ރާއްޖޭގެ ގައުމީ ފުޓްބޯޅަ ޓީމުން ކުރެއްދޫ އައިލެންޑް ރިސޯޓުގައި ޚާއްސަ މެޗެއް ކުޅޭ ގޮތަށް ހަމަޖެހިއްޖެއެވެ.

މި މެޗަކީ ގައުމީ ޓީމަށް ހިތްވަރުދެއްވުމަށް މަޝްހޫރު ވިޔަފާރިވެރިޔާ މުޙައްމަދު މޫސާ (އުއްޗު) ދެއްވި ދައުވަތަކަށް ކުޅެވިގެންދާ މެޗެކެވެ. އަންނަ ހުކުރު ދުވަހުގެ ހަވީރު ކުރެއްދޫގައި މި މެޗު ކުޅޭއިރު، މި މެޗުގައި ގައުމީ ޓީމާ ދެކޮޅަށް ނުކުންނާނީ ކުރެއްދޫ އައިލެންޑް ރިސޯޓުގެ ޓީމެވެ.

ހުކުރު ދުވަހުގެ ހަވީރު 16:00 ގައި ކުޅޭ މި މެޗުން މޮޅުވާ ޓީމަކަށް ޚާއްސަ އިނާމެއް ދެއްވުމަށް އުއްޗު ވަނީ ނިންމަވާފައެވެ. އަދި މި ޚާއްސަ މެޗު "ރާއްޖެޓީވީ" އިން ވަގުތުން ގެނެސްދިނުމަށް ވަނީ ހަމަޖެހިފައެވެ. އަދި މި މެޗު "ރާއްޖެ.އެމްވީ" އިން ލައިވް ސްޓްރީމް ކުރާގޮތަށްވެސް ވަނީ ހަމަޖެހިފައެވެ.

ކުރެއްދޫގައި ގައުމީ ޓީމުން ޚާއްސަ މެޗެއް ކުޅޭއިރު، ހޮނިހިރު ދުވަހު ގައުމީ ޓީމުން ވަނީ ހދ. ކުޅުދުއްފުށި ސިޓީގައިވެސް ޚާއްސަ މެޗެއް ކުޅެފައެވެ. އެ މެޗަކީ ކުޅުދުއްފުށީގައި ސަރުކާރުގެ ފަރާތުން އެޅި ފެންވަރު ރަނގަޅު ޓާފް ދަނޑު ހުޅުވުމުގެ ގޮތުން ކުޅުނު މެޗެކެވެ. އެ މެޗުން ގައުމީ ޓީމު މޮޅުވީ ފަސޭހަކަމާއެކު 6-0 ގެ ނަތީޖާއަކުންނެވެ.

ކުޅުދުއްފުށީ ޓާފް ދަނޑު ރަސްމީކޮށް ހުޅުވުމަށް ހޮނިހިރު ދުވަހުގެ ހަވީރު ގައުމީ ޓީމުން ޚާއްސަ މެޗެއް ކުޅުނުއިރު، އެ މެޗަކީ މި މަހު މާލޭގައި ކުރިއަށްދިޔަ "އުރީދޫ ސާފް ޗެމްޕިއަންޝިޕް 2021" އަށްފަހު ގައުމީ ޓީމުން ކުޅުނު ފުރަތަަމަ މެޗެވެ. އެކަމަކު އެ މެޗުގައި ގައުމީ ޓީމުގެ ސްކޮޑަށް ބައެއް ބަދަލުތައް ގެނައިރު، ކުޅިވަރާ ބެހޭ ވަޒީރު އަޙްމަދު މަޚްލޫފުވެސް ވަނީ ގައުމީ ޓީމަށް ކުޅުއްވާފައެވެ.

ގައުމީ ޓީމަށް ދެން އެންމެ އަވަހަށް އޮތް މުބާރާތަކީ އަންނަ ނޮވެމްބަރު މަހު ސްރީ ލަންކާގައި ބޭއްވުމަށް ހަމަޖެހިފައިވާ މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) އެވެ. މުބާރާތުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. އެ މުބާރާތަށް ތައްޔާރުވުމުގެ ގޮތުން ހޯމަ ދުވަހު ގައުމީ ޓީމުން ފަރިތަކުރުންތައް ފެށުމަށް ވަނީ ހަމަޖެހިފައެވެ.