އީރާނުގައި ހަމަނުޖެހުން ބޮޑުވެ، ހަ ފުލުހަކު މަރުވެއްޖެ

އީރާނުގެ އެކި ހިސާބުތަކުގައި ހަމަނުޖެހުން ބޮޑުވެ، ހަފްތާއެއްގެ ތެރޭ ހަ ފުލުހަކު މަރުވެއްޖެ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން އީރާނުގެ ހުޅަނގު ދެކުނު ހުޒެސްތާން ޕްރޮވިންސްގައި ހަތިޔާރުއެޅި ބަޔަކާ ދެކޮޅަށް ހިންގި އޮޕަރޭޝަނެއްގައި ހުކުރު ދުވަހު އެގައުމުގެ ފުލުހުންގެ ކެޕްޓަނެއްވެސް ވަނީ މަރުވެފައެވެ.

އޭގެ ކުރިން ބުރާސްފަތި ދުވަހު އީރާނުގެ މެދެތެރޭގައި އޮންނަ އިސްފަހާން ޕްރޮވިންސްގައި ހަތިޔާރުއެޅި ގްރޫޕަކާ ދެކޮޅަށް ހިންގި އޮޕަރޭޝަނެއްގައި ވެސް ފުލުހަކަށް އަނިޔާވެ ފަރުވާދެމުން ދަނިކޮށް ވަނީ މަރުވެފައެވެ.

އޭގެ އިތުރުން އީރާނުގެ އިރުދެކުނު ބަލޮޗިސްތާން ޕްރޮވިންސްގައި ވަގަށް އެތެރެކޮށްފައިވާ ތެޔޮ އުފުލަން އުޅުނު އުޅަނދަކުން ބުދަ ދުވަހު ވަނީ ފުލުހެއްގެ ގަޔަށް ބަޑި ޖަހާ މަރާލައިފައެވެ. ރިޕޯޓްތައް ބުނާ ގޮތުން ޕާކިސްތާނު ބޯޑަރު ކައިރީ އޮންނަ ބަލިޗިސްތާން ޕްރޮވިންސްއަކީ ވަރަށް ގިނައިން ހަނގުރާމަވެރިންނާ ފުލުހުންނާ ކުރިމަތިލުންތައް ހިނގާ ސަރަހައްދެކެވެ.

ފުލުހުންގެ އިސް އޮފިސަރަކު ނަން ނުޖެހުމަށް ޝަރުތުކޮށް ބުނީ ބަލޮޗިސްތާން ޕްރޮވިންސްގައި ހިނގި ހަމަނުޖެހުމުގައި ތިން ފުލުހަކު ނިޔާވެފައިވާ ކަމަށެވެ. އަދި ހަމަލާ ބަދަލުކުރުން ގާތްގަނޑަކަށް 24 ގަޑިއިރަށް ކުރިޔަށް ދިޔަކަމަށެވެ، އަދި މި ހަމަލާ ބަދަލުކުރުމުގައި އެ ސަރަހައްދުގައި ހަރަކާތްތެރިވާ ގޭންގުގެ ދެ މެ މެމްބަރަކުވެސް މަރުވެފައިވާ ކަމަށްވެއެވެ.