އެގްރޯ ބޯޓު ބަނުމަށްޓަކައި ފަންޑު ވަނީ ހަމަޖެހިފައި: އެގްރޯނެޓް
22 އޮކްޓޯބަރު 2021 | ހުކުރު 07:32ހައްދާ ބާވަތްތައް ރާއްޖޭގެ އެއް ހިސާބުން އަނެއް ހިސާބަށް ގެންދިޔުމަށް ގޮންޖެހުންތަކާ ކުރިމަތިވަމުންދޭ
ވީ މާރުކޭޓް
އެގްރޯ ބޯޓު ބަނުމަށްޓަކައި ފަންޑު ހަމަޖެހިފައިވާ ކަމަށް ނެޝަނަލް ކޯޕަރޭޝަން (އެގްރޯނެޓް) ގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ހާރޫން ވިދާޅުވީ ރާއްޖޭގައި ހައްދާ ބާވަތްތައް ރާއްޖޭގެ އެއް ހިސާބުން އަނެއް ހިސާބަށް ގެންދިޔުމަށް ގޮންޖެހުންތަކާ ކުރިމަތިވަމުންދާކަމަށެވެ. އަދި މިހާރު ދަނޑުވެރިން ހައްދާ ބައެއް ތަކެތި އެއްރަށުން އަނެއް ރަށަށް ގެންދަނީ މުދާ އުފުލާ ބޯޓު ފަހަރު މެދުވެރިކޮށް ކަަމަށް އޭނާ ވިދާޅުވިއެވެ.
ނަމަވެސް އެގްރޯނެޓްގެ ބޯޓާއެކު މި ދަތިތަކަށް ހައްލެއް ލިބިގެންދާނެ ކަމަށް ވަނީ ވިދާޅުވެފައެވެ. ހާރޫން ވިދާޅުވީ ޔޫއެންޑީޕީގެ އެހީތެރިކަމާއެކު އެގްރޯ ބޯޓު ބަނުމަށް ފަންޑު ހަމަޖެހިފައިވާ ކަމަށާއި އަންނަ އަހަރު މި ބޯޓު ވުޖޫދުވެގެންދާނެ ކަމަށް ވިދާޅުވިއެވެ. އަދި އެމަސައްކަތް ކުރަމުންދާ ކަމަށް ވެސް ވިދާޅުވިއެވެ.
ހާރޫން ވިދާޅުވީ މިހާރު ދަނޑުވެރިންނަށް ދިމާވެފައިވާ އެންމެ ބޮޑު ގޮންޖެހުމަކީ ދަނޑު ހެއްދުމަށް ބޭނުންވާ ވަރަށް ބިން ނުލިބުން ކަމަށެވެ. ބިން ބޮޑެތި ރަށްރަށުން ވެސް ދަނޑު ހެއްދުމަށް ބިން ހޯދުމަށް ދަތިތަކާ ކުރިމަތިވާކަމުގެ ޝަކުވާ ދަނޑުވެރިން ކުރާކަމަށް ހާރޫން ވިދާޅުވިއެވެ. ބިމުގެ މައްސަލައަށް ހައްލުހޯދުމަށް ސަރުކާރުން ގެންގުޅޭ ސިޔާސަތަކީ ޒަމާނީ ޓެކްނޮލޮޖީގެ ވަސީލަތްތައް ގާއިމުކޮށްގެން އެކަން ކުރުންކަމަށް ހާރޫން ވިދާޅުވިއެވެ.
މި ސިނާއަތްތަކީ މުސްތަގްބަލް އޮތް ސިނާއާތެއްކަން ފާހަގަކުރައްވާ ހާރޫން ވިދާޅުވީ ދަނޑުވެރިކަމުގެ ސިނާއަތަށް ޒުވާނުން ނިކުންނަ އިންސައްތަ އިތުރުކުރަން ޖެހިފައިވާ ކަމަށެވެ. ހާރޫން މިހެން ވިދާޅުވެފައިވާއިރު ދަނޑުވެރިކަމުގެ ސިނާއަތަށް ޒުވާނުން ނެރުން މުހިންމު ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވެސް ވަނީ ވިދާޅުވެފައެވެ.
ދަނޑުވެރިކަމުގެ ދުވަހާއި ދުނިޔޭގެ ކާބޯތަކެތީގެ ދުވަސް ފާހަގަކުުރުމަށް ތ. ކަނޑޫދޫގައި ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ސިނާއީ ފެންވަރެއްގައި ދަނޑުވެރިކަން ކުރާނެ ޒުވާނުން އުފެދިގެން ދިޔުމަކީ ސަރުކާރުގެ އުންމީދު ކަމަށާއި ސަރުކާރުން އެކަމަށް ބޭނުންވާ މަގު ފަހިކޮށްދޭނެ ކަމަށެވެ.
ރިސޯޓުތަކުން ބޭނުންވަނީ ތަކެތި މެދުނުކެނޑި ލިބޭނެ ކަމުގެ ޔަގީންކަން ކަމަށާއި ދަނޑުވެރިން ވެސް ބޭނުންވަނީ ހައްދާ ތަކެތި ވިއްކޭނެ ކަމުގެ ޔަގީންކަމަށްވާއިރު ސަޕްލައި ލިބޭނެކަމުގެ ޔަގީންކަން ސަރުކާރުން ފޯރުކޮށްދޭނެ ކަމަށް ރައީސް ވަނީ ވިދާޅުވެފައެވެ. ދަނޑުވެރިކަން ހިއްސާ ކުރަނީ ރާއްޖޭގެ ޖީޑީޕީގެ 1.6 އިންސައްތަކަން ފާހަގަކުރައްވައި ރައީސް ވިދާޅުވީ ރާއްޖޭގައި ދަނޑުވެރިކަން ފުޅާ ދާއިރާއެއްގައި ކުރެވޭނެ ކަމަށެވެ. އެގޮތުން ރާއްޖޭގައި މާކެޓް އެބައޮތް ކަމަށެވެ.
ރައީސް އިތުރަށް ވިދާޅުވީ ކޮވިޑާ ގުޅިގެން ތަޖުރިބާގެ އަލީގައި ކަންތައްތަކެއް ދަސްވި ކަމަށާއި މޫސުމަށް އަންނަ ބަދަލުތަކުން ރައްޔިތުންގެ ދިިރިއުޅުމަށް ބޮޑެތި ބަދަލުތައް ގެންނަން ޖެހިފައިވާ ކަމަށެވެ. ކާބޯތަކެތީގެ ސަލާމާތާއި ރައްކާތެރިކަން ކަށަވަރުކޮށްދޭން ޖެހޭ ކަމަށާއި ދަނޑުވެރިންނަށް ދިމާވާ ވަރަށް ބޮޑެތި ގޮންޖެހުންތައް އެބަހުރިކަމަށް ވެސް ރައީސް ފާހަގަކުރެއްވިއެވެ. އެގޮތުން ދަނޑުވެރިންނަށް ކުރިމަތިވާ އެންމެ ބޮޑު ގޮންޖެހުމަކީ ދިގު މުއްދަތަކަށް ބިން ނުލިބުން ކަމަށް ވެސް ވިދާޅުވިއެވެ. ދަނޑުވެރިކަން ބޮޑަށް ކުރަމުން އަންނަނީ މީހުން ދިރިއުޅޭ ރަށްރަށުގައި ކަމަށްވާއިރު ކައުންސިލްތަކާ ވާހަކަދައްކައިގެން ފަސޭހައިން ބިން ލިބޭނެ އިންތިޒާމު ހަމަޖެއްސުމުގެ މަސައްކަތް ކުރައްވާނެ ކަމަށް ވިދާޅުވިއެވެ.
ދަނޑުވެރިން ހިއްސާކޮށްފައިވާ ބައެއް ކަންބޮޑުވުންތަކަށް ބަލާއިރު ތާޒާ ކަންމަތީގައި އުފައްދާ ތަކެތި ބާޒާރަށް ނެރުމާއި ހަމަ އަގު ނުލިބުމާއި ޓެކްނޮލޮޖީގެ ވަސީލަތައް ދަނޑުވެރިންނާއި ހަމައަށް ފޯރުކޮށް ނުދެވޭ ކަމަށް ރައީސް ވިދާޅުވިއެވެ. ވިސްނުމަކީ ރާއްޖޭގައި އުފައްދާ ބާވަތްތައް ރާއްޖޭގައި ބޭނުންވާ ވަރަށް އުފެއްދޭނެ ޕްލޭނަކާއެކު ކުރިއަށް ގެންދިޔުމާއި އެފަދަ ބާވަތްތައް އެތެރެ ކުރާ ގައުމުތަކުން އިމްޕޯޓް ޑިއުޓީ ބޮޑުކުރުން ކަމަށް ރައީސް ވިދާޅުވިއެވެ. ލޯނު ލިބުމުގެ ދަތިކަން ދަނޑުވެރިންނަށް ހުރިިއިރު ލޯނުތަކަށް ވާސިލްވެވޭނެ ގޮތްތައް މިނިސްޓްރީ ހަމަޖައްސާނެ ކަމަށް ވެސް ވިދާޅުވިއެވެ.
ތަކެތި ހެއްދުމުގައި ބޭނުންކުރާ ކެމިކަލް ކާނާ ބޭނުން ނުކުރުމަށް ރައީސް ވަނީ އިލްތިމާސް ކުރައްވާފައެވެ. އަދި މިކަމުގެ ބައެއް ބަލިތަކަށް ފުރުސަތު ބޮޑުވެގެންދާކަމަށް ބެލެވިފައިވާ ކަމަށާއި އެކަންތައްތައް އިތުރަށް ދިރާސާ ކުރުމުގެ މަސައްކަތް ގައުމީ ޔުނިވަރސިޓީއާއެކު ކުރަމުންދާ ކަމަށް ރައީސް ވިދާޅުވިއެވެ. އޯގަނިކް ފާމިންގއަށް ސަމާލުކަން ދިނުމަށް ރައީސް ވަނީ ބާރު އަޅުއްވާފައެވެ.
