ދެކުނު އެފްރިކާއަށް ކުރާ ދަތުރުތައް މެދުކަނޑާލަން އީޔޫގެ މެމްބަރު ގައުމުތަކަށް އަންގައިފި

ދެކުނު އެފްރިކާއިން އައު ވޭރިއަންޓެއް ފެނުމާއެކު ޔޫރަޕިއަން ޔޫނިއަން (އީޔޫ)ގެ މެމްބަރު ގައުމުތަކުން، އެގައުމަށް ކުރަމުންދާ ދަތުރުތައް ވަގުތީގޮތުން ހުއްޓާލުމަށް އަންގައިފިއެވެ.

ޔޫރަޕިއަން ޔޫނިއަންގެ ގައުމުތަކުން ދެކުނު އެފްރިކާއަށް ކުރަމުންދާ ދަތުރުތައް ހުއްޓާލުމަށް އީޔޫގެ ރައީސް އުރްސުލާ ވޮން ޑަރ ލެޔެން އަންގަވާފައިވާއިރު، މިއީ ކޮވިޑް-19ގެ މި އައު ވޭރިއަންޓް އީޔޫގެ ގައުމުތަކަށް ފެތުރުން ކޮންޓްރޯލްކުރުމަށް ނިންމަވާފައިވާ ނިންމުމެއް ކަމަށް އޭނާ ވިދާޅުވިއެވެ.

މިހާތަނަށް އައިއިރު ދެކުނު އެފްރިކާއަށް ކުރަމުންއައި ވައިގެ ދަތުރުތައް ހުއްޓާލަން ނިންމާފައިވަނީ 10 ގައުމަކުންނެވެ. އެ ގައުމުތަކަކީ ޗެކް ރިޕަބްލިކް، ޔުނައިޓެޑް ކިންގްޑަމް، ޖަރމަނީ، ފަރާންސް، އިޓަލީ، އިސްރާއިލް، ޖަޕާން، ޓައިވާން، ސިންގަޕޯރ އަދި ނިއުޒިލޭންޑެވެ.

ދެކުނު އެފްރިކާގައި ފެތުރެމުންދާ ކޮވިޑް-19ގެ އައު ވޭރިއަންޓަކީ ބީ.1.1.529 އެވެ. މި ވޭރިއަންޓް މިހާތަނަށް ފެނިފައިވަނީ 59 މީހެއްގެ ހަށިގަނޑުން ކަމަށް ރިޕޯޓުތައް ބުނެއެވެ. އެއީ ދެކުނު އެފްރިކާއާއި، ހޮންގް ކޮންގް އަދި ބޮޓްސްވާނާއިންނެވެ.

މި އައު ވޭރިއަންޓާ ގުޅޭގޮތުން ވާހަކަދައްކަމުން ސައިންސްވެރިން ބުނެފައިވަނީ މިވޭރިއަންޓްގައި 32 ސްޕައިކް ޕްރޮޓީން މިޔުޓޭޝަން އެކުލެވޭކަމަށެވެ. އެހެންކަމުން މިމިޔުޓޭޝަން އަކީ ކަންބޮޑުވާ މިޔުޓޭޝަނެއްގެ ގޮތުގައި ބައެއް ސައިންސްވެރިން ވަނީ ފާހަގަކޮށްފައެވެ. އިންސާނުންގެ ހަށިގަނޑުގެ ސެލްތަކަށް ވަނުމަށް ވައިރަސް ބޭނުންކުރާ އެއްޗަކީ ސްޕައިކް ޕްރޮޓީންސްއެވެ. ވެކްސިން މަސައްކަތްކުރަމުންދަނީ މި ސްޕައިކްތައް ހޯދައި އެ ނިޔުޓްރަލައިޒްކުރުމަށެވެ. ޕްރޮޓީން ސްޕައިކްގެ މިޔުޓޭޝަންތަކަކީ މިހާތަނަށް އައިއިރު އެމްއާރުއެންއޭ ވެކްސިނަށް އެހާ ބޮޑަށް އަސަރުކުރާ މިޔުޓޭޝަންތަކެއް ނޫނެވެ. އެހެންކަމުން ފައިޒަރއާއި މޮޑާނާގެ ކޮވިޑް ވެކްސިން މިވޭރިއަންޓާ ދެކޮޅަށް އެންމެ އެދެވޭގޮތުގައި މަސައްކަތް ނުކޮށްފާނެކަމުގެ ބިރު ވަނީ ހީވެފައެވެ.