އިންޑިޔާ އާއި އެމެރިކާ އާ ދެމެދު ހުރި ވިޔަފާރީގެ މައްސަލަތައް ހައްލުކުރުމާއި ގުޅޭގޮތުން ދެ ގައުމުން މަޝްވަރާކޮށްފިއެވެ.
މަޝްވަރާކުރި ކަންތައްތަކުގެ ތެރޭގައި މާކެޓް އެކްސެސް އާއި ޑިޖިޓަލް ޓްރޭޑް ހިމެނެއެވެ. މަޝްވަރާތައް ކުރަމުންދަނީ އެމެރިކާގެ ޓްރޭޑް ރެޕްރެޒެންޓޭޓިވް ކެތްރިން ތައި މިހާރު އިންޑިޔާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.
ވިޔަފާރީގެ ދާއިރާއިން ދެ ގައުމަށް އެއްބަސްވުމަކާ ހަމައަށް ނާދެވި މަޝްވަރާތައް ކުރިޔަށްގެންދާތާ އަހަރަކަށްވުރެ ގިނަ ދުވަސްވަނީ ވެފައެވެ. އެކި ކަންކަމާއި ގުޅޭގޮތުން ވަކިން ޚާއްސަކޮށް ޓެރިފް ކަނޑައެޅުމާއި ގުޅޭގޮތުން ދެ ގައުމަށް އެއްބަސްވުމަކާ ހަމައަށް އާދެވޭގޮތެއް ވަނީ ނުވެފައެވެ.
އިންޑިޔާގެ ކޮމާސް މިނިސްޓަރ ޕިޔުޝް ގޮޔާލް ދެއްވި ރޭގަނޑުގެ ފަރިއްކޮޅުގައި ވާހަކަދައްކަވަމުން އެމެރިކާގެ ޓްރޭޑް ރެޕްރެޒެންޓޭޓިވް ކެތްރިން ވަނީ މާކެޓް އެކްސެސްގައި ހުރި ހުރަސްތަކާއި، ހައި ޓެރިފް އަދި ތަންފީޒުކުރަން އުނދަގޫ ގަވާއިދުތަކާއި ޑިޖިޓަލް ޓްރޭޑިންގ ގައި ހުރި ހުރަސްތަކުގެ ވާހަކަދައްކަވާފައެވެ. މިކަންކަމާއި ގުޅޭގޮތުން މިދަތުރުފުޅުގައި މަޝްވަރާކުރައްވާނެކަމަށް ކެތްރިން ވިދާޅުވިއެވެ.
ކެތްރިންގެ މިދަތުރުފުޅަކީ އިންޑިޔާގެ ބޮޑުވަޒީރު ނަރެންދްރަ މޯދީ ދާދިފަހުން އެމެރިކާއަށް ކުރެއްވި ދަތުރުފުޅަށްފަހު ކުރައްވާ ދަތުރުފުޅެކެވެ.
ފަރިއްކޮޅުގައި ވާހަކަދައްކަވަމުން އިންޑިޔާގެ ކޮމާސް މިނިސްޓަރ ވިދާޅުވީ އިންޑިޔާގެ ބޮޑުވަޒީރާއި އެމެރިކާގެ ރައީސް ހަވާލުކުރައްވާފައިވާ ޒިންމާއަކީ ދެގައުމުގެ އިގްތިޞާދީ ގުޅުން މިހާރަށްވުރެ ޚަރުދަނާކޮށް މިހާރަށްވުރެ ދެފުށް ފެންނަ ހަމައަކުން މިކަން ކުރިޔަށް ގެންދިޔުންކަމަށެވެ.
ހަތަރު އަހަރަށްފަހު ދެ ގައުމުގެ ޓްރޭޑް ޕޮލިސީ ރިވިއު ކުރުމަށް ދެ ގައުމުން ވަނީ އެއްބަސްވެފައެވެ.
އިންޑިޔާ އާއި އެމެރިކާގެ ގުޅުން ރަނގަޅުވާން ފަށާފައިވާއިރު ދެ ގައުމުން ވަނީ ޖަޕާން އަދި އޮސްޓްރޭލިއާ އާ ގުޅިގެން އިންޑޯ ޕެސިފިކް ސަރަހައްދުގައި ޗައިނާގެ ނުފޫޒް ކުޑަކުރުމުގެ މަސައްކަތްތައް ފަށާފައެވެ.
