އަންގާރަ ދުވަހު ވެކްސިންގެ ދެވަނަ ޑޯޒް ޖެހީ 536 މީހުން
28 އޮކްޓޯބަރު 2021 | ބުރާސްފަތި 01:52ވެކްސިންގެ ދެވަނަ ޑޯޒް ފުރިހަމަ ކުރި އަދަދު ވަނީ 355،786ށް އަރާފައި
އައްޑޫސިޓީގައި ވެކްސިން ދިނުމުގެ ޕްރޮގްރާމުގެ ތެރެއިން
އަންގާރަ ދުވަހު ވެކްސިންގެ ދެވަނަ ޑޯޒް ފުރިހަމަކުރީ 536 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އެންމެ ފަހުން ނެރުނު ތަފާސްހިސާބުތައް ދައްކާ ގޮތުން އަންގާރަ ދުވަހު ވެކްސިންގެ ފުރަތަމަ ޑޯޒު 52 މީހުން ވަނީ ޖަހައިފައެވެ. އެއީ މާލެ ސަރަހައްދުން ވެކްސިންގެ ފުރަތަމަ ޑޯޒު ޖެހި 36 މީހުންނާއި އަތޮޅުތެރެއިން ވެކްސިންގެ ފުރަތަމަ ޑޯޒު ޖެހި 16 މީހުންނެވެ. އެއާއެކު ވެކްސިންގެ ފުރަތަމަ ޑޯޒު ޖެހި މީހުންގެ އަދަދު ވަނީ 394،228ށް އަރާފައެވެ.
މީގެ އިތުރުން ވެކްސިންގެ ދެވަނަ ޑޯޒު 536 މީހުން ވަނީ ޖަހައިފައެވެ. އެއީ މާލެ ސަރަހައްދުން ވެކްސިންގެ ދެވަނަ ޑޯޒު ޖެހި 305 މީހުންނާއި، އަތޮޅުތެރެއިން ވެކްސިންގެ ދެވަނަ ޑޯޒު ޖެހި 231 މީހުންނެވެ. އެއާއެކު ވެކްސިން ފުރިހަމަ ކުރި މީހުންގެ އަދަދު ވަނީ 355،786ށް އަރާފައެވެ.
ރާއްޖޭގައި ވެކްސިނޭޝަން ޕްރޮގްރާމު ބާރަށް ކުރިއަށްދާއިރު ދިވެހިރާއްޖެއިން ކޮވިޑް-19 އާ ދެކޮޅަށް ކުރަމުންގެންދާ މަސައްކަތްތަކަށް އެހީތެރިވެ ދިނުމުގެ ގޮތުންނާއި ރާއްޖޭގައި ވެކްސިން ރައްކާތެރިކަމާއެކު ބެލެހެއްޓުމުގެ އިންތިޒާމް އިތުރަށް ހަރުދަނާ ކުރުމަށްޓަކައި ޖަޕާން ސަރުކާރުން ރާއްޖެއަށް ވަނީ ވަސީލަތްތައް ފޯރުކޮށްދީފައެވެ.
ހެލްތް މިނިސްޓްރީން މައުލޫމާތު ދޭ ގޮތުގައި ޖަޕާނުން ޙަވާލުކުރި ތަކެތީގެ ތެރޭގައި ވެކްސިން އުފުލުމާއި ރައްކާކުރުމަށް ބޭނުންވާ "ފްރީޒް ފްރީ ވެކްސިން ކެރިއަރސް" އަދި ކޯލްޑް ޗެއިން ސްޓޯރޭޖް ޤާއިމް ކުރުމަށްޓަކައި ބޭނުންވާ ފްރީޒަރ، ފިނިހޫނުމިން ވަޒަންކުރާ އާލާތްތައް، އިންފޮމޭޝަން ޓެކްނިލޮޖީގެ އާލާތްތައް އަދި ޕާސަނަލް ޕްރޮޓެކްޓިވް އިކުއިޕްމެންޓް (ޕީ.ޕީ.އީ) ހިމެނެއެވެ. އަދި މި ތަކެއްޗާއި، މި ޕްރޮޖެކްޓްގައި ހިމެނޭ ފަންނީ ލަފާގެ އެހީތެރިކަމާއެކު މުޅި ޖުމްލަ 950،000.00 އެމެރިކާ ޑޮލަރުގެ އެހީ މިޕްރޮޖެކްޓްގެ ތެރެއިން ޞިއްޙީދާއިރާއަށް ލިބިގެންދާނެކަން މިނިސްޓްރީން ފާހަގަކޮށްފައިވެއެވެ.
