ނައިބު ރައީސް ނެއްލައިދޫ ކައުންސިލާ ބައްދަލުކުރައްވައިފި

ރައީސުލް ޖުމްހޫރިއްޔާގެ ނައިބު ފައިސަލް ނަސީލް ތިލަދުން މައްޗަށް މިހާރު ކުރައްވަމުން ގެންދަވާ ދަތުރުފުޅުގެ ތެރޭން، ހދ. ނެއްލައިދޫ ކައުންސިލާ ބައްދަލުކުރައްވައިފިއެވެ.

ނެއްލައިދޫ ސްކޫލްގައި ބޭއްވުނު މި ބައްދަލުވުމުގައި ކައުންސިލުން ވަނީ، ރަށަށް ދިމާވެފައިވާ ދަތިތައް ހިއްސާ ކުރައްވާފައެވެ. އެގޮތުން ކައުންސިލުން ވަނީ ރަށަށް ދިމާވެފައިވާ އެންމެ ބޮޑު ދަތިކަމަކީ ބިމުގެ ދަތިކަން ކަމަށް ފާހަގަ ކުރައްވާފައެވެ. މީގެ އިތުރުން ރަށުގެ އިގުތިސާދު ކުރިއެރުވުމަށް ކުރެވިދާނެ ކަންތައްތަކާ ގުޅޭގޮތުން ވަނީ މަޝްވަރާ ކުރައްވާފައިވާ ކަމަށް ނެއްލައިދޫ ކައުންސިލުން މައުލޫމާތުދެއެވެ.

މި ބައްދަލުވުމުގެ ނެއްލައިދޫ ސިއްހީ މަރުކަޒުން ވަނީ، އެތަނުގެ ޖާގައިގެ ދަތިކަން ވަރަށް ބޮޑަށް ކުރިމަތިވެފައިވާ ކަމަށް ނައިބު ރައީސަށް ދަންނަވާފައެވެ. އަދި އެތަނުގެ ޚިދުމަތްތައް އިތުރަށް ފުޅާކޮށް ތަރައްގީކުރުމަށް އިތުރު ވަސީލަތްތައް ބޭނުންވާ ކަމަށާއި، އެކަމަށް ސަރުކާރުން އެހީތެރިވުމަށް ވަނީ އެދިވަޑައިގެންފައެވެ.

ނެއްލައިދޫ ކައުސިލުންނާއި ސިއްހީ މަރުކަޒުން ފާހަަގަކުރެއްވި ކަންކަމަށް އަލި އަޅުވާލައްވަމުން ނައިބު ރައީސް ވިދާޅުވީ، މިފަދަ ބައްދަލުވުންތައް ބޭއްވުމުގެ އެންމެ ބޮޑު މަގުސަދަކީ ސަރުކާރާ ރައްޔިތުންނާ އޮތް ގުޅުން ބަދަހިކުރުމުގެ އިތުރުން، ރައްޔިތުން ބޭނުންވާ ގޮތަށް ރައްޔިތުންގެ ކަންކަން ކޮށްދިނުމަށް މަގު ފަހިކޮށްދިނުން ކަމަށެވެ.

އެގޮތުން އެމަނިކުފާނު ވަނީ، މިސަރަހައްދުގައި ކުރިއަށް ގެންދާ ބޮޑެތި މަޝްރޫއުތަކުގެ ތެރެއިން ކުޅުދުއްފުށި ރީޖަނަލް ހޮސްޕިޓަލުގެ ޚިދުމަތްތައް ޓާޝަރީ ފެންވަރަށް މަތި ކުރުމަށް ކުރާ މަސައްކަތަކީ، ތިލަދުންމަތީގެ ރައްޔިތުންނަށް ލިބިގެންދާނެ ފަސޭހައެއްކަން ފާހަގަ ކުރައްވާފައެވެ.

އަދި މި ސަރަހައްދުގެ ހައި ސްޕީޑް ފެރީ ނެޓްވޯކްގެ މަސައްކަތަކީ މުޅިސަރަހަދުގެ ރައްޔިތުންނަށް އޭގެ ލުއިފަސޭހަކަން ލިބިގެންދާނެ ކަންތައްތައް ކަމުގައި އެމަނިކުފާނު ފާހަގަކުރެއްވިއެވެ. މީގެ އިތުރުން ނައިބު ރައީސް ވަނީ، ތަރައްގީއާއި ރަށަށް ހެޔޮގޮތްތައް ހޯދުމުގެ ވިސްނުން އަބަދުވެސް އިސްކުރުމަށް މި ބައްދަލުކުރެއްވުމުގެ ބައިވެރިންގެ ކިބައިން އެދިވަޑައިގަންނަވާފައެވެ.

މި ޒިޔާރަތުގައި އެމަނިކުފާނު ވަނީ ނެއްލައިދޫ ސްކޫލްގައި އަލަށް އިމާރާތް ކުރަމުންދާ 2 ކްލާސް ރޫމް ބައްލަވާލެއްވުމުގެ އިތުރުން، ނެއްލައިދޫ ސިއްހީ މަރުކަޒަށް ޒިޔާރަތް ކުރައްވައި އެތަނުގެ ހާލަތުވެސް ބައްލަވާލައްވާފައެވެ.

މި ފުރުސަތުގައި ނެއްލައިދޫ ކައުންސިލުން ވަނީ، ސަރުކާރުން ނެއްލައިދޫގެ ތަރައްގީއަށް ކުރައްވަމުންދާ މަސައްކަތްތައް ފާހަގަކޮށް އެކަމަށްޓަކައި ވަރަށް ޚާއްސަ ޝުކުރެއް ދަންނަވާފައެވެ.