ޕެރޯލްގެ ދަށުން މަސައްކަތަށް ނުކުންނަ މީހުންނަށް ފުރުސަތު ދޭނަން - މުޣުނީ
18 އޯގަސްޓު 2021 | ބުދަ 08:45ބޭނުމަކީ އަނބުރާ މުޖުތަމައަށް ނުކުންނައިރު އެފަރާތްތަކަކީ، މުޖުތަމައުގެ ވަޒީފާގެ މާހައުލަށް ތައްޔާރުވެފައި ތިބި ބަޔަކަށް ހެދުން
ހަސަން މުޣުނީ - ސްޓެލްކޯގެ މެނޭޖިންގ ޑިރެކްޓަރ
ޕެރޯލްގެ ދަށުން މަސައްކަތަށް ނުކުންނަ މީހުންނަށް ފުރުސަތު ދޭނެ ކަމަށް ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މުޣުނީ ވިދާޅުވީ ޕެރޯލްގެ ދަށުން މަސައްކަތަށް ނުކުންނަ ގައިދީންނަށް ސްޓެލްކޯގެ އެކި މަސައްކަތްތައްކުރުމަށް ފުރުސަތު ދިނުމުގެ ބޭނުމަކީ އަނބުރާ މުޖުތަމައަށް ނުކުންނައިރު އެފަރާތްތަކަކީ، މުޖުތަމައުގެ ވަޒީފާގެ މާހައުލަށް ތައްޔާރުވެފައި ތިބި ބަޔަކަށް ހެއްދެވުން ކަމުގައެވެ.
ސްޓެލްކޯއިން މިފަދަ ފުރުސަތެއް ހުޅުވާލުމުގެ މައިގަނޑު އަމާޒަކީ ވަގުތީގޮތުން މަސައްކަތް ބޭނުންވެފައިވާ ޒުވާނުންނަށް މަސައްކަތް ހޯދައިދީ، އާމްދަނީ ލިބޭނެ މަގުފަހިކޮށްދިނުން ކަމަށެވެ. އެކި ސަބަބުތަކާހުރެ ވަޒީފާއެއް ނުލިބި ތިބި ޒުވާނުންނަށް މިއީ އާމްދަނީ ހޯދުމަށް ރަނގަޅު ފުރުސަތެއްކަމަށް މުޣުނީ ވިދާޅުވިއެވެ. މުޣުނީ ވިދާޅުވީ، ހުޅުވާލެވިފައިވާ މި ފުރުސަތުގެ ތެރެއިން ރަނގަޅު މީހުންނާއެކު އެހެން މަސައްކަތްތައް ވެސް ކުރިއަށް ގެންދިޔުމަށް ނިންމަވާފައިވާ ކަމަށެވެ.
ސްޓެލްކޯއަކީ އާއްމު ރައްޔިތުންނަށް އެކި ގޮތްގޮތުން ޚިދުމަތްދޭ ކުންފުންޏަކަށް ހެދުން އެއީ ކުންފުނީގެ އަމާޒެއް ކަމަށް ވިދާޅުވިއެވެ.
މުޣުނީ ވިދާޅުވީ ކޮންޓްރެކްޓް މަސައްކަތްތައް ވެސް ސްޓެލްކޯއިން އަމާޒުކުރަނީ ވަކިން ހާއްސަކޮށް ދިވެހި ޒުވާނުންނަށް ކަމަށެވެ. އޭނާ ވިދާޅުވީ އެގޮތަށް ހަދަން ވިސްނީ ކޮވިޑް-19ގެ ތެރޭގައި ވަރަށް ގިނަ މީހުންގެ ވަޒީފާ ގެއްލި، އިޤްތިޞާދީ ގިނަ މަސައްކަތްތަކަކަށް ބުރޫ އަރާފައިވާތީ މި ދަނޑިވަޅުގައި މަސައްކަތް ނުކޮށް ތިބި ޒުވާނުންނަށް އަމާޒުކޮށްގެން ކަމަށެވެ.
އޭނާ ވިދާޅުވީ މީގެ ކުރިން އެކަހަލަ މަސައްކަތްތައް ނަގަނީ ކޮންޓްރެކްޓް ގްރޫޕްތަކުން ކަމަށާއި، ދެން އެ ގްރޫޕަކުން މަސައްކަތް ހަވާލުކުރާނީ ކޮންމެ ވެސް ބޭރު ބަޔަކަށް ކަމަށެވެ. ސްޓެލްކޯއިން ބޭނުންވަނީ އެ އާދަ ކަނޑުވާލައި އެ ފައިސާ ވެސް ދިވެހިންގެ ތެރޭގައި ރޯލްކުރުމަށް ކަމަށް މުޣުނީ ވިދާޅުވިއެވެ.
