ވެރޯނާ އަތުން ބަލިވެ ޔުވެންޓަސް ނުވަވަނައަށް

އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުން ހެލަސް ވެރޯނާ އަތުން ބަލިވެ ތާވަލުގެ ނުވަވަނައަށް ޔުވެންޓަސް ވެއްޓިއްޖެއެވެ.

ރަށުން ބޭރުގައި ކުޅުނު މެޗުން ޔުވެންޓަސް ބަލިވީ 2-1 ގެ ނަތީޖާއަކުންނެވެ.

މި ފަހަރުގެ ސީޒަން ޔުވެންޓަސްއިން ފަށާފައިވަނީ ވަރަށް ދަށްކޮށެވެ. އެގޮތުން ލީގުގައި ކުޅުނު ފުރަތަމަ ހަތަރު މެޗުންވެސް ޔުވެންޓަސްއަށް މޮޅެއް ހޯދިފައެއް ނުވި ނަމަވެސް، އެ ޓީމުން ފަހުން ވަނީ ލީގުގައި ޖެހިޖެހިގެން ހަތަރު މެޗުން މޮޅުވެފައެވެ. އެކަމަކު އަނެއްކާވެސް ޔުވެންޓަސްގެ ފޯމު ދަށްވެފައިވާއިރު، އެންމެ ފަހުން ކުޅުނު ތިން މެޗުން އެ ޓީމަށް ލިބިފައިވަނީ އެންމެ ޕޮއިންޓެކެވެ.

ހޮނިހިރު ދުވަހުގެރޭ ކުޅުނު މެޗު ފަށައިގެން ވެރޯނާއިން މޮޅު ކުޅުމެއް ދެއްކިއިރު، އެ ޓީމުން ވަނީ 14 މިނެޓުގެ ތެރޭގައި ދެ ލަނޑުގެ ލީޑެއް ނަގާފައެވެ. އެގޮތުން މި ދެ ލަނޑުވެސް އެ ޓީމަށް ކާމިޔާބުކޮށްދިނީ ޖިއޮވާނީ ސިމިއޯނީއެވެ. އޭނާއަކީ ސްޕެއިނުގެ އެތުލެޓިކޯ މެޑްރިޑުގެ ކޯޗު ޑިއޭގޯ ސިމިއޯނީގެ ދަރިފުޅެވެ. ޖިއޮވާނީ އަންނަނީ އުމުރުން 17 އަހަރުން ފެށިގެން އިޓާލިއަން ލީގުގައި ކުޅެމުންނެވެ.

ޖިއޮވާނީގެ ދެ ލަނޑުން ވެރޯނާއިން ލީޑު ނެގިއިރު، ޔުވެންޓަސްއިން މި މެޗުގައި ފަރަގު ކުޑަކޮށްފައިވަނީ މެޗު ނިމެން 10 މިނެޓަށް ވެފައި ވަނިކޮށެވެ. ޑެނީލޯ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ވެސްޓަން މެކެނީއެވެ.

މި ނަތީޖާއާއެކު ޔުވެންޓަސް މި ވަގުތު އޮތީ ލީގު ތާވަލުގެ ނުވަވަނައިގައެވެ. ތާވަލުގެ އަށްވަނައިގައި އޮތް ވެރޯނާ އާއި ޔުވެންޓަސްއަށްވެސް ކުޅުނު 11 މެޗުން 15 ޕޮއިންޓް ލިބިފައިވާއިރު، ވެރޯނާއަށް ކުރި ލިބެނީ ލަނޑުގެ ތަފާތުންނެވެ.