ޝަހީދު ހުސައިން އާދަމް: މުޅި ރާއްޖެ ފަޚުރުވެރިވާ ބަޠަލް

1988 ވަނަ އަހަރުގެ ނޮވެމްބަރު މަހުގެ 3 ވަނަދުވަސް ވެގެން ގޮސްފައިވަނީ ދިވެހިރާއްޖޭގެ ތާރީޚް ނުދެކޭފަދަ ބިރުވެރި ކަންތައްތަކަކާ ދިވެހިން ކުރިމަތިލާންޖެހުނު ދުވަހަކަށެވެ. ދިވެހިންގެ ތެރެއިން ޤައުމަށް ޣައްދާރުވި ބަޔަކު އިސްވެތިބެ ސްރީލަންކާގައި އުޅުނު ޓެރަރިސްޓް ޖަމާޢަތެއްކަމަށްވާ، ތަމަޅަ ޓައިގަރުންގެ ބަޔަކާ ގުޅިގެން ދިވެހިރާއްޖޭގެ ވެރިކަންކުރާ ރަށް، މާލެއަށް ހަތިޔާރާއެކު އަރައިގަނެ، ދިވެހިންގެ ތެރެއިން އެތައް ބަޔަކު ޝަހީދުކޮށްލާފައިވަނީ 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހުއެވެ. ދިވެހިން ނަސްރުގެ ދުވަސް ފާހަގަކުރަނީ ދިވެހިރާއްޖޭގެ ޤާނޫނީ ވެރިކަމާއި، ދިވެހިރައްޔިތުންގެ މިނިވަންކަމާ ދެކޮޅަށް ބަޔަކު ދިން ނުރައްކާތެރި ބިރުވެރި މިޙަމަލާއިން ދިވެހި ޤައުމާއި ރައްޔިތުންނަށް ނަޞްރު ލިބުން ފާހަގަކުރުމަށްޓަކައެވެ.

ދިވެހި މި ލޮބުވެތި ފަސްގަނޑަށް ދިމާވި ދަތި އުނދަގޫ ކޮންމެ ވަގުތެއްގައި ތިލަދުންމަތީގެ ދަރީން ވަނީ ޤައުމަށްޓަކައި ޤުރުބާންވެ ވަޑައިގެން ޤައުމު ދިފާޢުކުރައްވާފައެވެ. ތިލަދުންމައްޗަކީ މުޅިޤަމުގެ ފަޚުރެއްކަން ޔަޤީނެވެ. ތިލަދުންމަތީ މީހުންނަކީ، މާތްވެގެންވާ އިސްލާމްދީނަށް ލޯބިކުރާ، ޒަމާނުއްސުރެ ރިވެތި އަޚުލާޤެއްގެ ވެރިބައެކެވެ. ސުލްހަމަސަލަސްކަމަށް ލޯބިކުރާ ބަޔެކެވެ. ޤައުމިއްޔަތުގެ ރޫޙު ހިތްތަކުގައި ބިންވަޅު ނެގިފައިވާ ބަޔެކެވެ. އެންމެ ފުރަތަމަ ޤައުމުކަމަށް ޢަމަލާއި ބަހުން މިސާލުދައްކުވައިދިން ރައްޔިތެކެވެ. ތިލަދުންމަތީ ރައްޔިތުންނަކީ މަޑުމޮޅި ކަމާއި، ސާދާކަމުގެ ލާމަސީލު ބަޔެކެވެ.

1988 ވަނަ އަހަރުގެ ނޮވެމްބަރ 3 ވަނަ ދުވަހު ޤައުމަށް މިދިމާވި ނުރައްކާތެރި ދަނޑިވަޅުގައި، ދުޝްމަނުންގެ ހަމަލާ ނާކާމިޔާބުކޮށްލައި ފުރާނައިން ޤުރުބާންވެ ވަޑައިގެންނެވި ޝަޙީދު ޙުސައިން އާދަމަކީ މުޅި ޤައުމު ފަޚުރުވެރިވާ ތިލަދުންމަތީގެ ދަރިއެކެވެ. ހދ. ކުޅުދުއްފުއްޓަށް އުފަން، ހުސައިން އާދަމް އެދުވަހު ވެވަޑައިގެން ޤުރުބާނީގެ ސަބަބުން ދުޝްމަނުންނަށް ރާއްޖޭގެ ސިފައިންގެ ހިފުމަށް ރާވާފައިވާ ރޭވުން ނާކާމިޔާބު ކޮށްލެއްވިއެވެ. އެދުވަހު ދުޝްމަނުން ރާވާފައިއޮތީ ސިފައިންގެ ހިފުމަށްފަހު، ދިވެހި ޤައުމު އެމީހުންގެ އަތްދަށަށް ގެނައުމަށެވެ. ނަމަވެސް އަތުގައި އޮތް 60 ވަޒަން ހުސްވެ ޝަޙީދުވަންދެން ހުސައިން އާދަމް ދުޝްމަނުންނާ ހަމަލާ ބަދަލު ކުރެއްވުމުގެ ނަތީޖާއަކަށްވީ، ދުޝްމަނުންގެ ރޭވުން ނާކާމިޔާބުވެ، ސިފައިންގެ ހިފުމުގެ ފުރުޞަތު ގެއްލިގެން ދިޔުމެވެ.

1968 ވަނަ އަހަރު ބޮޑުތިލަދުންމަތީގެ ކުޅުދުއްފުއްޓަށް އުފަންވެ ވަޑައިގަތް ޝަހީދު ޙުސައިން އާދަމްގެ ނުހަނު ޅައުމުރުގައި ވަޠަންގެ ދިފާއުގައި އައްޑަނައަކަށްވެ ވަޑައިގެން ފުރާނައިންވެވަޑައިގެންނެވި މަތިވެރި ޤުރުބާނީއަކީ ދުލަކުން ނުވަތަ ގަލަމަކުން ބަޔާން ކުރެވޭނެ ޤުރުބާނީ އެއްނޫނެވެ. ދިވެހިން ނަސްރުގެ ދުވަހުގެ ގޮތުގައި ފާހަގަކުރާ ނޮވެމްބަރ 3 ވަނަ ދުވަހަކީ، އެމަތިވެރި ޝަހީދާއެކު، މިޤައުމަށްޓަކައި ފުރާނަ ޤުރުބާންކުރެއްވި އެހެން ޝަހީދުންގެ ޒިކުރާ އައުކުރެވޭ ދުވަހެވެ.

3 ނޮވެމްބަރ 1988 ދުވަހުރޭ ފަތިހު ބަނޑޭރިގޭގެ ބޭރު ދޮރާށީގައި ހުޅަނގު ފަޅީގެ ޑިއުޓީއަށް ހުންނަވައި، ޤައުމަށްޓަކައި، އުމުރުން 20 އަހަރުގައި ޝަހީދު ޙުސައިން އާދަމް ވެވަޑައިގަތް ޤުރުބާނީއަކީ އަދުގެ ޖީލު ފިލާވަޅު ލިބިގަންނަން ޖެހޭ ޤުރުބާނީއެކެވެ. މުޅި ތިލަދުންމައްޗާއި، ޤައުމު ފަޚުރުވެރިވާ ޤުރުބާނީއެކެވެ. މިއަދު އަޅުގަނޑުމެން 33 ވަނަ ނަސްރުގެ ދުވަސް ފާހަގަކުރާއިރު، ދުޢާއަކީ ތިލަދުންމައްޗާއި މުޅި ޤައުމު ފަޚުރުވެރި ކުރުވި އެ ބަޠަލަށް މާތްﷲ ސުވަރުގޭގެ ދާއިމީ ނިޢުމަތުގައި ލެހެއްޓެވުމެވެ. ހަމަ މިނޭވާގައި އެދުވަހު ޤައުމަށްޓަކައި ޝަހީދުވި އެންމެހާ ބަޠަލުންގެ ޒިކުރާއައުކޮށް، މާތްﷲ ސުވަރުގޭގެ ދާއިމީ ނިޢުމަތުގައި އެބަޠަލުން ލެހެއްޓެވުންއެދި ދުޢާ ކުރަމެވެ. އާމީން!