެތި ތުހުމަތުތަކެއް ކަމަށާއި، އެ ހެކިތައް ބައްލަވަން ބޭނުންފުޅުވާ ކަމަށެވެ. ފުލުހުން ކޮށްފައި އެވަނީ ކޮށްގެން ނުވާނެ ކަހަލަ ތުހުމަތެއްކަމަށް ޔާމީނު ވިދާޅުވިއެވެ. ނަމަވެސް ދައުލަތުން ވަނީ، ޔާމީނު ފިލައިގެން ގޮސްދާނެކަމަށް ބަޔާންކޮށް ވަކި ހެއްކެއް ހުށައަޅާފައި ނުވި ނަމަވެސް، އެމަނިކުފާނު ފިއްލަވާނެ ފަދަ ސަބަބުތައް ހުރިނަމަ އެކަމަށް ފަނޑިޔާރަށް ރިއާޔަތް ކުރެވޭނެ ކަން ފާހަގަކުރައްވާފައެވެ.

ދައުލަތުން އެކަމާ ގުޅިގެން ވިދާޅުވެފައިވަނީ، އެ ފޯމުގައި އިތުރު ވާހަަކައެއް ނެތް ކަމަށާއި، މި އަޑުއެހުމުގައި އޮންނާނީ ޕާސްޕޯޓު ހިފެހެއްޓުމުގެ އަމުރާއި ގުޅޭގޮތުން ވާހަކަ ދެއްކުންކަން ކުރިންވެސް އަންގާފައިވުމާއެކު، ހޯމަ ދުވަހުގެ އަޑުއެހުމުގައިވެސް ޖަވާބުދެވޭނެކަމަށް ގަބޫލު ކުރެވޭ ކަމަށެވެ. ވަކިން ޚާއްސަކޮށް، މިއީ ފުރުން މަނާ ކުރުމާގުޅޭ އަޑުއެހުމަކަށްވެފައި، އާދައިގެ ގާނޫނީ މައްސަލައަކަށްވާއިރު، މިއީ ހޯމަ ދުވަހުވެސް ތައްޔާރުވެވޭނެ ވަރުގެ މައްސަލައެއްކަން ދައުލަތުގެ ވަކީލާ ފާހަގަ ކުރެއްވިއެވެ.

ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ ހޯމަ ދުވަހުގެ ހަވީރު 16:00 މި މައްސަލައާ ގުޅޭ އަޑުއެހުމެއް ބޭއްވުމަށް ނިންމަވާފައެވެ.

ރައީސް ޔާމީނުގެ އިތުރުން މި މައްސަލައިގައި އެމަނިކުފާނާއެކު މަނީ ލޯންޑަރ ކުރުމުގައި ބައިވެރިވިކަމުގެ ތުހުމަތު ކުރެވޭ ދައުވާލިބޭ ކްރިކް ރިޒާއާއި، ސަން އިންވެސްޓްމަންޓުގެ އިތުރުން، ސަން ކޮންސްޓްރަކްޝަންގެ މައްޗަށް އުފުލާފައިވާ ދައުވާތަކުގެ އަޑުއެހުންވެސް މިހާރު ކްރިމިނަލް ކޯޓުގައި ކުރިއަށްދެއެވެ.