އިންޑިއާގެ ކެއުންތަކަށް ޚާއްސަ ރެސްޓޯރެންޓެއް ހުޅުމާލޭގައި ހުޅުވައިފި
ރެސްޓޯރެންޓް ހުޅުވާފައިވަނީ އުނިގަސް މަގުގައި ހުންނަ ހުޅުމާލެ ލޮޓް 10821ގައި
ރެސްޓޯރެންޓް ރަސްމީކޮށް ހުޅުވައިދެއްވީ ޔޫތު މިނިސްޓަރ އަޙްމަދު މަޚްލޫފް
އިންޑިއާގެ ކެއުންތަކަށް ޚާއްސަ ރެސްޓޯރެންޓެއް "ނަގާސް"ގެ ނަމުގައި ހުޅުމާލޭގައި ހުޅުވައިފިއެވެ.
މި ރެސްޓޯރެންޓް ހުޅުވާފައިވަނީ އުނިގަސް މަގުގައި ހުންނަ ހުޅުމާލެ ލޮޓް 10821ގައެވެ.
އާދިއްތަ ދުވަހުގެ ރޭ ރެސްޓޯރެންޓް ރަސްމީކޮށް ހުޅުވައިދެއްވީ ޔޫތު މިނިސްޓަރ އަޙްމަދު މަޚްލޫފެވެ. ރެސްޓޯރެންޓުގެ ކެއުންތަކާއި ބެހޭ ގޮތުން މަޚްލޫފު ވިދާޅުވީ އެތަނުން ލިބެން ހުރީ ވަރަށް މީރު ކެއުންތައް ކަމަށާއި، ކާއެއްޗެހީގެ ރަހަ އެއްވަރެއްގައި ހިފަހައްޓައިގެން ރައްޔިތުންނަށް ޚިދުމަތް ފޯރުކޮށްދޭނެ ކަމުގެ ޔަޤީންކަން ރެސްޓޯރެންޓުން އަރުވާފައިވާ ކަމަށެވެ.
ހުޅުމާލޭގައި ހުޅުވި މި ރެސްޓޯރެންޓަކީ އިންޑިއާގެ ބްރޭންޑެކެވެ. މި ބްރޭންޑުގެ ޖުމްލަ 42 އައުޓްލެޓެއް ހުޅުވާފައިވާއިރު އެންމެ ފުރަތަމަ ނަގާސްގެ އައުޓްލެޓެއް ހުޅުވާފައިވަނީ އިންޑިއާގެ ބެންގަލޫރުގައި 2009 ވަނަ އަހަރުއެވެ.
ރާއްޖެއެމްވީއަށް މައުލޫމާތު ދެމުން އެ ރެސްޓޯރެންޓުން ބުނީ ކުރިއަތް އޮތް އެއް މަސް ދުވަހުގެ ތެރޭގައި، ފަލޫދާ އަދި މޮމޮސްއަށް ޚާއްސަ ތަނެއް ވެސް ރެސްޓޯރެންޓާއި ޖެހިގެން ހުޅުވިގެންދާނެ ކަމަށެވެ. މީގެ އިތުރުން ނަގާސް އެކްސްޕްރެސްގެ ނަމުގައި މާލެސިޓީން ވެސް އިތުރު ތަނެއް ހުޅުވާނެ ކަމަށެވެ.
ކަސްޓަމަރުންނަށް އިންޑިއާގެ ރަހަތައް، އެއް ހަމައެއްގައި ހިފައްޓައި ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަށް މަސައްކަތް ކުރާނެ ކަމަށް އެ ރެސްޓޯރެންޓުން ބުނެއެވެ.
