ބިން ހަވާލު ކުރެއްވީ މިނިސްޓަރ މުޢިއްޒު، ފެންސް ނެގީ މޭޔަރު މުޢިއްޒު - މުޣުނީ

މާލޭގެ އިންޑަސްޓްރިއަލް ވިލެޖުން ސްޓެލްކޯއަށް ބިން ދެއްވީ މިނިސްޓަރ ޑރ. މުޙައްމަދު މުޢިއްޒު ކަމަށާއި، އެ ބިމުގައި ޖަހާފައި ހުރި ފެންސް ނަގާ ބިން އަތުލަން މަސައްކަތް ކުރެއްވީ، މޭޔަރު މުޢިއްޒު ކަމަށް ސްޓެލްކޯގެ މެނޭޖިންގ ޑިރެކްޓަރ ޙަސަން މުޣުނީ ވިދާޅުވެއްޖެއެވެ.

ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން މުޣުނީ ވިދާޅުވީ، އިންޑަސްޓްރިއަލް ވިލެޖުން ސްޓެލްކޯއަށް ދީފައޮތް ބިމުގައި ޖަހާފައި ހުރި ފެންސްތައް ހަލާކުކޮށްލުމަކީ، ހައިރާން ކަމެއް ލިބުނުކަމެއް ކަމަށެވެ. ބަޔަކު މީހުން ގޮސް ފެންސް ޖަހާފައި ހުރި ތަނެއްގެ ފެންސް ނައްޓާލައި, ތަކެތި ގެންދިޔައީ ކަމަށާއި، ކަންކަން ކުރާނަމަ މަޝްވަރާގެ ރީތި އުސޫލު އެބައޮތް ކަމަށެވެ.

މުޣުނީ ވިދާޅުވީ، އެތަނަކީ ސްޓެލްކޯއިން ބޮޑު ޚަރަދެއް ކޮށްގެން ހަދާފައި އޮތްތަނެއް ކަމަށާއި, ތަން ހަދަން އެކަނިވެސް ބައި މިލިއަނެއްހާ ރުފިޔާ ޚަރަދު ކުރަން ޖެހުނުކަމަށެވެ.

މުޣުނީ ވިދާޅުވީ އެ ބިން ސިޓީ ކައުންސިލަށް ނުނެގޭނެ ކަމަށާއި، އަލަށް މަގާމާ ހަވާލު ވެވަޑައިގަތަސް ކުރެވޭނެ ކަންކަމާ ނުކުރެވޭނެ ކަންކަން މޭޔަރަށް އެނގިވަޑައިނުގަތީ ކަމަށެވެ. މިނިސްޓަރު މުޢިއްޒަށް އެކަން ވަރަށް ރަނގަޅަށް އެނގިވަޑައިގަންނަވާނެ ކަމަށެވެ. އަދި އެތަނުގައި ޖަހާފައިހުރި ފެންސް ގެންގޮސް ސިޓީ ކައުންސިލުން ބޭނުން ކުރި ކަމަށާއި، ފެންސެއް ބޭނުންވި ނަމަވެސް މަޝްވަރާ ކުރެވުނީސް ކަމަށެވެ. އެ ބިމަކީ މުހިއްމު ތަނެއްކަން ފާހަގަކުރައްވަމުން މުޣުނީ ވިދާޅުވީ، އެތަނަކީ ތިލަފުށީ ފަޅިން އިންޓަރ ކަނެކްޝަން ކޭބަލްތައް އަންނަން އޮތް ތަން ކަމަށެވެ.

އަދި އެތަނުގައި ހަރުކޮށްފައި ހުރި ކެމެރާ ސިސްޓަމާއި، ސްޓޯރޭޖްގެ ގޮތުގައި ހުރި ތަކެތިވެސް ގެއްލިފައިވާ ކަމަށާއި، މިހާރު ފުލުހުން މައްސަލަ ބަލަމުންދާކަމަށެވެ. މި ލިބުނު ގެއްލުން އަންދާޒާ ކުރެވޭނީ މައްސަލަ ނިމުމުން ކަމަށް މުޣުނީ ވިދާޅުވިއެވެ.