ފުވައްމުލަކުގެ އިހުގެ ނެރުތައް ބަންދު ކުރުމުގެ މަސައްކަތް ކުރިއަތް އޮތް ދެ މަސް ތެރޭގައި ނިންމާލެވޭނެ: އާޒިމް
26 އޮކްޓޯބަރު 2021 | އަންގާރަ 12:12ފުވައްމުލަކު ސިޓީގެ އިހުގެ ނެރުތައް ބަންދު ކުރުމުގެ މަސައްކަތް ފައްޓަވައިދެއްވީ ނައިބު ރައީސް ފައިސަލް ނަސީމް
ފުވައްމުލަކު ސިޓީގެ އިހުގެ ނެރުތައް ބަންދު ކުރުމުގެ މަސައްކަތް ފެށުން
ފުވައްމުލަކުގެ އިހުގެ ނެރުތައް ބަންދުކުރުމުގެ މަސައްކަތް ކުރިއަތް އޮތް ދެ މަސް ތެރޭގައި ނިންމާލެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
މި މަސައްކަތް ފެށުމަށް އަންގާރަ ދުވަހު ފުވައްމަލު ސިޓީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އާޒިމް ވިދާޅުވީ, އެތައް ހިތާމަވެރި ހާދިސާތައް މި ނެރުގައި ހިނގާފައިވާ ތަނަކަށް މިތަން ވާއިރު, އެމްޓީސީސީގެ އިޖުތިމާއީ މަސައްކަތުގެ ދަށުން ފަށާ މި މަސައްކަތަކީ އެތައް ގިނަ ރައްޔިތުންގެ ފުރާނައާ ގުޅުން ހުރި މަސައްކަތެއް ކަމަށެވެ.
މި މަސައްކަތް ކުރިއަށް ގެންދިއުމަށްޓަކައި ދުވާލެއްގެ މައްޗަށް ހަތަރު ގަޑިއިރު މަސައްކަތުގައި ހޭދަވާނެ ކަމަށާއި, މިއީ ފަސޭހަ މަސައްކަތަކަށް ވެގެން ނުދާނެ ކަމަށް ވެސް އާޒިމް ފާހަގަކުރެއްވިއެވެ. އަދި ކޮންމެ ދުވަހަކު ވެސް މި މަސައްކަތް 8 ގަޑިއިރު ކުރެވޭނަމަ މަހެއްހާ ދުވަހުގެ ތެރޭގައި މަސައްކަތް އެއްކޮށް ނިންމާލެވޭނެ ކަމަށް ވެސް އާޒިމް ވިދާޅުވިއެވެ.
70 ރަށެއްގައި އެކި މަޝްރޫއުތަކުގެ އަމަލީ މަސައްކަތް އެމްޓީސީސީން ފަށާފައިވާއިރު 53 ޕްރޮޖެކްޓަށްވުރެން ގިނަ މަަސައްކަތް ކުންފުނިން ނިންމާފައިވާނެ ކަމަށް ވެސް ވިދާޅުވިއެވެ. އަދި މިކަންތައްތައް މި ކުރިއަށް ގެންދަނީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ އެއްބާރުލުމާއި މަޝްވަރާގެ މަތިން ކަމަށް އާޒިމް ވިދާޅުވިއެވެ.
އެމްޓީސީސީގެ ކެޕޭސިޓީ އިތުރުކުރަން ރައީސް ސޯލިހާއެކު މަޝްވަރާތައް ކުރެއްވި ކަމަށާއި, ކެޕޭސިޓީ އިތުރު ކުރައްވާނެ ކަމަށް ރައީސް ކުޑަ ވަގުތުކޮޅެއްގެ ތެރޭގައި ވިދާޅުވި ކަމަށް ވެސް އާޒިމް ވިދާޅުވިއެވެ. އަދި ސަރުކާރުން ވެދެވެން ހުރި ހުރިހާ އެއްބާރުލުމެއް ދެއްވާނެ ކަމަށް ރައީސް ވިދާޅުވި ކަމަށް އާޒިމް ވިދާޅުވިއެވެ.
އެމްޓީސީސީއާ ހަވާލުކޮށްފައިވާ ހުރިހާ މަސައްކަތްތައް, ކަނޑައެޅިފައިވާ މުއްދަތަށް ނިންމޭނެކަމުގެ ޔަގީންކަން އެބައޮތް ކަމަށް ވެސް އާޒިމް ވިދާޅުވިއެވެ.
ފުވައްމުލަކުގެ އިހުގެ ނެރު ސަރަހައްދުގައި މީގެ ކުރިން އެކި ހިތާމަވެރި ހާދިސާތައް ހިނގާފައިވާއިރު, ބައެއް މީހުން އެތަނަށް މޫދަށް އެރި އުޅުމުގެ ތެރޭގައި ވަނީ ނިޔާވެފައެވެ. އަދި މިކަމާއި ގުޅިގެން އެ ރަށުގެ ގިނަ އަދަދެއްގެ އާންމުން ވަނީ ކަންބޮޑުވުން ފާޅުކޮށްފައެވެ.
