ރައްޔިތުންގެ މަޖިލީހުގެ ރައީސާއި، އުއްތަމަފަނޑިޔާރުގެ ވަގުތީ ގެކޮޅު މި މަހު ނިމޭނެ ކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުންސިންގ އެންޑް އިންފްރާސްޓްރަކްޗަރއިން ބުނެފިއެވެ.

އެ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ރާއްޖެއެމްވީއަށް ވިދާޅުވީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ސަރުކާރުން ހަމަޖައްސަވާފައިވާ ވަގުތީ ގެކޮޅު، މ. މުރައިދޫ ގޭގެ މަރާމާތު ކުރުމުގެ މަސައްކަތް މި ހިނގާ ނޮވެމްބަރު މަހުގެ 14 ވަނަ ދުވަހަށް ނިމޭނެ ކަމަށް އެ މަސައްކަތް ކުރަމުން އަންނަ ކުންފުނިން ބުނެފައިވާ ކަމަށެވެ. މުރައިދޫގެ މަރާމާތުކުރުމުގެ މަސައްކަތް ކުރަމުން އަންނަނީ ސިފައިންގެ ކުންފުނި "ސިވެކް"އިންނެވެ.

ކުރިން އެ މަސައްކަތް ނިމޭނެ ކަމަށް ލަފާކޮށްފައި އޮތީ، އޮކްޓޫބަރު މަހުގެ ފަހުކޮޅަށެވެ. އެހެންނަމަވެސް ބައެއް ބަދަލުތައް ގެނެސް އިތުރު މަސައްކަތް ކުރަން ޖެހުމުން އެ ތާރީޚަށް ނިންމާ ނުލެވުނީ ކަމަށް އަކްރަމް ވިދާޅުވިއެވެ.

ރައީސް ނަޝީދަށް އަމާޒުކޮށް މޭ 6 ވަނަ ދުވަހު ދިން ޓެރަރިސްޓް ހަމަލާއަށްފަހު ރާއްޖެއިން ބޭރުގައި ހުންނެވުމަށްފަހު އެމަނިކުފާނު ރާއްޖެ ވަޑައިގެންނެވީ އޮކްޓޫބަރ މަހުގެ 11 ވަނަ ދުވަހުއެވެ. މުރައިދޫ ގޭގެ މަރާމާތުގެ މަސައްކަތް ކުރިއަށްދާތީ، އެމަނިކުފާނު މިހާރު ހުންނަވަނީ ހޮޓެލް ޖެންގައެވެ.

އަކްރަމް ވިދާޅުވީ، އުއްތަމަ ފަނޑިޔާރު ދިރިއުޅުއްވުމަށް ހަމަޖައްސާފައިވާ ރެހެންދި އެޕާރޓްމެންޓްގެ މަސައްކަތް މި ހިނގާ ނޮވެމްބަރު މަހުގެ 8 ވަނަ ދުވަހަށް ނިންމާލެވޭނެ ކަމަށެވެ.

ތިން ބާރުގެ ވެރިންގެ ތެރެއިން މަޖިލީހުގެ ރައީސާއި އުއްތަމަ ފަނޑިޔާރަށް ރަސްމީ ގެކޮޅު ހަމަޖައްސާ ގޮތަށް ގާނޫނަށް ބަދަލު ގެނައީ ރައީސް ނަޝީދު އަވަހާރަކޮށްލުމަށް ޓެރަރިސްޓް ހަމަލާއެއް ދިނުމާ ގުޅިގެންނެވެ. މިހާތަނަށް މަޖިލީހުގެ ރައީސާއި އުއްތަމަ ފަނޑިޔާރު ދިރިއުޅުއްވަމުން ގެންދެވީ އަމިއްލަ ގެކޮޅުގައެވެ.

މަޖިލީހުގެ ރައީސާއި އުއްތަމަ ފަނޑިޔާރަށް ދާއިމީ ރަސްމީ ގެކޮޅު އިމާރާތްކުރުމަށް ނިންމައި، އެ މަސައްކަތް ވެސް ޕްލޭނިންގ މިނިސްޓްރީން އަންނަނީ ކުރަމުންނެވެ.

މުރައިދޫގެ އެންމެ ފަހުން ބޭނުން ކޮށްފައިވަނީ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނުގެ އެންމެ ދޮށީ ދެބޭފުޅުން ދިރިއުޅުއްވުމަށެވެ. ރެހެންދި ފްލެޓުން އުއްތަމަ ފަނޑިޔާރަށް ހަމަޖައްސާ އެޕާޓްމަންޓަކީ ޔާމީންގެ ވެރިކަމުގައި އޭރުގެ ނައިބު ރައީސް އަބްދުﷲ ޖިހާދުގެ ރަސްމީ ގެކޮޅުގެ ގޮތުގައި ބޭނުންކުރެއްވި ފްލެޓެވެ.