"ސްޓެވޯ" ޖަނަރޭޓަރަކީ އުފައްދާ އެއްޗެއް ނޫން، އެސެމްބްލްކުރާ އެއްޗެއް: މުޣުނީ
ޖެނެރޭޓަރަށް ބޭނުންވާ އެކި ބައިތައް ގެންނަނީ އެކަންކަމަށް ޚާއްސަ ކުންފުނިތަކުން
ސްޓެލްކޯއިން އެސެމްބްލްކުރި އާމޮޑެލްގެ ޖެނެރޭޓަރ
ސްޓެލްކޯއިން ވިއްކާ "ސްޓެވޯ" ބްރޭންޑުގެ ޖެނެރޭޓަރުތަކަކީ އެއަށް ބޭނުންވާ އެކި ބައިތައް ގެނެސް، އެސެމްބްލް ކޮށްގެން އަގުހެޔޮކޮށް ވިއްކާ ޖެނެރޭޓަރުތަކެއް ކަމަށް އެކުންފުނީގެ މެނޭޖިން ޑިރެކްޓަރ ހަސަން މުޣުނީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން މުޣުނީ ވިދާޅުވީ، އެކުންފުނީގެ "ސްޓެވޯ" ޖެނެރޭޓަރުތަކަކީ އެ ކުންފުނިން ހުރިހާ ބައެއް އުފައްދައިގެން ބާޒާރަށް ނެރޭ އެއްޗެއް ނޫން ކަމަށެވެ. ޖަނަރޭޓަރުގެ އެކި ބައިތައް އުފައްދަނީ އެކަންކަމަށް ޚާއްސަ ފަރާތްތަކުން ކަމަށާއި، ސްޓެލްކޯގެ މައިގަނޑު މަސައްކަތަކީ އެ ބައިތައް އެސެމްބްލްކޮށް ހެޔޮ އަގުގައި ބާޒާރަށް ނެރުން ކަމަށެވެ.
މުޣުނީ ވިދާޅުވީ، ތަހުޒީބުވި ޒަމާނާއެކު މިކަންކަން ކުރާ ގޮތްވެސް ބަދަލުވެފައިވާކަމަށެވެ. މިހާރު މިފަދަ ކަންކަން ކުރަނީ އެކި ތަންތަނުން އެކި ބައިތައް ހޯދައިގެން އެސެމްބްލްކޮށްގެން ކަމަށް މުޣުނީ ވިދާޅުވިއެވެ. މިސާލެއްގެ ގޮތުގައި މުޣުނީ ނެންގެވީ އެޕަލް ކުންފުންޏެވެ. އެކުންފުނިން އުފައްދާ އައިފޯނާއި މިނޫންވެސް ޕްރޮޑަކްޓުތަކަށް ބޭނުންވާ ބައިތައް އެހެން ކުންފުނިތަކުން ގަންނަ ކަމަށާއި، އަދި އެތަކެތި އެސެމްބްލްކޮށްގެން ބާޒާރަށް ނެރޭ ކަމަށް މުޣުނީ ވިދާޅުވިއެވެ. އަދި އެ އުފެއްދުމަކީ އެ ކުންފުނީގެ އަމިއްލަ އުފެއްދުމަކަށް ވާކަމަށް ވިދާޅުވިއެވެ.
މިއީ ތަހުޒީބީ ދުނިޔޭގައި މިކަން ކުރާ ގޮތް ކަމަށާއި، މިކަން މިގޮތަށް ކޮށްގެން ހެޔޮ އަގުގައި ރަނގަޅު އުފެއްދުންތައް ބާޒާރަށް ނެރެވޭކަމަށާއި، އަދި އުފައްދަން ދާ ޚަރަދުވެސް އެތައް ތަނަކުން ކުޑަވެގެންދާކަމަށް މުޣުނީ ވިދާޅުވިއެވެ.
ސްޓެލްކޯގެ ވޯކްޝޮޕުން އެސެމްބަލް ކުރާ ޖެނެރޭޓަރު ސެޓުތަކަށް އޯޑަރު ދިނުމުގެ ފުރުސަތު ހުޅުވާލާފައިވާ އިރު، ކޮންމެ ޖެނެރޭޓަރު ސެޓަކަަށް ވެސް ލޯކަލް ވޮރަންޓީއާއި އާފްޓަރ ސޭލްސް ސަރވިސްގެ އިތުރުން، ކަސްޓަަމަރުން ބޭނުންވެއްޖެ ހިނދެއްގައި، އިންސްޓޯލް ކޮށްދިނުމުގެ ޚިދުމަތް ވެސް ފޯރުކޮށްދޭނެ ކަމަށެވެ.
ސްޓެލްކޯއިން، ހަކަތަ އުފައްދާ ސިސްޓަމްތަކުގެ ސިނާއަތަށް ނުކުމެ، ސްޓެވޯ ވޯކްޝޮޕް އިފްތިތާހުކޮށްފައިވާއިރު، އެތަނުން ޕަވަރ ސިސްޓަމް ޑިޒައިން ކުރުމާއި، ޕަވަރ ޖަނަރޭޓަރު ސަރވިސަސް އަދި ޖެނެރޭޓަރ އެސެމްބްލިންގގެ ޚިދުމަތުގެ އިތުރުން، ޖެނެރޭޓަރ ސަރވިސަސްގެ ޚިދުމަތް ވެސް ލިބެއެވެ.
އޭގެ އިތުރުން އާރް.އޯ ފްލާންޓް އެސެމްބަލްކުރުމުގެ ޚިދުމަތާއި، އަލްޓްރާސޮނިކް ކްލީނިންގ ޚިދުމަތާއި، އޯލްޓަރނޭޓަރ އެންޑް މޮޓޯ ސަރވިސަސްގެ ޚިދުމަތް ވެސް އެ ވޯކްޝޮޕުން ފޯރުކޮށްދެއެވެ.
