ކޮޕް26: ބަހަނާތައް ހުސްވެއްޖެ، މިއީ ކަންކަން ރަނގަޅުކުރަންވީ ވަގުތު: ޝާހިދު
1 ނޮވެމްބަރު 2021 | ހޯމަ 02:34ހައްލުކުރުމުގެ ގާބިލުކަމާއި ވަސީލަތްތައް ވެސް އެބަހުރިކަމަށާއި، ނަމަވެސް މިކަން ހައްލުކުރުމަށް އެއްވެސް ކަމެއް ނުކުރޭ
ކޮޕް26 ބައްދަލުވުން ހުޅުވުމުގެ ރަސްމިއްޔާތުގައި ޝާހިދު ވާހަކަދައްކަވަނީ
މޫސުމީ ބަދަލުތަކުން އަރައިގަތުމަށް ކުރަމުންދާ މަސައްކަތުގައި ދައްކަމުންދާ ބަހަނާތައް މިހާރު ހުސްވެއްޖެކަމަށާއި މިއީ ކަންކަން ރަނގަޅުކުރުމަށް އަމަލީ ގޮތުން ކަންކަން ކުރަންވީ ވަގުތުކަމުގައި އދ ގެ 76 ވަނަ ސެޝަންގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
މިހާރު ގްލާސްގޯ ގައި ކުރިޔަށްދާ ކޮޕް26 ބައްދަލުވުން ހުޅުވުމުގެ ރަސްމިއްޔާތުގައި ވާހަކަދައްކަވަމުން ޝާހިދު ވިދާޅުވީ އިންސާނުންނަށް މިހާރު ކުރިމަތިވެފައިމިވަނީ އިންސާނުންގެ ދިރިހުރުމާމެދު އުފެދިފައިވާ ކާރިސާއަކަށްކަމަށެވެ. މިކަން ހައްލުކުރުމުގެ ގާބިލުކަމާއި ވަސީލަތްތައް ވެސް އެބަހުރިކަމަށާއި ނަމަވެސް މިކަން ހައްލުކުރުމަށް އެއްވެސް ކަމެއް ނުކުރާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ މިކަމުގައި އެންމެން ވެސް އެމީހެއްގެ އަމިއްލަ ނަފުސަށާއި އެކަކު އަނެކަކަށް އަދި މުޅި ދުނިޔެއަށް ވެސް ތެދުވެރިވާންޖެހޭކަމަށެވެ. މޫސުމީ ބަދަލުތަކުގެ ބަހުސުގައި އެތައް އަހަރެއް ހޭދަކޮށްފިކަމަށާއި ހަކަތަ އުފެއްދުމުގައި އިޔާދަކުރަނިވި ހަކަތައަށް ދިޔުމުގެ ވާހަކަދައްކާތާ އެތައް ދުވަހެއްވެއްޖެކަމަށެވެ. ނަމަވެސް މިކަން ހާސިލުކުރުމުގެ އަޒުމާއި އެ ހިތްވަރު ހޯދުމުގައި ފެއިލްވެފައިވާކަމަށް ޝާހިދު ވިދާޅުވިއެވެ. މިއީ ގަބޫލުކުރަން އުނދަގޫ ހަގީގަތަކަށްވިޔަސް ހަގީގަތްކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އދ ގެ އާންމު މަޖިލީހުގެ ރައީސްގެ ހައިސިއްޔަތުން އެހެން އެއްވެސް ވާހަކައަކަށްވުރެ ބޮޑަށް މޫސުމީ ބަދަލުތަކުގެ ވާހަކަ އަޑުއިވިވަޑައިގަނެފައިވާކަމަށެވެ. ދުނިޔޭގެ ލީޑަރުންނާއި، ޒުވާނުންނާއި، ސިވިލް ސޮސައިޓީ އާއި އަންހެނުންގެ ފަރާތުން ވެސް އެވާހަކަ އަޑުއިވިވަޑައިގަނެފައިވާކަމަށް ޝާހިދު ވިދާޅުވިއެވެ.
އެ އެންމެންގެ ވާހަކަތަކަށް ބަލާއިރު އެންމެން ވެސް ބުނަނީ އެއް ވާހަކައެއްކަމަށް ޝާހިދު ވިދާޅުވިއެވެ. އެއީ ދުނިޔޭގެ ހޫނުމިން 1.5 ޑިގްރީގައި ހިފެހެއްޓުމުގެ ލަނޑުދަނޑިއަށް ވާސިލުވުމުގެ ވާހަކައާއި މޫސުމީ ބަދަލުތަކުގެ އަސަރު އެންމެ ބޮޑަށްކުރާ އާބާދީތަކަށް ބޭނުންވާ އެހީތެރިކަން ފޯރުކޮށްދިނުންކަމަށެވެ.
މީގެއިތުރުން ޓެކްނޮލޮޖީގެ އައު ވަސީލަތްތައް ބޭނުންކުރުމާ ދިމާލަށް ނުދިޔުމާއި އަންހެނުންނާއި ޒުވާނުން މިކަމުގައި ބާރުވެރިކުރުވުމުގެ މުހިންމުކަމުގެ މެސެޖްކަމަށް ޝާހިދު ވިދާޅުވިއެވެ. އަދި މިމެސެޖްތައް ގްލާސްގޯ އަށް ގެންނަވާނެކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ނެޓް ޒީރޯ އަށް ވާސިލުވުމަށް 100 ޓްރިލިއަން ޑޮލަރު ޚަރަދުކުރުމަށް ވައުދުވެފައިވާއިރު އެފައިސާ ޚަރަދުކުރާނެ ގޮތާއި އިސްކަންދޭނެ ކަންކަން އަދި ސާފުނުވާކަމަށެވެ. މީގެއިތުރުން މޫސުމީ ބަދަލުތަކަށް އެޑަޕްޓް ވުމުގައި މޫސުމީ ބަދަލުތަކުން އެންމެ ބޮޑަށް އަސަރުކުރާ ގައުމުތަކަށް ދޭންޖެހޭ ސަމާލުކަން އަބަދުވެސް ދެމުންގެންދަންޖެހޭކަމަށް ވިދާޅުވިއެވެ.
މީގެއިތުރުން ދުނިޔޭގެ 1.8 ބިލިއަން ޒުވާނުން ނޫ އަދި ފެހި އިޤްތިޞާދުގެ ތެރެއަށް ވައްދާ، އެމީހުންނަށް އިންވެސްޓްކުރަންޖެހޭކަމަށް ޝާހިދު ވިދާޅުވިއެވެ.
އދ.ގެ އާންމު މަޖިލީހުގައި ވާހަކަދެއްކި ޑައިނަސޯރ ފްރޭންކީ ބުނިގޮތަށް ނެތިދިޔުން އިޚުތިޔާރުނުކުރުމަށް ޝާހިދު އިލްތިމާސްކުރެއްވިއެވެ. އެންމެން އެކުގައި އެއް އާއިލާއެއްގެ ގޮތުގައި މަސައްކަތްކޮށް ހުރި ވަސީލަތަކާއި ގާބިލުކަމެއް ބޭނުންކޮށްގެން ދުނިޔެ ސަލާމަތްކުރުމަށް ޝާހިދު އިލްތިމާސްކުރެއްވިއެވެ.
