އދ. ދަނގެތިން ހައްޔަރު ކުރި މުހައްމަދު ޖަމްޝާދާއި، ޝާރިހު އަލީ އަދި އިތުރު އަންހެނެއް ހައްޔަރުކުރީ އެރަށު ރައްޔިތުންގެ ހިތުގައި ބިރުވެރިކަން އުފެދޭ ގޮތަށް އަމަލުކޮށް، ރަށުގެ އާންމު މަސްލަހަތު ނަގާލަން މަސައްކަތް ކުރާ ކަމަށް ތުހުމަތު ކުރެވޭތީ ކަމަށް ފުލުހުން ބުނެފިއެވެ.

ރާއްޖެއެމްވީއަށް ފުލުހުންގެ މީޑިއާ އޮފިސަރު ވިދާޅުވީ އޮކްޓޫބަރު މަހުގެ 14 ވަނަ ދުވަހު ދަނގެތިން ފުލުހުންގެ ބެލުމުގެ ދަށަށް ގެނައި 20 އަހަރުގެ ފިރިހެން މީހާއާއި 31 އަހަރުގެ ފިރިހެން މީހާ އޮކްޓޫބަރު މަހުގެ 23 ވަނަ ދުވަހު ފުލުހުންގެ ބަންދުން ދޫކޮށްލާފައިވާ ކަމަށެވެ. އަދި 21 އަހަރުގެ އަންހެން މީހާ އޮކްޓޫބަރު މަހުގެ 21 ވަނަ ދުވަހު ފުލުހުންގެ ބެލުމުގެ ދަށުން ދޫކޮށްލާފައިވާ ކަމަށެވެ.

ފުލުހުން ބުނީ އެތިން މީހުން ފުލުހުންގެ ބެލުމުގެ ދަށަށް ގެނެސްފައިވަނީ ދަނގެތި ރައްޔިތުންގެ ހިތުގައި ބިރުވެރިކަން އުފެދޭ ގޮތަށް އަމަލުކޮށް، ރަށުގެ އާންމު މަސްލަހަތު ނަގާލަން މަސައްކަތް ކުރާ ކަމަށް ތުހުމަތު ކުރެވޭތީ މުޖުތަމައުގެ ސަލާމަތަށާއި، އަދި އެމީހުންގެ ރައްކާތެރިކަމަށެވެ.

އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި ދަނގެތީގެ ވިޔަފާރިވެރިޔާ 57 އަހަރުގެ މަހުމޫދު އަބޫބަކުރު ގެއްލިގެން ހޯދަނިކޮށް ފެނުނީ ބޮލަށާއި ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ.

މި މަރާ ގުޅިގެން އެރަށުގެ ރައްޔިތުން ޖަމްޝާދާއި، ޝާރިހަށް ތުހުމަތު ކުރިއެވެ. އެ މައްސަލައާ ގުޅިގެން އެ ދެމީހުންގެ އިތުރުން އިތުރު އަންހެނަކަށް ހިމާޔަތް ދީގެން އދ. މަހިބަދޫ ގެންދިޔައެވެ. އަދި އެމީހުން ހައްޔަރުކުރީ އެހެން މައްސަލައެއްގައި ކަމަށް ފުލުހުން ހާމަކޮށްފައިވަނީ މި މަހުގެ 15 ވީ ހުކުރު ދުވަހުގެ ވަގުތެއްގައެވެ.

މަހުމޫދު މަރުގެ މައްސަލައާ ގުޅިގެން އެރަށުގައި ގިނަ އަދަދެއްގެ ފުލުހުން ދަނީ ހަރަކާތްތެރިވަމުންނެވެ. ރަށުގެ އެކި ސަރަހައްދުތައް ބަންދުކޮށްފައިވާއިރު، ތަހުގީގަށް ބޮޑެތި ކުރިއެރުންތަކެއް ލިބިފައިވެއެވެ. އަދި ތަހުގީގަށް ބޭނުންވާ ބައެއް ހެކިތައް ހޯދިފައިވެއެވެ. އެގޮތުން މަހުމޫދުގެ މޯބައިލް ފޯނު ހޯދާފައިވާ ކަމަށް މައުލޫމާތު ލިބެއެވެ.

މަހުމޫދު މަރާލި މައްސަލައިގެ ތުހުމަތުގައި ބަންގްލަދޭޝް ރައްޔިތެއް ކަމަށްވާ މުހައްމަދު ސާލިމް މި މަހުގެ 16 ވީ ހޮނިހިރު ދުވަހު ހައްޔަރުކުރި ނަމަވެސް އޭނާ އެކަނި މި އަނިޔާވެރި އަމަލު ނުހިންގޭނެ ކަމަށް އާއިލާއިން ބުނެއެވެ. ސާލިމް އަކީ މަޑުމައިތިރި، ނަމާދު ކުރާ ރަނގަޅު މީހެއް ކަމަށާއި، އޭނާ އެފަދަ ކަމެއް ކުރާނެ ކަމަށް ގަބޫލުކުރަން ދަތިކަމަށް ވެސް އާއިލާއިން ބުނެއެވެ.