215 ކިލޯ ޑްރަގް ފެނުނީ ރ.ރާނބުގަލީ ކަށިކެޔޮ ގަސްގަނޑެއްގެ ތެރޭގައި ހުރި ގޯނިތަކަކުންކަން ހާމަވެއްޖެއެވެ.

އެކަން ހާމަވެފައިވަނީ މި މައްސަލައިގެ ތުހުމަތުގައި ހައްޔަރު ކޮށްފައިވާ ރ. މަޑުއްވަރި، ފިނިފަރު، ޢަލީ ޝާކިރު (42އ) އާއި ރ. މަޑުއްވަރި، ފެހިއަލި، ނިމާލް ޢަބްދުލްޙާރިޘް (33އ) ގެ ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރު ކުރުމުން މި މައްސަލައިގައި ހިމެނޭ އައިއޯއިން ފާހަގަކޮށްފައިވާ ވާހަކަތަކުންނެވެ. އެގޮތުން މި ދެ މީހުންގެ ބަންދަށްވެސް އިތުރު 15 ދުވަސް ޖަހާފައިވާއިރު، މި ދެމީހުން މަސްތުވާތަކެތި އެތެރެކުރަން އުޅުނުކަން އިންޓެލިޖެންސް ރިޕޯޓުންވެސް އެނގޭކަން ކޯޓު އަމުރުގައި ބަޔާންކޮށްފައިވެއެވެ.

މި މައްސަލައިގެ އައިއޯއިން ފާހަގަކުރާ ގޮތުގައި ފެށުން 2 ކިޔާ ލޯންޗެއްގައި މި ދެމީހުން ރ މަޑުއްވަރީއަށް ވަތް ވަގުތު ބަލައި ފާސްކޮށްފައިވާކަމަށް ސީންގައި ހަރަކާތްތެރިވި އޮފިސަރުން ވަނީ ބުނެފައެވެ. އަދި އޭރު ލޯންޗުން ގިނަ އަދަދެއްގެ ޕެޓްރޯލް ހަންތަކާއި، ސެޓެލައިޓު ފޯނެއް ފެނިފައިވާއިރު، އެ ސަރަޙައްދުގައި ހުރި ފަޅު ރަށްތައްވެސް އޮފިސަރުން ވަނީ ބަލައި ފާސްކޮށްފައެވެ. މިގޮތަށް ބަލައި ފާސް ކުރުމުގެ ތެރޭގައި ރ ބޮޑުފަރު ފިނޮޅުން ޕެޓްރޯލް ހުސްކުރި 20 ލީޓަރުގެ 63 ހަން ފެނިގެން އޮފިސަރުން އެމީހުންނާ ސުވާލު ކޮށްފައިވާކަމަށާއި، ޖަވާބުގައި އެއީ މަސްތުވާތަކެތި ބަލާ ދިއުމަށް ޓެސްޓު ދަތުރެއް ކުރަން ބޭނުންކުރި ހަންތަކެއްކަމަށް އެމީހުން ބުނެފައިވާކަންވެސް އޮފިސަރުން ފާހަގަ ކުރެއެވެ.

ސީންގައި ޙަރަކާތްތެރިވި އޮފިސަރުން މައުލޫމާތު ދޭ ގޮތުގައި އެ ދެމީހުން އެތެރެކުރި މަސްތުވާތަކެތި ރ ރާނބުގަލީގައި ހުންނާނެކަމަށް ބުނެ އެތަކެތި ފުލުހުންނަށް ދެއްކިއެވެ. އެގޮތުން އެތަކެތި ފެނިފައިވަނީ އެމީހުން އެތަކެތި ހުންނާނެކަމަށް ބުނި ކަށިކެޔޮ ގަސްތަކުގެ ތެރޭގައިކަމަށް ފުލުހުން މައުލޫމާތު ދެއެވެ. އެތަނުން މަސްތުވާތަކެތި އަޅާފައި ހުރި 11 ގޯނި ފުލުހުން ހޯދާފައިވެއެވެ. އަދި އެތަކެތީގެ ވަގުތީ ބަރުދަނުގައި 215 ކިލޯ ހުންނާނެކަންވެސް ފުލުހުން ފާހަގަ ކުރެއެވެ.

އޭގެ އިތުރުން، ލޯންޗުން ފެނުނު ފޯނުގެ އެކްސްޓްރެކްޝަން ރިޕޯޓުވެސް ފުލުހުން ވަނީ ބަލާފައެވެ. އަދި ފޯނުގައި ހުރި މެސެޖުތަކުގައި އެމީހުން ރާއްޖެ ސަރަޙައްދުން ބޭރަށް ދިޔަ ކަމުގެ މެސެޖުތަކާއި، ބޯޓަކާއި ބައްދަލުކުރި ކަމުގެ މެސެޖުތަކެއް ފެނިފައިވާކަމަށް ފުލުހުން މައުލޫމާތު ދެއެވެ.

މި މައްސަލައިގައި ދިފާއުން ފާހަގަކޮށްފައިވާ ކަންކަމަށް ބަލާއިރު، ދެ މީހުންނަށް ފުލުހުން އަނިޔާކުރި ކަމުގެ ޝަކުވާ ކޮށްފައިވާތީ, އެކަން ބެލުމަށް އެޗްއާރްސީއެމްއަށް ކޯޓުން ވަނީ އަންގާފައެވެ. އެގޮތުން ބަންދުގައި ބެހެއްޓުމަށް އަމުރުކުރި ފަހުން ފަޅު ރަށަކަށް ގެންގޮސް އަނިޔާކޮށްފައިވާކަމަށް އެމީހުން ވަނީ ބުނެފައެވެ. އެމީހުން ވަނީ ޕެޕަރ ސްޕްރޭ ޖަހައި، ގައިގައި ތަޅައި އެތައް އަނިޔާއެއް ކޮށްފައިވާކަމަށް ތުހުމަތު ކޮށްފައެވެ. އަދި އަނިޔާއިން ރެކުމަށްޓަކައި ޕެޓްރޯލް ހަންތަކާއި ގުޅޭގޮތުން އެއްޗެއް ބުނެވިފައި އޮވެދާނެ ކަމަށާއި، ނަމަވެސް ފުލުހުން އެ ފާހަގަކުރާ ގޮތަށް މަސްތުވާތަކެއްޗާ ގުޅޭގޮތުން އެއްޗެއް ބުނެފައިނުވާނެކަމަށް އެމީހުން ބުނެއެވެ.