ޓީސީ އަތުން މޮޅުވާން ކުރެވެން ހުރި ހުރިހާ ކަމެއް ކުރާނަން:ފެސްކޯ

ކޮންމެ މެޗަކީވެސް މޮޅުވާން މުހިންމު މެޗެއް ކަމަށާއި، އެންމެ މެޗަކުން ބަލިވި ނަމަވެސް އެއީ ދިމާވާ ޕްރެޝަރެއް ކަމަށް ވެލެންސިއާގެ ކޯޗް އަހުމަދު މުޖުތަބާ (ފެސްކޯ) ބުނެފިއެވެ

އެސްޓީއޯ މާލެ ލީގުގެ ދެވަނަ ބުރުގައި ޓީސީ އާއިދެކޮޅަށް ބުރާސްފަތި ދުވަހު ނިކުންނަ މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ފެސްކޯ ބުނީ، ލީގުގެ ކުޅުން މިހާރު ވަރަށް ވާދަވެރި ކަމަށާއި، އެހެންކަމުން އެންމެ މެޗަކުން ބަލިވި ނަމަވެސް އެއީ ކުރިމަތިވާ ޕްރެޝަރެއް ކަމަށެވެ. އަދި އެއީ ހަމައެކަނި ވެލެންސިއާއަށް ދިމާވާ ކަމެއް ނޫން ކަމަށާއި، ކޮންމެ ޓީމަކަށްވެސް މި ދަނޑިވަޅުގައި ކޮންމެ މެޗެއްވެސް ކާމިޔާބުކުރުން ވަރަށް މުހިންމު ކަމަށް ފެސްކޯ ބުންޏެވެ. އެގޮތުން ބުރަސްފަތި ދުވަހު ޓީސީ އާއި ދެކޮޅަށް ކުޅޭ މެޗް ކާމިޔާބުރަން ކުރެވެންހުރި ހުރިހާ ކަމެއް ކުރާނެ ކަމަށްވެސް ފެސްކޯ ބުންޏެވެ.

އިތުރަށް ވާހަކަ ދައްކަމުން ފެސްކޯ ބުނީ، މެޗަށް ފަހު ބޮޑު ބްރޭކަކަށް ދާން ޖެހުމަކީ އެއް ނަޒަރަކުން ބަލާނަމަ އެޑްވާންޓޭޖެއް ކަމަށާއި، ނަމަވެސް ހާލަތާއި ދަނޑިވަޅަށް ބަލާނަމަ އެނާ ދެކޭ ގޮތުގައި އެއީ ޑިސްއެޑްވާންޓޭޖެއް ކަމަށެވެ. ސަބަބަކީ ބްރޭކް ލިބޭ ދުވަސްވަރު ރޯދައަށް ދިމާވެފައި ފަރިތަކުރުންތައް ރޭގަނޑުގައި ކުރިއަށް ގެންދަން ޖެހޭއިރު، ދަނޑުގެ ޖާގައިގެ ދަތިކަމާއި ވަގުތުގެ ދަތިކަން ދިމާވާނެ ކަމަށް ފެސްކޯ ވަނީ ފާހަގަ ކޮށްފައެވެ.

ލީގުގައި މިހާތަނަށް ކުޅުނު އެއްވެސް މެޗަކުން ވެލެންސިއާ މޮޅުވެފައި ނުވާއިރު، އެޓީމު އޮތީ އެންމެ ޕޮއިންޓަކާއެކު ތާވަލުގެ އެންމެ ފުލުގައެވެ. ނަމަވެސް ފެސްކޯ ބުނީ ލީގުގެ ގަދަ ހަތަރަކަށް ވަނުމުގެ ފުރުސަތު ވެލެންސިއާއަށް އެއްކޮށް ބަނދުވީ ކަމަށް ނުބުނާނަން ކަމަށާއި، ނަމަވެސް މިހާރު އޮތީ ވަރަށް ހަނި ފުރުސަތެއް ކަމަށެވެ.

ވެލެންސިއާ އާއި ޓީސީ ބައްދަލުކުރާ މެޗް އޮންނާނީ ބުރާސްފަތި ދުވަހުގެ ހަވީރު ގަލޮޅު ރަސްމީ ފުޓުބޯޅަ ދަނޑުގައެވެ.