އެމްޓީސީސީއަށް އިންޑިއާއިން ގިނަ އަދަދެއްގެ މުވައްޒަފުން ހޯދާކަމަށް ދިޔަރެސް ނޫހުން ފަތުރާފައިވަނީ ދޮގު ޚަބަރެއް
އެމްޓީސީސީއަށް އިންޑިއާއިން މުވައްޒަފުން ގެންނަން އެ ޤައުމުގައި އިޢުލާނުކޮށްފައެއް ނުވާނެ
އެމްޓީސީސީގެ ސީއީއޯ އާދަމް ޢާޒިމް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އަށް އިންޑިއާއިން ގިނަ އަދަދެއްގެ މުވައްޒަފުން ހޯދާކަމަށް ދިޔަރެސް ނޫހުން ފަތުރާފައިވަނީ ދޮގު ޚަބަރެއް ކަމަށް އެ ކުންފުނިން ބުނެފިއެވެ.
އެ ކުންފުނިން ބުނީ އިންޑިއާގެ އަފްރީން އިންޓަރނޭޝަނަލް ނަމަކަށް ކިޔާ ކުންފުންޏެއް މެދުވެރިކޮށް އެމްޓީސީސީއަށް އިންޑިއާއިން ގިނަ އަދަދެއްގެ މުވައްޒަފުން ހޯދާކަމަށް ބުނެ އެ ކުންފުނި ބަދުނާމު ވާގޮތަށް, 28 އޮކްޓޯބަރ 2021 ވަނަ ދުވަހު ދިޔަރެސް ނޫހުގައި ޝާއިޢުކޮށްފައިވާ ޚަބަރަކީ ކަނޑައެޅިގެން ހަޤީޤަތާ ޚިލާފު ދޮގު ޚަބަރެއް ކަމަށެވެ.
އެމްޓީސީސީއަށް އިންޑިއާއިން މުވައްޒަފުން ގެންނަން އެ ޤައުމުގައި އިޢުލާނުކޮށްފައެއް ނުވާނެކަމަށް ވެސް ވަނީ ބުނެފައެވެ. އަދި ކުންފުނި ބަދުނާމުވާގޮތަށް އަދި ޢާންމު ރައްޔިތުންގެ މެދުގައި ކުންފުންޏަށް އޮތް އިތުބާރު ގެއްލޭ ގޮތަށް މިފަދަ ޙަޤީޤަތާ ޚިލާފު ދޮގު ޚަބަރު ނުފެތުރުމަށް އެންމެހާ ފަރާތްތަކަށް ވަނީ އިލްތިމާސްކޮށްފައެވެ.
ދިޔަރެސް ނޫހުން އާންމުކޮށްފައިވާ މި ޚަބަރުގައި ވަނީ; ބޮޑު މުސާރަ ދޭ ގޮތަށް ގިނަ އަދަދެއްގެ މުވައްޒަފުން އިންޑިއާއިން ހޯދުމަށް މޯލްޑިވްސް ޓްރާންސްޕޯޓް އެންޑް ކޮންސްޓްރަކްޝަން ކޮމްޕެނީ (އެމްޓީސީސީން) އިންޑިއާގައި އިއުލާނު ކޮށްފައިވާ ކަމަށް ބުނެފައެވެ. 1،700 ޑޮލަރުން ފެށިގެން ގޮސް 450 ޑޮލަރާ ދެމެދުގެ މުސާރަތައް ލިބޭ ގޮތަށް 36 ވަޒީފާއަކަށް މީހުން ހޯދުމަށް އެ ކުންފުނިން އިއުލާނުކޮށްފައިވާ ކަމަށާއި, އެ ދާއިރާތަކުން ވަޒީފާއަށް އިންޑިއާއިން ނަގާނީ ކިތައް މީހުން ކަމެއް އެ އިއުލާނުގައި ބުނެފައިނުވާ ކަމަށް ވެސް ދިޔަރެސް ނޫން ވަނީ ބުނެފައެވެ.
އެމްޓީސީސީން މިފަދައިން ބަޔާން ނެރެފައިވާއިރު އެކުންފުނީގެ ސީއީއޯ އާދަމް އާޒިމް ވެސް ވަނީ އިންޑިއާގައި ކުރި އިއުލާނަކީ ޞައްޙަ އިއުލާނެއް ނޫން ކަމަށް ވިދާޅުވެފައެވެ. އާޒިމް ވިދާޅުވީ އަފްރީން އިންޓަނޭޝަނަލް މެދުވެރިކޮށް މުވައްޒަފުން ހޯދުމަށް އެފަދަ އިއުލާނެއް އެ ކުންފުނިން ނުކުރާ ކަމަށާއި އެ އިއުލާނަކީ ޞައްޙަ އިއުލާނެއް ނޫން ކަމަށެވެ.
