މިލަންދޫގައި ކުރިއަށް ގެންދިޔަ ކަސްރަތު ޕްރޮގްރާމް ނިންމާލައިފި

ށ. މިލަންދޫ ފުލުހުންނާއި, އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި, ކައުންސިލް ގުޅިގެން އެރަށުގައި ކުރިއަށް ގެންދިޔަ ކަސްރަތު ޕްރޮގްރާމް ނިންމާލައިފިއެވެ.

މިކަމަށްޓަކައި ރޭ ބޭއްވި ރަސްމިއްޔާތު ޝަރަފުވެރި ކޮށްދެއްވީ މިލަންދޫ ޕޮލިސް ސްޓޭޝަންގެ ސަބް އިންސްޕެކްޓަރ އަހުމަދު ސަލީމެވެ.

މިޕްރޮގްރާމާ ބެހޭގޮތުން އެރަށުގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ރައީސާ އާއިޝަތު ހަނިއްޔާ ވިދާޅުވީ، މިފަދަ ޕްރޮގްރާމެއް ކުރިއަށް ގެންދިއުމުގެ އެންމެ ބޮޑު މަގުސަދަކީ ދުޅަހެޔޮ ސިއްހަތެއްގައި ހުރުމަށް އެހީތެރިވުން ކަމަށެވެ.

އެގޮތުން މި ނޮވެމްބަރ މަހުގެ 2 ވަނަ ދުވަހު ފަށާފައިވާ މި ޕްރޮގްރާމް ކުރިއަށް ގެންގޮސްފައިވަނީ މި މަހުގެ 17 ވަނަ ދުވަހާ ހަމައަށެވެ. ހުރިހާ އުމުރު ފުރައަކަށް އަމާޒު ކޮށްގެން ކުރިއަށް ގެންގޮސްފައިވާ މި ޕްރޮގްރާމަކީ އަންހެނުންނަށް ޚާއްސަ ކޮށްގެން ކުރިއަށް ގެންދިޔަ ޕްރޮގްރާމެއް ކަމަށް ހަނިއްޔާ ވިދާޅުވިއެވެ.

މީގެއިތުރުން މި ޕްރޮގްރާމްގައި ވަނީ، އެންމެ ބޮޑަށް ބަރުދަން ލުއި ކުރެވުނު 5 ފަރާތެއް ފާހަގަ ކޮށްފައެވެ. އެގޮތުން އެންމެ ބޮޑަށް ބަރުދަން ލުއި ކުރެވުނު ފަރާތުން 6 ކިލޯއާ ގާތް ކުރާ އަދަދަކަށް ބަރުދަން ލުއި ކުރެވިފައިވާ ކަމަށް އަންހެނުން ކޮމެޓީން މައުލޫމާތު ދެއެވެ.

މި ޕްރޮގްރާމް ކާމިޔާބުކަމާއެކު ނިންމާލުމަށް މިލަންދޫ ފުލުހުންނާއި ކައުންސިލުންގެ ފަރާތުން ވެދެއްވި އެހީތެރިކަން ފާހަގަކޮށް އެފަރާތްތަކަށް ވަނީ އެކޮމިޓީގެ ފަރާތުން ވަރަށް ޚާއްސަ ޝުކުރެއް ދަންނަވާފައެވެ.

އެކޮމިޓީއިން އިތުރަށް މައުލޫމާތު ދެއްވަމުން ވިދާޅުވީ، 2 ހަފުތާގެ މުއްދަތަކަށް ކުރިއަށް ގެންދިޔަ މި ޕްރޮގްރާމްގައި ޖުމްލަ 23 ފަރާތަކުން ބައިވެރިވެފައިވާ ކަމަށެވެ.