އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެމްބަރުން އަވަސް އަވަހަށް އިސްތިއުފާދޭ މައްސަލައަށް، ޤާނޫނުން ހައްލެއް ބޭނުންވާ ކަމަށް އިލެކްޝަންސް ކޮމިޝަނުގެ ރައީސް ފުއާދު ތައުފީގު ވިދާޅުވެއްޖެއެވެ.

ފުއާދު ވިދާޅުވީ އެންމެ ގިނައިން އިންތިޚާބުތައް ބާއްވަން ޖެހެނީ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެމްބަރުން އިސްތިއުފާ ދިނުމުން ކަމަށެވެ. މިއީ ބޮޑު ޚަރަދެއް ކަމަށާއި، މިކަމުގެ ދަތިކަން އެބަހުރި ކަމަށް ފުއާދު ވިދާޅުވިއެވެ.

މެމްބަރުން އިސްތިއުފާ ދޭ ސަބަބުތަކަށް އަލިއަޅުއްވާލައްވާ ފުއާދު ވިދާޅުވީ ޑަބްލިޔުޑީސީގެ މަގާމުގައި ލިބޭ އުޖޫރަ ރަނގަޅު ނުވުމުން ބައެއް މީހުން އިސްތިއުފާ ދޭ ކަމަށް ބުނާއިރު އަނެއް ބައި މީހުންގެ އާއިލާގެ ފަރާތުން އެއްބާރުލުން ނުލިބޭތީ ވެސް އިސްތިއުފާ ދޭ ކަަމަށް ބުނާ ކަމަށެވެ. ބޮޑު ޚަރަދު ކޮށްފައި ބައި އިލެކްޝަންތައް ބޭއްވި ނަމަވެސް ވޯޓުލާން އަންނަ މީހުން ވަރަށް މަދުކަމަށް ވިދާޅުވެ، މިއީ ވަރަށް ދެރަވަރު ކަމެއްގެ ގޮތުގައި ފުއާދު ވަނީ ފާހަގަ ކުރައްވާފައެވެ.

މިއަހަރުގެ އޯގަސްޓު މަހުގެ ތެރޭގައި ހދ. ނޮރިވަރަމް، ނ.މަގޫދޫ، ކ.ދިއްފުށި، އއ.ފެރިދޫ އަދި ނ. ކެނދިކުޅުދޫގައި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި އިލެކްޝަންތަކެއް ބޭއްވިއެވެ. މީގެ ތެރެއިން ނޮޅިވަރަމުގައި ވޯޓުލުމުގެ ހައްގު 1،800 މީހުންނަށް ލިބިފައިވީ ނަމަވެސް ވޯޓު ލާފައިވަނީ 345 ފަރާތަކުންނެވެ. އަދި މަގޫދޫގައި 276 މީހުނަށް ވޯޓުލުމުގެ ހައްގު ލިބިފައިވާއިރު، ވޯޓުލާފައި ވަނީ 179 މީހުންނެވެ. މިއީ ވޯޓުލި ރަށްތަކުގެ ތެރެއިން އެންމެ ރަނގަޅު ނަތީޖާ ކަމަށް ފުއާދު ފާހަގަކުރެއވިއެވެ. ހަމަ އެހެންމެ ދިއްފުށީގައި ބޭއްވި އިންތިޚާބުގައި 922 މީހުން ވޯޓުލާން ޖެހޭއިރު، ވޯޓުލާފައި ވަނީ އެންމެ 180 މީހުންނެވެ.

މި ބައި އިލެކްޝަންސްތަކަށް އިލެކްޝަންސް ކޮމިޝަނުން ވަނީ 1،298،343 ރުފިޔާ ޚަރަދުކޮށްފައެވެ. މި އިންތިޚާބުތަކުގައި މަދު ބަޔަކު ވޯޓުލީ ނަމަވެސް ވޯޓުލުމުގެ ހައްގު އޮންނަ ހުރިހާ ފަރާތްތަކަކަށް ވާވަރަށް ވޯޓު ކަރުދާސް ޗާޕު ކުރުމުން ފެށިގެން ހުރިހާ މަސައްކަތެއްވެސް ކުރަން ޖެހޭކަމަށް ފުއާދު ފާހަގަ ކުރެއްވިއެވެ.

މިއަހަރުގެ އޮކްޓޫބަރ 16 ވަނަ ދުވަހު ހދ. ނޭކުރެންދޫ، ނ.ކެނދިކުޅުދޫ އަދި ރ.މަޑުއްވަރީގައި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި އިލެކްޝަންސް ބޭއްވުނެވެ. މި އިންތިހާބުތަކަށް ޖުމްލަ 391،260 ރުފިޔާ ވަނީ ޚަރަދުވެފައެވެ. މީގެ އިތުރުން ޅ.ކުރެންދޫއާއި ގއ.ވިލިނގިލީގައި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި އިލްކްޝަނަށް އިލެކްޝަންސް ކޮމިޝަނުން ވަނީ 310،769 ރުފިޔާ ޚަރަދު ކޮށްފައެވެ.

މިއާއެކު މި އިންތިޚާބުތަކަށް އިލެކްޝަންސް ކޮމިޝަނުން ކުރި ޚަރަދުގެ ޖުމްލަ އަދަދު ވަނީ 2،000،372ށް އަރާފައެވެ. ފުއާދު ވަނީ މިއީ ސަރުކާރަށް ވެސް އިތުރުވެގެންދާ ކަރަދެއްގެ ގޮތުގައި ފާހަގަކުރައްވާ މިކަމުގެ ކަންބޮޑުުވުން ހިއްސާ ކުރައްވާފައެވެ.

ފުއާދު އިތުރަށް ވިދާޅުވީ ފިންގަރ ޕްރިންޓުގެ ވެރިފިކޭޝަން މެޝިނެއް އިލެކްޝަންސް ކޮމިޝަންގައި ނުހުންނަ ކަމަށެވެ. އަދި އެ މެޝިން މިހާތަނަށް ނުހޯދި ވަނީ ވަރަށް އަގު ބޮޑު މެޝިނަކަށް ވެފައި ބަޖެޓުގައި އެކަމަށް ހިމަނާފައިނުވާތީ ކަމަށެވެ.