ބޭސް ވިއްކޭނެ އެންމެ މަތީ އަގު ކަނޑައެޅުމުގެ މަސައްކަތް ފަށައިފި

ބޭސް ވިއްކޭނެ އެންމެ މަތީ އަގު ކަނޑައެޅުމުގެ މަސައްކަތް ހެލްތް މިނިސްޓްރީއާއި ގުޅިގެން ފަށާފައިވާ ކަމަށް އާސަންދައިގެ މެނޭޖިން ޑިރެކްޓަރ މަރިޔަމް ޝަފީގު ވިދާޅުވެއްޖެއެވެ.

ރާއްޖެޓީވީގެ ބަޖެޓް 2022 ޕްރޮގްރާމުގައި ވާހަކަދައްކަވަމުން މަރިޔަމް ޝަފީގު ވިދާޅުވީ އަންނަ އަހަރުގެ ބަޖެޓް ހަދަމުން ގެންދިޔަ އިރު އޭގައި ވަރަށް ގިނަ ކަންތައްތަކެއް ހިމަނާފައިވާނެ ކަމަށެވެ. އެގޮތުން ސްކީމްގެ ތެރެއިން ތަކުރާރުކޮށް ކުރެވޭ ޚަރަދުތައް ކޮންޓްރޯލް ކުރެވޭނެ ގޮތްތަކެއް ބަލާފައިވާނެ ކަމަށެވެ.

މަރިޔަމް ޝަފީގު ވިދާޅުވީ އާސަންދަ ސްކީމް ހަރުދަނާ ކުރުމަށްޓަކައި ކުރެވިދާނެ ކަންތައްތަކެއް ބަލާފައިވާ ކަމަށާއި، އޭގެ ތެރެއިން ނިސްބަތުން ބަލާއިރު ބޮޑުބައެއް ބޭހަށް ޚަރަދު ކުރާކަން ފާހަގަކުރެވޭ ކަމަށެވެ. އެ ބައި ހަމައަގެއްގައި ވިއްކޭނެ ގޮތަކަށް މަސައްކަތްތަކެއް ކުރަމުން ގެންގޮސްފައިވާ ކަމަށް ވެސް ވިދާޅުވިއެވެ.

އޭނާ ވިދާޅުވީ ބޭސް ވިއްކޭނެ އެންމެ މަތީ އަގު ނުވަތަ މެކްސިމަމް ރީޓެއިލް ޕްރައިސް ކަނޑައެޅުމަށްޓަކައި ހެލްތް މިނިސްޓްރީއާއި، އެންސްޕާއާއި ގުޅިގެން މަސައްކަތްތަކެއް ކުރެވިއްޖެ ކަމަށާއި، އެކަމުގައި ކާމިޔާބީތަކެއް ލިބިފައިވާ ކަމަށެވެ.

މީގެ އިތުރުން ސިސްޓަމް ތެރެއިން ރިޕީޓެޑް ކޯޑުގައި ހުންނަ ޚިދުމަތް ފަދަ ބައެއް ކަންކަން ރަނގަޅު ކުރުމުގެ މަސައްކަތް ފަށާފައިވާ ކަމަށް މަރިޔަމް ވިދާޅުވިއެވެ. އަދި ޚިދުމަތްދޭ ހުރިހާ ފަރާތްތައް އެއް ޕްލެޓްފޯމަކަށް ވެއްދުމުގެ މަސައްކަތް ކުރެވެމުންދާ ކަމަށާއި، އެ ޕްލެޓްފޯމްގެ ތެރެއިން އެކަކު ދެތިން ތަނަކުން ޚިދުމަތް ނަގައި ބޭނުންވާވަރަށް ވުރެ ވެސް އިތުރަށް ޚިދުމަތް ނަގާފައި ހުންނަނަމަ އެނގިގެންދާނެ ކަމަށެވެ. އަދި އެ ކަންތައްތައް ހަމަ މަގަށް އެޅުވޭނެ ގޮތަށް ސިސްޓަމް ހަރުދަނާކުރުމުގެ މަސައްކަތް ކުރަމުންދާ ކަމަށް މަރިޔަމް ޝަފީގް ވިދާޅުވިއެވެ.

ބަޖެޓްގައިވާ ގޮތުން އާސަންދަ ސިއްހީ އިންޝުއަރެންސް ސްކީމަށް ކުރާ ހޭދަ ކުޑަކުރުމަށް އަޅަން ރާވައިފައިވާ މުހިއްމު ފިޔަވަޅުތަކެއް 2022 ގައި ތަންފީޒު ކުރެވިގެންދާނެކަމަށް ބެލެވެއެވެ. އާސަންދައިގެ ނިޒާމުގެ އެންމެ ބޮޑު ޚަރަދެއް ކުރެވޭ ދާއިރާއަކީ ބޭހަށްވެފައި، 2022 ވަނަ އަހަރުގެ ތެރޭގައި ބޭހަށް މެކްސިމަމް ރީޓެއިލް ޕްރައިސް ނުވަތަ އެންމެ މަތިން ވިއްކޭ އަގު ކަނޑައަޅައި ތަންފީޒު ކުރުމަށް ނިންމާފައިވުމާއެކު އާސަންދައިން ބޭހަށް ކުރާ ޚަރަދު ކުޑަކުރެވިގެންދާނެ ކަމަށް ބެލެވެއެވެ. އަދި ކައިރި މުސްތަގުބަލެއްގައި ބޭސް އެތެރެކުރާ ފަރާތްތަކަށް މޯލްޑިވްސް ފުޑް އެންޑް ޑްރަގް އޮތޯރިޓީން ދެމުންދިޔަ އެކްސްލޫސިވިޓީ ހުއްޓާލުމަށްވެސް ރޭވިފައިވެއެވެ. މީގެއިތުރުން އާސަންދައިގެ ނިޒާމުގެ ތެރޭގައާއި ޖުމްލަކޮށް ސިއްހީ ނިޒާމުގެ ތެރޭގައި ހުރި އެހެނިހެން އިންއެފިޝަންސީތަކަށް ހައްލު ހޯދައި ޚަރަދު ބޭކާރުވެގެން ދިއުމަށް ހުޅުވިފައިވާ ދޮރުތައް ބަންދުކުރުމަށް 2022ވަނަ އަހަރު މަސައްކަތްތަކެއް ކުރަމުންދާނެއެވެ.