މުޣުނީ އެންވަޔަރމަންޓް މިނިސްޓްރީގެ ސްޓޭޓް މިނިސްޓަރަކަށް
މުޣުނީ އެންވަޔަރމަންޓް މިނިސްޓްރީގެ ސްޓޭޓް މިނިސްޓަރަކަށް އައްޔަނު ކުރައްވާފައިވަނީ ބުދަ ދުވަހު
ސްޓެލްކޯގެ ކުރީގެ މެނޭޖިންގް ޑިރެކްޓަރު ހަސަން މުޣުނީ
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް، މިނިސްޓަރ އޮފް ސްޓޭޓް ފޮރ އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ސްޓޭޓް މިނިސްޓަރުގެ މަޤާމަށް ސްޓެލްކޯގެ ކުރީގެ މެނޭޖިންގ ޑިރެކްޓަރު ޙަސަން މުޣުނީ އައްޔަނު ކުރައްވައިފިއެވެ.
މުޣުނީ ސްޓެލްކޯގެ މެނޭޖިންގ ޑިރެކްޓަރުކަމުގެ މަޤާމުން ދުރު ކުރައްވައި، އެ މަޤާމަށް އައްޔަނު ކުރައްވާފައިވަނީ އިލެކްޝަންސް ކޮމިޝަންގެ ކުރީގެ ރައީސް އަހުމަދު ޝަރީފްއެވެ.
ރައީސުލްޖުމްހޫރިއްޔާގެ އޮފީހުން މައުލޫމާތު ދެއްވި ގޮތުގައި މުޣުނީ އެންވަޔަރމަންޓް މިނިސްޓްރީގެ ސްޓޭޓް މިނިސްޓަރަކަށް އައްޔަނު ކުރައްވާފައިވަނީ ބުދަ ދުވަހުއެވެ.
ޙަސަން މުޣުނީ ވަނީ މެލޭޝިއާގެ ހެލްޕް ޔުނިވަރސިޓީން ބެޗެލަރ އޮފް ސައިންސް ހާޞިލްކުރައްވާ، އެމެރިކާގެ ބްރޭންޑައިސް އިންޓަރނޭޝަނަލް ބިޒްނަސް ސްކޫލުން މާސްޓަރ އޮފް ބިޒްނަސް އެޑްމިނިސްޓްރޭޝަން ފުރިހަމަކުރައްވާފައެވެ.
ހަސަން މުޢިނީ ފާއިތުވެދިޔަ ތިން އަހަރު ކޮށްދެއްވާފައިވާ ޚިދުމަތްތަކަށް އެ ކުންފުނީގެ ބޯޑު މެމްބަރުންނާއި މެނޭޖްމަންޓާއި އެންމެހާ މުވައްޒަފުންގެ ނަމުގައި ކުންފުނިންވެސް ވަނީ ޝުކުރު އަދާކޮށްފައެވެ.
ކުންފުނިތަކުގެ މެނޭޖިންގ ޑިރެކްޓަރުން ބަދަލުކުރަން ސަރުކާރުން ނިންމާފައިވާ ކަމުގެ އަޑުތައް ގަދަވެފައިވާއިރު، މި ބަދަލުތައް ގެނައުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް ހުށައަޅާފައިވާކަމަށް ވަނީ މައުލޫމާތު ލިބިފައެވެ.
ސަރުކާރު ހިއްސާވާ ކުންފުނިތަކުގެ މެނޭޖިން ޑިރެކްޓަރުން ބަދަލުކުރަން ބޮޑެތި ނިންމުންތަކެއް ސަރުކާރުން ނިންމައިފައިވާ ކަމަށް އަޑުތައް ފެތުރުނަމަވެސް، ސަރުކާރުން އަދި މިކަން ރަސްމީކޮށް ކަށަވަރު ކޮށްދީފައެއް ނުވެއެވެ. އަދި މިފަދަ ބޮޑު ބަދަލެއް ގެންނަން ނިންމާފައިވާ ސަބަބެއް ވެސް ހާމަކޮށްފައެއްނުވެއެވެ.
