ނުކުޅެދުންތެރިކަން ހުންނަ މީހުންނާއި ކުދިންނަށް ބޭނުންވާ އެކިއެކި ތެރަޕީގެ ޚިދުމަތް ރަގަޅު ފެންވަރެއްގައި ރާއްޖެއިން ލިބެން ނެތުމާއެކު މި ޚިދުމަތްތަށް ދެވޭނެ އިންތިޒާމު ހަމަޖެއްސުމަށް މަސައްކަތް ކުރާނެ ކަމަށް ޖެންޑަރ މިނިސްޓްރީން ބުނެފިއެވެ.
މިނިސްޓްރީގެ މަސައްކަތްތައް ހަރުދަނާ ކުރުމަށް ކުރަމުންދާ މަސައްކަތްތަކާ ބެހޭގޮތުން ޖެންޑަރ މިނިސްޓްރީގެ ކޮމިއުނިކޭޝަން ޑިރެކްޓަރ ރިޒްނާ ޒަރީރު, ރާއްޖެއެމްވީއަށް ވިދާޅުވީ; ކުޑަކުދިންގެ ހައްގުތައް ރައްކާތެރިކުރުމާބެހޭ ގާނޫނުގެ ދަށުން ކުޑަކުދިންގެ ހައްގުތައް ރައްކާތެރިކުރުމާ ބެހޭ ގައުމީ ނިޒާމެއް އެކުލަވާލާނެ ކަމަށާއި، އެ ނިޒާމް ގާއިމްކޮށް ހަރުދަނާކުރުމަށް ކުރަންޖެހޭ މަސައްކަތްތައް ކުރާނެ ކަމަށެވެ. މި ނިޒާމްގެ ދަށުން އިޖްތިމާއީ ޚިދުމަތް ފޯރުކޮށްދިނުމާއި ކުޑަކުދިންނާއި ގުޅިގެން ހުށަހެޅޭ މައްސަލަތަކުގައި މަސައްކަތްކުރާނެ ގޮތާއި, އޯލްޓަނޭޓިވް ކެއަރ އަދި ފޮސްޓަރ ކެއަރގެ ޚިދުމަތްތައް ފޯރުކޮށްދިނުމަށް ކަނޑައެޅޭ އިޖްރާއާތުތައް ތަންފީޒުކުރުމުގެ މަސައްކަތްކުރާނެ ކަމަށް ރިޒްނާ ވިދާޅުވިއެވެ.
ރިޒްނާ ވިދާޅުވީ ނުކުޅެދުންތެރިކަން ހުންނަ މީހުންނާއި ކުދިންނަށް ބޭނުންވާ އެކިއެކި ތެރަޕީގެ ޚިދުމަތް ރަނގަޅު ފެންވަރެއްގައި ރާއްޖެއިން ލިބެން ނެތުމުން, މި ޚިދުމަތްތައް ދެވޭނެ އިންތިޒާމް ހަމަޖެއްސުމަށް މަސައްކަތްކުރާނެ ކަމަށެވެ. އަދި މިނިސްޓްރީއަށް ހުށަހެޅޭ މައްސަލަތަކުގެ މައުލޫމާތު ޑޭޓާބޭސްއެއްގައި ރެކޯޑްކުރެވި, ސިޔާސަތުތައް ކަނޑައެޅުމަށް ބޭނުންވާ މައުލޫމާތު ހޯދުމާއި, މައްސަލަތަކުގެ އަދާހަމަތަކާއި, ސުޕަވައިޒްކުރުމަށް ބޭނުންވާ މައުލޫމާތު ފަސޭހައިން ލިބޭނެ މަގު ފަހިކުރާނެ ކަމަށް ރިޒްނާ ވިދާޅުވިއެވެ.
ދައުލަތުގެ ބެލުމުގެ ދަށަށް ނަގާ ކުދިންގެ ތެރެއިން އެއް އާއިލާއަކަށް ނިސްބަތްވާ ކުދިންނަށް އެއްކޮށް ދިރިއުޅުމުގެ ފުރުސަތު ފޮސްޓަރިންގގެ އާ ނިޒާމެއްގެ ތެރެއިން ގާއިމްކުރާނެކަން ފާހަގަކުރައްވައި ރިޒްނާ ވިދާޅުވީ, އިޖްތިމާއީ ޚިދުމަތް ފޯރުކޮށްދިނުމުގެ ދާއިރާގައި މަސައްކަތްކުރާ މުވައްޒަފުންނަކީ ދާއިރާގެ މަސައްކަތު ތަމްރީން ލިބިފައިވާ ބަޔަކަށްހެދުމާއި ލާމަރުކަޒީ ނިޒާމެއްގެ ތެރެއިން އިޖްތިމާޢީ ޚިދުމަތް ދިނުމުގެ މަސައްކަތް ހަރުދަނާކުރާނެ ކަމަށެވެ. އަދި ނަފްސާނީ ބައްޔަށް ފަރުވާ ހޯދަމުން ގެންދާ މީހުން ވަގުތީ ގޮތުން މަރުކަޒުކޮށްގެން ފަރުވާދެވޭނެ މަރުކަޒެއް ގާއިމްކުރުމާއެކު އެފަރާތަށް ބޭނުންވާ ޚިދުމަތްތަށް ފޯރުކޮށްދޭވޭނެ ކަމަށް ރިޒްނާ ވިދާޅުވިއެވެ.
ރިޒްނާ ވިދާޅުވީ ކުޑަކުދިންނާއި، އަންހެނުންނާއި، ދޮށީ އުމުރުގެ މީހުންނާއި އަދި ނުކުޅެދުންތެރިކަން ހުންނަ މީހުންނަށް ފާގަތި ދިރިއުޅުމެއް ހޯދައިދިނުމާއި އަނިޔާއިން ރައްކާތެރިކަން ހޯދައި ދިނުމަށް މުޖުތަމައުގެ ހޭލުންތެރިކަން އިތުރު ކުރުމަށް މަސައްކަތްކުރާނެ ކަމަށެވެ. ކުޑަކުދިންނާއި، އަންހެނުންނާއި އުމުރުންދުވަސްވީ މީހުންނާއި ނުކުޅުދުންތެރިކަން ހުންނަ މީހުންގެ ހައްގަކަށް އުނިކަމެއް ލިބިގެން ހުށަހެޅޭ މައްސަލަތަށް މަދުކުރުމަށް ކަމާގުޅޭ އިދާރާތަކާ ގުޅިގެން ޕްރޮގްރާމްތައް ރާވައި ހިންގާނެ ކަމަށް ރިޒްނާ ވިދާޅުވިއެވެ.
މީގެ އިތުރުން މިނިސްޓްރީގެ ހިންގުން ހަރުދަނާކޮށް ހަރުދަނާކޮށް ކުރާ ހޭދަ ކުޑަކޮށް ދެމުންދާ ޚިދުމަތްތަކުގެ ފެންވަރު ރަގަޅުކުރާނެ ކަމަށާއި، އުމުރުންދުވަސްވީ މީހުންނަށް އެކަށީގެންވާ ޚިދުމަތްތައް ފޯރުކޮށްދިނުމަށް އެލްޑަރލީ ވެލްނެސް ސެންޓަރެއް ރާއްޖޭގެ ދެ ސަރަހައްދެއްގައި ގާއިމުކުރާނެ ކަމަށެވެ.
ރިޒްނާ ވިދާޅުވީ ކޮމިއުނިޓީ ސޯޝަލް ގްރޫޕްތައް ގާއިމްކޮށް ބޭނުންވާ ތަމްރީންތައް ދިނުމާއެކު، ލާމަރުކަޒީ އުސޫލުން އިޖްތިމާއީ ޚިދުމަތް ފޯރުކޮށް ދިނުމަށް, ޚާއްސަކޮށް އެންމެ މަދު އާބާދީތައް ދިރިއުޅެމުންދާ ރަށްތަކަށްވެސް ފަސޭހައިން ޚިދުމަތް ދެވޭނެ މަގު ފަހިކުރުން ހިމެނޭ ކަމަށެވެ. އަދި ކާރިސާއަކާ ގުޅިގެން ނާޒުކު ހާލަތަށް ދާ މީހުންނަށް އިޖްތިމާޢީ ރައްކާތެރިކަން ފޯރުކޮށްދެވޭނެ ނިޒާމެއް އެކުލަވާލައި ތަންފީޒުކުރަން ފަށާނެ ކަމަށެވެ.
އަންހެނުން ވަޒީފާގެ މާހައުލަށް ނުކުތުމަށް ބާރުވެރިކުރުވައި އެކަމަށް މަގުފަހިކުރުމަށް ޑޭކެއަރ ޚިދުމަތް އެކަށީގެންވާ އަގެއްގައި ލިބޭނެ ނިޒާމެއް ގާއިމުކުރުމުގެ މަސައްކަތްތައް ކުރާނެކަންވެސް ރިޒްނާ ފާހަގަކުރެއްވިއެވެ.
