އައިޖީއެމްއެޗްގައި މަސައްކަތް ކުރި ފިލިޕީންސްގެ ނަރުސް މޭރީ ގްރޭސް މަރުވެފައިވަނީ ދަންޖެހިގެން ނޫން ކަމަށް ފުލުހުން ބުނެފިއެވެ.
އައިޖީއެމްއެޗްގައި މަސައްކަތް ކުރަމުން ދިޔަ މޭރީ ގްރޭސް މަރާލާފައިވާ ކަމުގެ ތުހުމަތާއެކު އޭނާގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ގެންގޮސް، ޕޯސްޓްމޯޓަމް ހެދުމަށްފަހު ހަށިގަނޑު އަނބުރާ ގެނެސްފައިވަނީ އާދީއްތަ ދުވަހުއެވެ.
މޭރީގެ ޕޯސްޓްމޯޓަމް ރިޕޯޓާ ގުޅިގެން ފުލުހުން ބުނެފައިވަނީ, އޭނާ މަރުވެފައިވަނީ ދަންޖެހިގެން ކަމަށް ނުބެލެވޭ ކަމަށެވެ. އަދި މަރުވެފައިވަނީ ބްލަންޓް އިންޖަރީއެއްގެ ސަބަބުން ކަމަށެވެ. ބްލަންޓް އިންޖަރީއަކީ ގަދަކަމުން މީހަކަށް އަނިޔާއެއްދީގެން ނުވަތަ އެއްޗަކުން ޖަހައިގެން ލިބޭ އަނިޔާއަކުން ނުވަތަ ގެއްލުމަކުން ވާ މަރެކެވެ.
ނަރުސް މީހާ މަރާލި ކަމުގެ ތުހުމަތުގައި ހައްޔަރު ކުރީ 29 އަހަރުގެ ފިލިޕީންސްގެ ފިރިހެނެެއް ކަމަށް ފުލުހުންވަނީ ބުނެފައެވެ. މަރުގެ ތުހުމަތުގައި އޭނާ ހައްޔަރުކުރީ 27 އޮކްޓޯބަރު ވީ ބުދަ ދުވަހުއެވެ. މި ފިރިހެން މީހާއަކީ މޭރީގެ ފިރިމީހާއެވެ. އޭނާ ހައްުޔަރުކޮށް ބަންދާ މެދު ގޮތެއް ނިންމުމަށް 28 އޮކްޓޯބަރުގައި ކްރިމިނަލް ކޯޓަށް ހާޒިރުކުރުމުން އެ ކޯޓުން އޭނާގެ ބަންދަށް 15 ދުވަސް ވަނީ ޖަހާފައެވެ.
މި މަރާ ގުޅިގެން ފުލުހުން ތުހުމަތުތައް ކުރަން ފެށީ, ދަން ޖެހިފައި ހުރި ކަމަށް ބުނެ ނަރުސް މީހާ ހޮސްޕިޓަލަށް ގެންދިޔަ ނަމަވެސް، އޭނާގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންކަމަށް މައުލޫމާތު ލިބެއެވެ.
