ކޮވިޑްގެ ހާލަތުގައި އެންމެ ބޮޑު އާމްދަނީއެއް ހޯދައިދިނީ މަސްވެރިން: ސަރުކާރު
ފާއިތުވި ދެ އަހަރު ރެކޯޑު އަދަދަކަށް މަސް ކިރާފައިވޭ
ހޯރަފުށީ މަސް ދޯންޏެއް
މިދިޔަ ދެ އަހަރު މިފްކޯއިން ރެކޯޑު އަދަދަކަށް މަސް ކިރައިފިއެވެ.
މި ސަރުކާރަށް ތިން އަހަރު ފުރުމާއި ގުޅިގެން ދިވެހި ސަރުކާރުން އާންމުކޮށްފައިވާ މައުލޫމާތުގައިވާގޮތުން 2019 އަދި 2020 ވަނަ އަހަރު މިފްކޯއިން ވަނީ ރެކޯޑު އަދަދަކަށް މަސް ކިރާފައެވެ. އެގޮތުން 2019 ވަނަ އަހަރު 48،495 ޓަނުގެ މަސް މިފްކޯއިން ކިރާފައިވެއެވެ. އަދި 2020 ވަނަ އަހަރު 49،392 ޓަނުގެ މަސް ކިރާފައެވެ. އޭގެ ކުރީ އަހަރުތަކުގައި 2017 ވަނަ އަހަރު މިފްކޯއަށް ކިރާފައިވަނީ 44،746 ޓަނުގެ މަހެވެ. އަދި 2018 ވަނަ އަހަރު 42،294 ޓަނުގެ މަސް މިފްކޯއަށް ކިރާފައިވެއެވެ.
2019 ވަނަ އަހަރު އަދި 2020 ވަނަ އަހަރު ކޮވިޑް-19 ގެ އެންމެ ދަތި ހާލަތާ ކުރިމަތިލާންޖެހުނުއިރު ރާއްޖެއަށް އެންމެ ބޮޑު އާމްދަނީއެއް ވައްދައިދީފައިވަނީ މަސްވެރިކަމުގެ ސިނާއަތުން ކަމަށް ސަރުކާރުން ހާމަކޮށްފައިވެއެވެ. މިއަހަރުގެ މިހާތަނަށް ރާއްޖެއިން މަސް އެކްސްޕޯޓުކޮށްފައިވާ މިންވަރަށް ބަލާއިރު، މިއަހަރުގެ އޮކްޓޫބަރު މަހުގެ ނިޔަލަށް 43،014 ޓަނުގެ މަސް އެކްސްޕޯޓުކޮށްފައިވާކަމަށް ސަރުކާރުން ހާމަކޮށްފައިވެއެވެ. މިކަމާއި ގުޅިގެން ރާއްޖެ އެމްވީއަށް މައުލޫމާތު ދެއްވަމުން މިފްކޯގެ މެނޭޖިން ޑިރެކްޓަރ އިސްމާއިލް ފައުޒީ ވިދާޅުވީ މި ދުވަސްވަރަކީ މޫސުން ގޯސް، ކަނޑު ގަދަ ދުވަސްވަރަކަށް ވުމާއެކު މިއަހަރުގެ ނިމުމުގެ ކުރިން އެކްސްޕޯޓުކުރެވޭނެ މިންވަރު އަންދާޒާކުރަން ދަތި ކަމަށެވެ.
މަސްވެރިކަމުގެ ސިނާއަތް އިތުރަށް ކުރިއަރުވައި މަސްވެރިން ބާނާ މަހަށް ހަމަ އަގު ހޯދައިދިނުމަށް ސަރުކާރުން ގެންދަނީ ގިނަ މަސައްކަތްތަކެއް ކުރަމުންނެވެ. މިގޮތުން ސަރުކާރުން ގެންދަނީ މިފްކޯ ތަރައްގީކުރުމަށް ގިނަ މަސައްކަތްތަކެއް ކުރަމުންނެވެ. މި ކުރިއެރުންތަކާއެކު މަސްވެރިން ބާނާ މަހަށް ހަމަ އަގު ލިބިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު މީގެ ކުރިން ވިދާޅުވެފައިވެއެވެ. މިގޮތުން މިފްކޯގެ ކެޕޭސިޓީ އިތުރުކުރުމަށް ކުރަމުންދާ މަސައްކަތްތައް ރައީސް ފާހަގަކުރައްވާފައިވެއެވެ. އަދި މަހަށް ހަމަ އަގު ހޯދައިދިނުމަށް މަސް ގަންނަ އަމިއްލަ ފަރާތްތަކާ މަޝްވަރާކުރައްވާނެ ކަމަށް ރައީސް ވިދާޅުވެފައިވެއެވެ. އަދި މި ކަންކަމުގެ ސަބަބުން ހަމަ އަގުގައި މަސް ވިއްކި މަސްވެރިންނަށް ކުރާ ފައިދާ އިތުރުވެގެންދާނެ ކަމަށް ރައީސް ސާލިހު ވިދާޅުވިއެވެ.
މިފްކޯއަށް ގެންނަ ތަރައްގީއާއި ގުޅޭގޮތުން ރާއްޖެއެމްވީއަށް މައުލޫމާތުދެއްވަމުން މިފްކޯގެ ޕްރޮޖެކްޓް މެނޭޖަރ މުޙައްމަދު ޝަމީމް ވިދާޅުވީ ފެލިވަރު ފިޝަރީޒް ކޮމްޕްލެކްސްގައި 100 ޓަނުގެ ކަނޑުމަސް 8 ގަޑިއިރުގެ ޝިފްޓުގައި ގަނޑުކުރެވޭ އައު ކޮމްޕްލެކްސްއެއް ޤާއިމް ކުރުމާއި، ލޮނުފެން ގަނޑުކޮށް 80 ޓަނުގެ ކަނޑުމަސް ބެހެއްޓޭނެ ހޯލްޑިން ޓޭންކް ޤާއިމް ކުރުމާއި، 4000 ޓަނުގެ ކޯލްޑް ސްޓޯރޭޖް އަދި އައު ޕަވަރހައުސްއެއް ގާއިމްކުރެވިގެންދާނެ ކަމަށެވެ. މީގެ އިތުރުން ފެލިވަރު ފިޝަރީޒް ކޮމްޕްލެކްސްގައި, މަސްދަޅު އުފައްދާ އިތުރު ފެކްޓަރީއަކާއި، ދުވާލެއްގެ މައްޗަށް 100 ޓަނުގެ ކަނޑުމަސް ޕްރޮސެސްކޮށް, ދަޅުމަހާއި ކައްކާ ގަނޑުކުރެވިފައިވާ މަސްބުރި އަދި ޕައުޗް ފަދަ އެތައް ޕްރޮޑަކްޓް އުފެއްދޭ ފެސިލިޓީއެއްގެ އިތުރުން، ދުވާލެއްގެ މައްޗަށް 40 ޓަނުގެ 'ފިޝްމީލް' އުފެއްދޭ ޕްލާންޓްއަކާއި، ދުވާލެއްގެ މައްޗަށް 50 ޓަނުގެ އައިސް އުފެއްދޭ ޕްލާންޓެއްގެ އިތުރުން 100 ޓަނުގެ އައިސް ސްޓޯރޭޖް ކެޕޭސިޓީއެއް ޤާއިމް ކުރެވޭނެއެވެ.
ގެމަނަފުށީގައި ދުވާލެއްގެމައްޗަށް 50 ޓަނުގެ އައިސް އުފައްދާ ޕްލާންޓެއް ޤާއިމްކުރުމުގެ އިތުރުން 8-10 ޝިޕިން ކޮންޓެއިނަރު ޓްރާންސްޕޯޓް ކުރެވޭ ލޭންޑިން ކްރާފްޓެއް ވެސް ޤާއިމް ކުރެވޭނެއެވެ. މީގެ ސަބަބުން ދިވެހިރާއްޖޭގެ ދެކުނުގެ ސަރަހައްދުގެ މަސްވެރިންނަށް ވަރަށް ބޮޑު އެހީތެރިކަމެއް ލިބިގެންދާނެ ކަމަށް ޝަމީމް ވިދާޅުވިއެވެ.
މީގެ އިތުރުން މިފްކޯގެ އަމިއްލަ ކެރިއަރެއް ޚިދުމަތަށް ނެރުމާ ގުޅޭގޮތުން މިފްކޯގެ މެނޭޖިން ޑިރެކްޓަރ އިސްމާއިލް ފައުޒީ ވަނީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވާފައެވެ. މިފްކޯގެ އަމިއްލަ ކެރިއަރެއް އޮތްނަމަ މަސް އުފުލުމަށް ވެސް ލުއިތަކެއް ލިބިގެންދާނެ ކަމަށް ފައުޒީ ވިދާޅުވިއެވެ. މިހާރު ހުރި ދަތިތަކާއެކުވެސް މި މަސައްކަތަކީ ފަސޭހައިން ކުރެވޭނެ މަސައްކަތަކަށް ހެދުމަކީ އުންމީދެއް ކަމަށް ފައުޒީ ވިދާޅުވިއެވެ. މީގެ ސަބަބުން އެއްތަނުން އަނެއް ތަނަށް މަސް އުފުލުމަށް ފަސޭހަވެ، ބޭރު ގައުމުތަކަށް މަސް އެކްސްޕޯޓުކުރަން ވެސް ފަސޭހަވާނެ ކަމަށް ފައުޒީ ވަނީ ވިދާޅުވެފައެވެ.
މިފްކޯއިން އިތުރު ބޯޓެއް ގަނެފައިވާކަން ފާހަގަކުރައްވައި ފައުޒީ ވިދާޅުވީ އެ ބޯޓަކީ ބްރައިން ފްރީޒަރ ވެސެލްއެއް ކަމަށެވެ. މި ބޯޓުގައި 370 ޓަނު ނުވަތަ 400 ޓަނުގެ މަސް ގަނޑުކުރެވޭނެ ކަމަށް ފައުޒީ ވިދާޅުވިއެވެ. ފައުޒީ ވިދާޅުވީ މިވަގުތު ފެލިވަރު ބަނދަރުގައި ބްރައިން ފްރީޒިން ބޯޓެއް އޮތް ނަމަވެސް އޭގައި ބޭނުންވާ ވަރަށް ޖާގަ ނެތި، އޭގެ ހާލަތުވެސް ވަރަށް ދަށަށް ގޮސްފައިވާ ކަމަށެވެ.
މި ތަރައްގީތައް ގެނެވުމާއެކު މި ސިނާއަތް އިތުރަށް ތަރައްގީވެ، މަސްވެރިން ބާނާ މަހަށް ހަމައަގު ލިބިގެންދާނެ ކަމަށް ސަރުކާރުން ބުނެއެވެ.
