ވިނަރެސް އެޕާރޓްމެންޓްތައް އަންނަ އަހަރު މެދުތެރޭގައި ނިމޭނެ
28 އޮކްޓޯބަރު 2021 | ބުރާސްފަތި 13:48ވިނަރެސް މަޝްރޫއުގެ ދަށުން ތައްޔާރު ކުރާ 1،344 ފްލެޓް ހުންނާނީ 10 ޓަވަރަށް ބަހާފައި
ހުޅުމާލެ ދެވަނަ ފިޔަވަހީގައި އަޅަމުން ގެންދާ ވިނަރެސް އެޕާރޓްމެންޓްތައް
ހުޅުމާލެ ދެވަނަ ފިޔަވަހީގައި އިމާރާތްކުރަމުންދާ ވިނަރެސް އެޕާރޓްމެންޓްތައް އަންނަ އަހަރުގެ މެދުތެރޭގައި ނިމޭނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)އިން ބުނެފިއެވެ.
އެޗްޑީސީން ބުނީ، ވިނަރެސްގެ 50 އިންސައްތަ މަސައްކަތް މިހާރު ނިމިފައިވާ ކަމަށާއި, ޖޫން ނުވަތަ ޖުލައި މަހުގެތެރޭގައި މަސައްކަތް އެއްކޮށް ނިންމާލެވޭނެ ކަމަށެވެ. ވިނަރެސް އެޕާރޓްމެންޓް ގަތުމަށް އަންނަ މަހު އާއްމުންނަށް ހުޅުވާލާއިރު، ހިޔާ މަޝްރޫއުން ފްލެޓް ދޫކޮށްލި މީހުންގެ ތެރެއިން ވިނަރެސްއިން އެޕާރޓްމެންޓް ބޭނުންވާ މީހުންނާއި، އެޕާރޓްމެންޓް ގަތުމަށް ސީލައިފަށް ފައިސާ ދެއްކި މީހުންނާއި، ގުޅީފަޅުން ފްލެޓް ގަތުމަށް ފައިސާ ދެއްކި މީހުންގެ ތެރެއިން ވިނަރެސްއިން އެޕާރޓްމެންޓް ލިބޭ މީހުން ކަނޑައެޅުމުގެ މަސައްކަތްވެސް މިހާރު އެޗްޑީސީން ގެންދަނީ ކުރަމުންނެވެ. އެޗްޑިސީން ބުނީ، އެ މީހުންގެ ތެރެއިން ވިނަރެސްގެ މިންގަނޑަށް ފެތޭ މީހުންނަށް އެޕާރޓްމެންޓް ދިނުމަށް ހަމަޖެހިފައިވާ ކަމަށެވެ.
ހިޔާ މަޝްރޫއުން ފްލެޓް ދޫކޮށްލި މީހުންގެ ތެރެއިން ވިނަރެސްގެ އެޕާރޓްމެންޓަށް އެދި ހުށަހަޅާފައިވަނީ 76 މީހުންނެވެ. ސީލައިފަށް ފައިސާ ދެއްކި މީހުނެގެ ތެރެއިން ވިނަރެސްގެ އެޕާރޓްމެންޓަށް 400ށްވުރެ ގިނަ މީހުން ވަނީ ހުށަހަޅާފައެވެ. އަދި ގުޅީފަޅުން ފްލެޓް ގަންނަން ފައިސާ ދެއްކި މީހުންގެ ތެރެއިން ވިނަރެސްގެ އެޕާރޓްމެންޓަށް އެދި ހުށަހަޅާފައިވަނީ 91 މީހުންނެވެ. މި ފޯމްތައް އެޗްޑީސީން ގެންދަނީ އިވެލުއޭޓް ކުރަމުންނެވެ.
ވިނަރެސް މަޝްރޫއުގެ ދަށުން ތައްޔާރު ކުރާ 1،344 ފްލެޓް ހުންނާނީ 10 ޓަވަރަށް ބަހާފައެވެ. އަދި ކޮންމެ ޓަވަރެއްގައި 13 ފަންގިފިލާ ހުންނަ އިރު ކޮންމެ އެޕާޓްމެންޓެއްގައި ތިން ކޮޓަރިއާއި ތިން ފާޚާނާގެ އިތުރުން ބެލްކަންޏެއް ހުންނާނެއެވެ.
ވިނަރެސް ފްލެޓުތަކުގެ ޖާގަ ބޮޑުވި ނަމަވެސް އޭގެ އަގު ހިޔާ ފްލެޓުތަކަށް ވުރެ ބޮޑު ވާނެ ކަމަށް ހައުސިން މިނިސްޓްރީން ވަނީ މީގެ ކުރިން ބުނެފައެވެ. ވިނަރެސް އެޕާރޓްމެންޓެއްގެ ކުލި އުޅޭނީ ގާތްގަނޑަކަށް 17،000 ރުފިޔާގައެވެ. ފައިސާ ދެއްކުމަށް އެކި މޮޑެލްތައް ވަނީ ކަނޑައަޅާފައެވެ.
ވިނަރެސް އެޕާރޓްމެންޓްތަކުގައި ހަތަރު ބާވަތެއްގެ އެޕާޓްމެންޓު ހުންނާނެއެވެ. އެއީ މެރީނާ ވިއު، އިނަރ ވިއު، އައުޓަރ ވިއު އަދި ސްޓޭންޑާރޑް ވިއު އެޕާރޓްމެންޓުތަކެވެ. އޭގެ ތެރެއިން ސްޓޭންޑާޑް ވިއު އެޕާޓްމެންޓުގައި ހުންނާނީ 883 އަކަފޫޓެވެ. ނަމަވެސް ބާކީ ތިން ބާވަތުގެ އެޕާޓްމެންޓުގައި 902 އަކަފޫޓު ހުންނާނެއެވެ.
