އޭސީސީން ބަލަމުންދަނީ ސްޓޭޓް މިނިސްޓަރ އަހުމަދު ޒުހައިރާ ސީދާ ގުޅުން ހުރި މައްސަލައެއް ނޫން!
އޭސީސީން ނެގީ ހަމައެކަނި ސްޓޭޓްމަންޓެއް
ސްޓޭޓް މިނިސްޓަރ އަހުމަދު ޒުހައިރު
އެންޓި ކޮރަޕްޝަން ކޮމިޝަން (އޭސީސީ) އިން މިނިސްޓަރ އޮފް ސްޓޭޓް ފޯރ ޓްރާންސްޕޯޓް އެންޑް ސިވިލް އޭވިއޭޝަން އަހުމަދު ޒުހައިރު ކޮރަޕްޝަނުގެ އެއްވެސް މައްސަލައެއް ބަލަމުން ނުދާ ކަމަށް އޭނާ ވިދާޅުވެއްޖެއެވެ.
ޒުހައިރުގެ ކޮރަޕްޝަނުގެ މައްސަލައެއް އޭސީސީން ބަލުމުންދާ ކަމަށް ބުނެ ޚަބަރު އޮންލައިންގައި އާންމުކޮށްފައިވަނީ ކަނޑައެޅިގެން ދޮގު މައުލޫމާތެއް ކަމަށް ރާއްޖެއެމްވީއަށް މައުލޫމާތު ދެއްވަމުން އޭނާ ވިދާޅުވިއެވެ. ޒުހައިރު ވިދާޅުވީ ރީޖަނަލް އެއަރޕޯޓްސްގެ މައްސަލަ ބެލުމަށް އެންގީވެސް ޚުދު އޭނާ ކަމަށާއި ބިޑް އިވެލުވޭޝަން ކޮމެޓީ އަދި ޕްރޮކިއުމަންޓާ ބެހޭ އެއްވެސް ކަމެއްގައި ހަރަކާތްތެރިވެފައި ނުވާކަމަށެވެ.
މި މައްސަލައާ ގުޅިގެން އޭސީސީއަށް މީހުން ދީފައި ހުރި މައުލޫމާތުތަކުގެ ސައްހަކަން ކަށަވަރު ކުރުމަށް، ޒުހައިރުގެ ސްޓޭޓްމަންޓެއް އޭސީސީން ނެގި ކަމަށް ވަނީ ވިދާޅުވެފައެވެ. އަދި ހަގީގަތް ނުބަލާ މިގޮތަށް ޚަބަރުތައް ފަތުރަމުންދާތީ ޒުހައިރު ވަނީ މިކަން ކުށްވެރި ކުރައްވާފައެވެ. ރާއްޖެއެމްވީއަށް މައުލޫމާތު ދެމުން އޭސީސީން ބުނީ ފަޔަރޕްރޯ މޯލްޑިވްސް ޕްރައިވެޓް ލިމިޓެޑުން ރާއްޖެ އެތެރެ ކުރި ދެ ބަހާއި ގުޅޭ މައްސަލައެއް ބަލަމުންދާ ކަމަށެވެ. ވަކި މީހަކަށް ތުހުތަމަތުކޮށް، އެމީހެއްގެ މައުލޫމާތު އާންމުކޮށްފައިނުވާނެ ކަމަށެވެ.
ޚަބަރު އޮންލައިންގައި ބުނެފައިވަނީ ކޮރަޕްޝަންގެ މައްސަލަ ބަލަމުންދާއިރު ކަމާއި ގުޅޭ ލިޔެކިޔުންތައް ހޯދުމަށް އޭސީސީން ޓްރާސްޕޯޓް މިނިސްޓަރ ނަހުލާއަށް ދަންނަވާފައިވާ ކަމަށެވެ. އަދި އެކަމުގައި ބޭނުންވާ އެންމެހާ ލިޔުންތައް ހޯދުމަށް އެދިފައިވަނީ މިމަހުގެ 10 ވަނަ ދުވަހު ކަމަށާއި 11 ވަނަ ދުވަހުގެ 14:00 ގެ ކުރިން ހުރިހާ ލިޔުންތަކެއް އޭސީސީއަށް ފޮނުވުމަށް އެދިފައިވާ ކަމަށެވެ. އޭސީސީން ހޯދަން އެދުނު މައުލޫމާތުތަކުގެ ތެރޭގައި ރީޖަނަލް އެއަރޕޯޓްސްގެ ނަންބަރު 448/1/2019/44(IUL) (21 އޮގަސްޓް 2019) އިއުލާނާ ގުޅިގެން ބިޑް ކާމިޔާބު ކުރި ފަޔަރޕްރޯ މޯލްޑިވްސް ޕްރައިވެޓް ލިމިޓެޑުން ރާއްޖެ އެތެރެ ކުރި ދެ ބަހާ ގުޅޭ އެއްވެސް ޕޭމަންޓެއް ރީޖަނަލް އެއަރޕޯޓްސް ކުންފުންޏަކަށް ބަދަލު ކުރުމާ ހަމައަށް ހަދާފައިވާނަމަ، އެކަމާގުޅޭ އެންމެހައި ލިޔެކިޔުންތައް ހަވާލު ކުރުމަށާއި، އަދި އެކަމާގުޅޭ އެއްވެސް ޕޭމަންޓެއް ހަދާފައިނުވާނަމަ، އެކަން ބަޔާންކޮށް ވަކި ލިޔުމެއް ހޯދުމަށްވެސް އޭސީސީން ވަނީ އެދިފައި ކަމަށް އެ ނޫހުގައިވެއެވެ.
މީގެ އިތުރުން ރީޖަނަލް އެއަރޕޯޓްސް އޮވަރސީ ކުރުމުގެ މަސައްކަތް ސްޓޭޓް މިނިސްޓަރ، އަޙްމަދު ޒުހައިރާ އެއްވެސް ދުވަސްވަރެއްގައި ހަވާލުކޮށްފައިވާނަމަ، އެކަމާގުޅޭ އެންމެހައި ލިޔެކިޔުންތައް (އެ މަސައްކަތް ހަވާލުކުރެވުނު ތާރީޚް، ހަވާލުކުރެވުނު ޒިންމާތަކާއި، ބާރުތައް، އެކަން ރީޖަނަލް އެއަރޕޯޓްސްއަށް އަންގާ ފޮނުވުނު ލިޔެކިޔުންތައް ހިމަނައިގެން) އަދި އެފަދަ މަސައްކަތެއް ހަވާލުކޮށްފައިނުވާނަމަ، އެކަން ބަޔާންކޮށް ވަކި ލިޔުމެއް ހޯދުމަށްވެސް އޭސީސީން އެދިފައިވާ ކަމަށް ޚަބަރު އޮންލައިންގައިވެއެވެ.
