އިންޑިޔާގެ ވެރިރަށް ނިއުދިއްލީގެ ވައި ތަޣައްޔަރުވުމުގެ ސަބަބުން ނިއުދިއްލީގެ ސުކޫލުތަކާއި ކޮލެޖުތައް ބަންދު ކޮށްފިއެވެ.

ނިއުދިއްލީގެ ވައި ނުސާފުވުމުގެ ސަބަބުން އޮފިޝަލުން އަންނަނީ އެކަން ހައްލުކުރުމުގެ މަސައްކަތް ކުރަމުންނެވެ. ނޮވެމްބަރު މަހުގެ ކުރީކޮޅުން ފެށިގެން ނިއުދިއްލީގެ ވައި ނުސާފުވެފައިވާއިރު، ސްކޫލްތައް ބަންދުކޮށް ކޮންސްޓްރަކްޝަން މަސައްކަތްތައް ހަތަރު ދުވަހަށް މެދުކަނޑާލުމަށް ސަރުކާރުން ވަނީ ހޮނިހިރު ދުވަހު އަންގާފައެވެ. އެއާއެކު މިހާރު ވަނީ ސުކޫލުތަކާއި ކޮލެޖުތައް ބަންދު ކޮށްފައެވެ.

ނިއުދިއްލީގެ ވައި ތަޣައްޔަރުވުމުގެ ސަބަބުން ނިއުދިއްލީއާއި، ކައިރި ސިޓީތަކުގެ އޮފީސްތައް ބަންދުކޮށް ގޭގައި ތިބެގެން މަސައްކަތްކުރުމަށް އިންޑިޔާގެ ސްޕްރީމް ކޯޓުންވެސް ވަނީ އަމުރުކޮށްފައެވެ.

ނިއުދިއްލީގެ ރައްޔިތުން ސްޕްރީމް ކޯޓަށް ހުށަހެޅި ޕެޓިޝަނާ ގުޅޭގޮތުން ފަހުބަސް އިއްވަވަމުން، ތިން ޖަޖުން ހިމެނޭ ޕެނަލްގެ ފަރާތުން ޗީފް ޖަސްޓިސް އެންވީ ރާމަންނާ ވިދާޅުވީ، އިންޑިޔާގެ މައި ސިޓީ ހިމެނޭ ސަރަހައްދުގައި މިވަގުތުން ފެށިގެން ގޭގައި ތިބެގެން މަސައްކަތްކުރުމަށް އަންގާކަމަށެވެ. މީގެއިތުރުން ނިއުދިއްލީއާއި، ކައިރި ހިސާބުތަކުގެ ސްޓޭޓްތައް ކަމުގައިވާ ހަރްޔާނާ، ޕަންޖާބު އަދި އުއްތަރް ޕްރަދޭޝްގެ އެތައް ސަތޭކަ ދަނޑުވެރިންނެއް އެމީހުންގެ ދަނޑުތަކުގައި ރޯކޮށްލާފައިވާ އަލިފާންގަނޑުތައް ވީއެންމެ އަވަހަށް ކޮންޓްރޯލްކުރުމަަށްވެސް ކޯޓުން ވަނީ އަމުރުކޮށްފައެވެ.

ނިއުދިއްލީގައި ވައިގެ ކޮލިޓީ ހުރީ 500 އަކުން 343 ގައެވެ. މާހިރުން ބުނާގޮތުގައި މިއީ ވައިގެ ކޮލިޓީގެ ވަރަށް ދަށް މިންވަރެއްކަމަށާއި، މިހާލަތުގައި ބޭރަށް ނިކުމެ ގިނަ ވަގުތު އުޅޭނަމަ ނޭވާލުމުގެ ނިޒާމަށް ބަލި ޖެހުމުގެ ފުރުސަތު އޮންނާނެ ކަމަށެވެ. 

ނިއުދިއްލީއަކީ މުޅި ދުނިޔޭގައިވެސް ވައި އެންމެ ނުސާފު، ވެރިކަން ކުރާ ސިޓީއެވެ. ބޯޓުދެލި އަންދާ ކާރުޚާނާތަކާއި ހާމަތަންތަނުގައި ކުނި އެންދުމުގެ ސަބަބުން ނިއުދިއްލީގެ ވައި އާންމުކޮށްވެސް ހުންނަނީ ނުސާފުވެފައެވެ.