ޖަލުތަކުގައި ޑްރަގް ރިހެބިލިޓޭޝަން ޕްރޮގްރާމެއް ފަށަނީ!
މިއީ އެއް އަހަރުދުވަހުގެ މުއްދަތަކަށް ވެވުނު އެއްބަސްވުމެއް
މޯލްޑިވްސް ކަރެކްޝަނަލް ސަރވިސް
މަސްތުވާތަކެތީގެ މައްސަލަތަކުގައި ހުކުމް ކޮށްފައިވާ ގައިދީންނަށް ޚާއްސަކޮށްގެން، ޖަލުގައި ޑްރަގް ރިހެބިލިޓޭޝަން ޕްރޮގްރާމެއް ހިންގުމާ ގުޅޭގޮތުން މޯލްޑިވްސް ކަރެކްޝަނަލް ސަރވިސްއާއި ނޭޝަނަލް ޑްރަގް އެޖެންސީއާ ދެމެދު އެއްބަސްވުމެއްގައި ސޮއިކޮށްފިއެވެ.
މޯލްޑިވްސް ކަރެކްޝަނަލް ސަރވިސްއާއި ނޭޝަނަލް ޑްރަގް އެޖެންސީން އިއްޔެ މި އެއްބަސްވުމުގައި ސޮއިކޮށްފައިވާއިރު، ކަރެކްޝަންސްގެ ފަރާތުން ސޮއިކުރެއްވީ ކޮމިޝަނަރ އޮފް ޕްރިޒަންސް އަހްމަދު މުހަންމަދުފުޅެވެ. އެން.ޑީ.އޭގެ ފަރާތުން ސޮއިކުރެއްވީ އެކްޓިންގ ސީއީއޯ މުހަންމަދު ރަމީޒެވެ.
މި ރަސްމިއްޔާތުގައި މިނިސްޓަރ އޮފް ހެލްތް އަހްމަދު ނަސީމާއި މިނިސްޓަރ އޮފް ހޯމް އެފެއަރޒް އިމްރާން އަބްދުﷲ ބައިވެރިވެވަޑަގަތެވެ.
އެއް އަހަރު ދުވަހު މުއްދަތަކަށް ސޮއިކުރެވުނު މި އެއްބަސްވުމުގެ ދަށުން، ޖަލުގައި ތިބި ގައިދީންނަށް ރިހެބިލިޓޭޝަން ޕްރޮގްރާމްތައް ހިންގާނީ އެކަމަށް ޚާއްސަކުރެވިގެން ތަމްރީނުކުރެވޭ، މޯލްޑިވްސް ކަރެކްޝަނަލް ސަރވިސްގެ ޑޮކްޓަރުންނާއި، ނަރުހުންނާއި، ކައުންސިލަރުންނާއި، ކޭސްވޯރކަރުންނާއި އަދި ޕްރިޒަން އޮފިސަރުންނެވެ.
މީގެ އިތުރުން އިން-ހައުސް ނުވަތަ ރެސިޑެންޝަލް ޕްރޮގްރާމް ފުރިހަމަކުރުމަށްފަހު، ބައިވެރިންނަށް ބޭނުންވާނެ އާފްޓަރ ކެއަރ ޕްރޮގްރާމާއި، ޕްރޮގްރާމްގެ ސަސްޓައިނަބިލިޓީ ކަށަވަރުކުރުމަށްޓަކައި، ޑޭޓާ އެއްކުރާނެއެވެ. އަދި އެ ޑޭޓާގެ މައްޗައް ބިނާކޮށް ޕްރޮގްރާމް އިތުރަށް ފުރިހަމަކުރުމަށް ބޭނުންވާނެ ބަދަލު ގެނައުމަށްވެސް މި އެއްބަސްވުމުގެ ދަށުން ބާރުއަޅާނެއެވެ.
