އުއްޗު އާއި އެސްޓީއޯއިން ގައުމީ ޓީމަށް އެއް މިލިޔަން ރުފިޔާ

މަޝްހޫރު ވިޔަފާރިވެރިޔާ މުޙައްމަދު މޫސާ (އުއްޗު) އާއި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ރާއްޖޭގެ ގައުމީ ފުޓްބޯޅަ ޓީމަށް އެއް މިލިޔަން ރުފިޔާގެ ފައިސާގެ އިނާމެއް ދީފިއެވެ.

ގައުމީ ޓީމަށް ފައިސާގެ އިނާމެއް އެރުވީ އުއްޗުގެ ދައުވަތަކަށް ކުރެއްދޫ އައިލެންޑް ރިސޯޓުގައި ހުކުރު ދުވަހުގެ ހަވީރު ކުޅުނު ޚާއްސަ މެޗަށްފަހުއެވެ. މި މެޗުގައި ގައުމީ ޓީމާ ދެކޮޅަށް ކުރެއްދޫ އައިލެންޑް ރިސޯޓުގެ ޓީމު ނުކުތްއިރު، މި މެޗުން ގައުމީ ޓީމު މޮޅުވީ ފަސޭހަކަމާއެކު 7-1 ގެ ނަތީޖާއަކުންނެވެ.

މި މެޗުގައި ގައުމީ ޓީމުގެ އިތުބާރު ފޯވާޑް އަލީ އަޝްފާގް (ދަގަނޑޭ) ހެޓްރިކް ހެދިއިރު، އަސަދުﷲ އަބްދުﷲ (އަސަކޮ) ވަނީ ދެ ލަނޑު ޖަހާފައެވެ. ދެން ގައުމީ ޓީމުގެ ލަނޑުތައް ޖަހައިދިނީ މުޙައްމަދު އުމެއިރާއި އަލީ ފާސިރު (ސެންޓޭ) އެވެ. މި މެޗުގައި ކުރެއްދޫއިން ޖެހި ހަމައެކަނި ލަނޑު ކާމިޔާބުކޮށްދިނީ އެ ޓީމުގެ ކެޕްޓަން ގުރޭޝް އަބްދުލް ރައްޒާގެވެ.

މި މެޗަށްފަހު އުއްޗު ވަނީ މެޗުން މޮޅުވި ގައުމީ ޓީމަށް ފަސް ލައްކަ ރުފިޔާގެ ފައިސާގެ އިނާމެއް ދެއްވާފައެވެ. އަދި އެސްޓީއޯއިންވެސް ވަނީ ގައުމީ ޓީމަށް ފަސް ލައްކަ ރުފިޔާގެ ފައިސާގެ އިނާމެއް ދީފައެވެ. ދެން ގައުމީ ޓީމަށް ފައިސާގެ އިނާމު ދިނީ ދިރާގުގެ އިތުރުން ވިލާ ޓްރެވަލްސްއިންނެވެ. އެގޮތުން މި ކޮންމެ ކުންފުންޏަކުން ވަނީ ގައުމީ ޓީމަށް އެއް ލައްކަ ރުފިޔާގެ ފައިސާގެ އިނާމެއް ދީފައެވެ. އެހެންކަމުން ގައުމީ ޓީމަށް ޖުމްލަ 1.2 މިލިޔަން ރުފިޔާ ވަނީ ލިބިފައެވެ.

މީގެ އިތުރުން މި މެޗުގެ މޮޅު ކުޅުންތެރިޔާއަށް ލިޓަސްއިން އިނާމެއްގެ ގޮތުގައި ސައިކަލެއް ހުށަހެޅިއިރު، އެ އިނާމު ލިބިފައިވަނީ މެޗުގެ މޮޅު ކުޅުންތެރިޔާގެ މަގާމު ހޯދި ދަގަނޑޭއަށެވެ. އަދި ސަންފްރަންޓުން ހުށަހެޅި ބެޓެރި ސައިކަލް ކުރެއްދޫގެ ކެޕްޓަން ގުރޭޝް އަބްދުލް ރައްޒާގަށް ލިބުނުއިރު، ސަންފްރަންޓުން ދެން ހުށަހެޅި ބައިސްކަލް ލިބުނީ ކުރެއްދޫގެ ކޯޗު މުޙައްމަދު އަބްދުލް ޣަނީއަށެވެ.

މި މެޗަށްފަހު ދެއްވި އިންޓަވިއުއެއްގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވީ ގައުމީ ޓީމަށް މި ލިބުނު ފައިސާ ބަހާލާނީ ހުރިހާ ކުޅުންތެރިންނާއި އޮފިޝަލުންގެ މެދުގައި ހަމަހަމައަށް ކަމަށެވެ.

އުއްޗުގެ ދައުވަތަކަށް ކުޅުނު މި ޚާއްސަ މެޗުގެ ޓްރާންސްޕޯޓް ޕާޓްނަރުންނަކީ ޓްރާންސް މޯލްޑިވިއަން އެއާވޭސް (ޓީއެމްއޭ) އާއި، މަންތާ އެއާ އަދި މޯލްޑިވިއަންއެވެ. އަދި މި ޚާއްސަ މެޗުގެ މީޑިއާ ޕާޓްނަރަކީ ރާއްޖެޓީވީއެވެ. ކުރެއްދޫގައި ކުޅުނު މި މެޗު ރާއްޖެޓީވީން ވަނީ ވަގުތުން ގެނެސްދީފައެވެ.

ގައުމީ ޓީމުން ކުރެއްދޫގައި ޚާއްސަ މެޗެއް ކުޅުނުއިރު، މިދިޔަ ހަފުތާގައި ގައުމީ ޓީމުން ވަނީ ހދ. ކުޅުދުއްފުށި ސިޓީގައިވެސް ޚާއްސަ މެޗެއް ކުޅެފައެވެ. އެ މެޗަކީ ކުޅުދުއްފުށީގައި ސަރުކާރުގެ ފަރާތުން އެޅި ފެންވަރު ރަނގަޅު ޓާފް ދަނޑު ހުޅުވުމުގެ ގޮތުން ކުޅުނު މެޗެކެވެ. އެ މެޗުން ގައުމީ ޓީމު މޮޅުވީ ފަސޭހަކަމާއެކު 6-0 ގެ ނަތީޖާއަކުންނެވެ.

ގައުމީ ޓީމަށް ދެން އެންމެ އަވަހަށް އޮތް މުބާރާތަކީ އަންނަ ނޮވެމްބަރު މަހު ސްރީ ލަންކާގައި ބޭއްވުމަށް ހަމަޖެހިފައިވާ މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) އެވެ. މުބާރާތުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. އެ މުބާރާތަށް ތައްޔާރުވުމުގެ ގޮތުން ގައުމީ ޓީމުން ދާދި ފަހުން ވަނީ އައު ކޯޗު ފްރެންސެސްކޯ މޮރިއޭރޯއާއެކު ފަރިތަކުރުންތައް ފަށާފައެވެ.