ސްޓެލްކޯގެ ދުންހޮޅިތައް އުސްކޮށް ޖަނަރޭޓަރުތައް ސައުންޑް ޕްރޫފްކުރުމަށް މަޖިލީހުން ފާސްކޮށްފި
އިއާދަކުރަނިވި ހަކަތަ އިތުރުކުރުމަށް ސްޓެލްކޯގައި ދެންނެވުން
ސްޓެލްކޯގެ ޖަނަރޭޓަރ
ސްޓެލްކޯގެ އިންޖީނުތަކުގެ ސަބަބުން ވާ އުނދަގޫތަކަށް ދާއިމީ ހައްލެއް ހޯދުމަށް އެ އިންޖީނުތައް ސައުންޑް ޕްރޫފްކޮށް، ދުންހޮޅިތައް އުސްކުރަން އެންގުމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީ އާއި އެންވަޔަރުމެންޓް އެންޑް ކްލައިމެޓް ޗޭންޖް ކޮމިޓީގެ ޖޮއިންޓް ކޮމިޓީން ނިންމި ގޮތުގެ ރިޕޯޓް ފާސްކޮށްފިއެވެ.
ރިޕޯޓު ފާސްވީ ވޯޓުގައި ބައިވެރިވެވަޑައިގެންނެވި 35 މެމްބަރުންގެ އިއްތިފާގުންނެވެ.
ސްޓެލްކޯ ހުންނަ ސަރަައްދުގައި ދިރިއުޅޭ މީހުންނަށް އެ ކުންފުނީގެ އިންޖީނުތަކުގެ ސަބަބުން ވާ އުނދަގޫތަކަށް ދާއިމީ ހައްލެއް ހޯދުމަށް ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ހުށަހަޅުއްވާފައިވާ ގަރާރު ދިރާސާކޮށް، އެ ކަން ހައްލުކުރުމަށް މައިގަނޑު 8 ރެކޮމެންޑޭޝަނެއްވަނީ ރިޕޯޓުގައި ހިމަނާފައެވެ.
މިރިޕޯޓަށް ވާހަކަދެއްކެވި މެމްބަރުންވަނީ، އިއާދަކުރަނިވި ހަކަތަ އިތުރުކުރުމަށް ބާރުއެޅުމަށް މަސައްކަތްކުރަންޖެހޭ ކަމަށް ގޮވާލާފައެވެ. ކުންފުނިތަކުން މިކަން ކުރުމުގެ ބަދަލުގައި ގޭބީސީތަކުން މިކަން ކުރުމަށް ފުރުސަތު ފަހި ކޮށްދިނުމަށް ވެސް ވަނީ ގޮވާލާފައެވެ.
އެންވަޔަރުމެންޓް އެންޑް ކްލައިމެޓް ޗޭންޖް ކޮމިޓީގެ މުގައްރިރު އަދި ހޯރަފުށި ދާއިރާގެ މެމްބަރު އަހުމަދު ސަލީމް ވިދާޅުވީ، މިހާރުން މިހާރަށް ކުރެވޭނެ ކަންކަން އެބަހުރިކަމަށެވެ. އެގޮތުން ސްޓެލްކޯގެ ބޭނުމަށް މިހާރު ބަންދުކޮށްފައި ހުރި މަގުތައް މިހާރުން މިހާރަށް ހުުޅުވާލަން ޖެހޭ ކަމަށް ވިދާޅުވިއެވެ. ކޮމިޓީގެ މެމްބަރުން އެ ސަރަހައްދަށް ވަޑައިގެން ބެލި ބެލުމުން ވައިބްރޭޝަން ވަރަށް ބޮޑަށް ހުރިކަމާއި، ދުމާއެކު ތެލުގެ އަސަރު ކުރާކަން ފާހަގަކުރެވުނު ކަމަށް ވިދާޅުވިއެވެ. ޑިސަލް ޖަނެރޭޓަރުތައް ނިއްވާލުން އެއީ ކުރަންޖެހޭ ކަމެއް ކަމަށް ސަލީމް ވިދާޅުވިއެވެ.
ބޭނުން ނުކޮށް ހުރި ޖަނެރޭޓަރތައް ހުރި ތަންތަނުން ޖާގަ ހުސްކުރެވިދާނެ ކަންވެސް ފާހަގަކުރެއްވިއެވެ.
މި މައްސަލަ ހައްލުކޮށްދެއްވުމަށް އެދި ޖޫން މަހު މެންބަރު މީކާއިލް މަޖިލީހަށް ހުށަހެޅުއްވި ގަރާރުގައި ވިދާޅުވެފައި ވަނީ އިންޖީނުގެ އެހެން ތަނަކަށް ބަދަލުކުރުން އަވަސް ކުރުމަށާއި އެ މަސައްކަތް ނިމެންދެން ވަގުތީ ހައްލެއް ހޯއްދަވައިދެއްވުމަށެވެ.
