މިފަހަރު, މާލެ ސިޓީ ކައުންސިލުން ޖުމްހޫރީ ދުވަހު މާލޭގެ ބޮޑެތި މަގުތަކުގައި ދިދަ ޖެހީ މަދުން ކަމަށް ހޯމް މިނިސްޓްރީން ބުނެފިއެވެ.

ރާއްޖެއެމްވީން ކުރި ސުވާލަކަށް ޖަވާބު ދެމުން އެ މިނިސްޓްރީން ބުނެފައިވަނީ، ރާއްޖެ އިސްލާމްވި ދުވަހާއި ޖުމްހޫރީ ދުވަހުގެ މުނާސަބަތުގައި (ނޮވެމްބަރު 6ން 12ށް) ނިޔަލަށް ބޮޑެތި މަގުތަކުގައި ގައުމީ ދިދަ ޖަހައި ޒީނަތްތެރިކޮށްދިނުމަށް އެދުނު ކަމަށެވެ. އަދި އިސްލާމީ މަރުކަޒު ސަރަހައްދުގައި ދެ ޖަލްސާ ބާއްވާތީ، އެ ސަރަހައްދުގައި ވަށައިގެން ދިދަތައް ޖަހައިދިނުމަށް ވެސް އެދިފައިވާނެ ކަމަށެވެ.

މިއަހަރުގެ ޖުމްހޫރީ ދުވަހު މާލެސަރަހައްދުގެ ބޮޑެތި މަގުތަކުގައި މަދުން ދިދަ ޖަހާފައިވާތީ އެކަމުގެ ޝަކުވާ ބައެއް އާންމުން ވަނީ ކޮށްފައެވެ.

މިކަމާގުޅިގެން މާލެސިޓީ ކައުންސިލްގެ މޭޔަރ ޑރ. މުޙައްމަދު މުޢިއްޒު ރާއްޖެއެމްވީއަށް ވިދާޅުވީ، ހޯމް މިނިސްޓްރީން އެދުނު ގޮތަށް މާލެސަރަހައްދުގެ މަގުތަކުގައި ދިދަ ޖަހައިދީފައިވާނެ ކަމަށެވެ. އަދި ޖުމްހޫރީ މައިދާން ސަރަހައްދުގައި ދިދަ ޖަހައިދިނުމަށް ވަކިން އެދިފައިވާ ކަމަށާއި، ވަކި އަދަދަކަށް ދިދަ ޖެހުމަށް އެ މިނިސްޓްރީން އެދިފައި ނުވާކަމަށެވެ.

ހޯމް މިނިސްްޓްރީން ބުނީ އެ މިނިސްޓްރީން ވަކި އަދަދަކަށް ދިދަ ޖެހުމަށް އެދިފައިނުވި ނަމަވެސް، އެހެން އަހަރުތަކާ ޚިލާފަށް މިއަހަރު މާލޭގެ ބޮޑެތި މަގުތަކުގައި ސިޓީ ކައުންސިލުން މަދުން ދިދަ ޖަހާފައިވާ ކަމަށެވެ.

އާންމު ގޮތެއްގައި މިކަހަލަ ޚާއްސަ މުނާސަބަތުތަކާއި ގުޅުވައިގެން މާލޭގެ ބޮޑެތި މަގުތަކުގައި ގިނައިން ދިދަ ޖަހައެވެ.