އަލިފާނުގެ ހާދިސާއާ ގުޅިގެން، ވަގުތީ ގޮތުން މާލޭ ހުކުރު މިސްކިތް އާންމުންނަށް ބަންދުކޮށްފި
މި ހާދިސާއާ ގުޅިގެން ހުކުރު މިސްކިތުގައި ހުކުރު ނަމާދު ކުރުން ނޯންނާނެ
އަލިފާނުގެ ހާދިސާއާ ގުޅިގެން މިސްކިތުގެ ހިރިގަލަށާއި މަތިވަޑާންގަނޑަށް ކޮންމެވެސް ވަރެއްގެ ގެއްލުންތަކެއް ވަނީ ލިބިފައި
އަލިފާނުގެ ހާދިސާއާ ގުޅިގެން ވަގުތީ ގޮތުން މާލޭ ހުކުރު މިސްކިތް އާންމުންނަށް ބަންދުކަމަށް މިނިސްޓްރީ އޮފް އާރޓްސް، ކަލްޗަރ އެންޑް ހެރިޓޭޖް އިން ބުނެފިއެވެ.
އެ މިނިސްޓްރީން ބުނީ ބުރާސްފަތި ދުވަހުގެ ރޭ 20:50 ހާއިރު ކަރަންޓު ސޯޓެއްވުމުގެ ސަބަބުން ފަންކާއެއްގައި ރޯވެ، މާލޭ ހުކުރު މިސްކިތުގައި އަލިފާނުގެ ޙާދިސާއެއް ހިނގާފައިވާ ކަމަށެވެ. މި ޙާދިސާގައި އެއްވެސް މީހަކަށް ގެއްލުމެއް ވެފައި ނުވިނަމަވެސް، މިސްކިތުގެ ހިރިގަލަށާއި މަތިވަޑާންގަނޑަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަމަށެވެ.
މިސްކިތް ބޭނުންކުރާ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމާއި، ދުނިޔޭގެ ތަރިކައިގެ ވަގުތީ ލިސްޓުގައި ދަފްތަރު ކުރެވިފައިވާ އެ މިސްކިތުގެ ޢިމާރާތް ރައްކާތެރިކުރުމަކީ އެމަރުކަޒުގެ ޒިންމާއެއް ކަމުން، އެ މަރުކަޒާއި މާލޭ ސިޓީ ކައުންސިލް އަދި މިނިސްޓްރީ އޮފް އިސްލާމިކް އެފެއާޒްއިން މަޝްވަރާ ކުރުމަށްފަހު، ތަނުގެ ކަރަންޓު ވަޔަރިންގ ހުރި ޙާލަތު ބަލައި ތަން ބޭނުންކުރުން ރައްކާތެރިކަން ކަށަވަރުކުރެވެންދެން ވަގުތީ ގޮތުން މާލޭ ހުކުރު މިސްކިތް އާންމުންނަށް ބަންދުކުރުމަށް ނިންމާފައިވާ ކަމަށް ވެސް އެ މިނިސްޓްރީން ބުންޏެވެ.
މާލޭ ހުކުރު މިސްކިތުގައި ކަރަންޓު ސޯޓުވުމުގެ ސަބަބުން ކަރަންޓު ނަރުތައް ހަލާކު ވެފައިވާތީ 29 އޮކްޓޫބަރު 2021 ވާ ހުކުރު ދުވަހު ހުކުރު މިސްކިތުގައި ހުކުރު ނަމާދު ކުރުން ނޯންނާނެ ކަމަށް އިސްލާމިކް މިނިސްޓްރީން ވަނީ ބުނެފައެވެ.
މިސްކިތުގެ ރައްކާތެރިކަން ކަށަވަރުކުރުމަށްފަހު ވީ އެންމެ އަވަހަކަށް މިސްކިތް އަލުން ހުޅުވާނެކަމަށް ވެސް މިނިސްޓްރީން ބުންޏެވެ. މާލޭ ހުކުުރު މިސްކިތަކީ 360 އަހަރަށްވުރެ ގިނަ ދުވަސް ވެފައިވާ އާސާރީ ބިނާއެކެވެ.
