އޭއީއެޗްގެ ސީއީއޯއަށް ފުރިހަމަ އިތުބާރު އެބައޮތް: މޭޔަރ ނިޒާރު
ސިއްޙީ ޚިދުމަތްތަކާމެދު ދެކޭ ހުވަފެން ދަނީ ހަގީގަތަކަށް ވަމުން
އައްޑޫސިޓީ މޭޔަރ ޢަލީ ނިޒާރު
އައްޑޫ އެކުއެޓޯރިއަލް ހޮސްޕިޓަލުގެ ޗީފް އެގްޒެކްޓިވް އޮފިސަރ ޑރ. މުޙައްމަދު ސާލިޙުއަށް ފުރިހަމަ އިތުބާރު އެބައޮތްކަމަށް އައްޑޫސިޓީގެ މޭޔަރ ޢަލީ ނިޒާރު ވިދާޅުވެއްޖެއެވެ.
ނިޒާރު މިހެން ވިދާޅުވީ އޭއީއެޗުން ލިބެމުންދާ ޚިދުމަތްތަކާމެދު ނުރުހި ގިނަ ބައެއްގެ ފާޑުކިޔުން އަމާޒުވެފައިވަނިކޮށް ބުރާސްފަތި ދުވަހުރޭ ހޮސްޕިޓަލުގައި ބޭއްވި ޓްރޭނިން ޕްރޮގްރާމެއް ނިންމުމުގެ ރަސްމިއްޔާތުގައި ވާހަކަ ދައްކަވަމުންނެވެ.
މި ރަސްމިއްޔާތުގައި މޭޔަރ ޢަލީ ނިޒާރު ދެއްކެވި ވާހަކައިގައި ހޮސްޕިޓަލަށް ލިބެމުން އަންނަ ކުރިއެރުމާއި ކަންކަން ރަނގަޅުވަމުންދާ ކަމުގެ ހެކި ހަމަލޮލުން ފެނިވަޑައިގަންނަވާ ކަމަށާއި، ކާމިޔާބު މި ޓްރޭނިން އިން އެކަނިވެސް އެކަން ވަޒަން ކުރެވިއްޖެ ކަމަށް ވިދާޅުވިއެވެ. ހޮސްޕިޓަލުގެ ކަންކަން ރަނގަޅު ނުވެގެން ގިނަ ބައެއްގެ ޝަކުވާ އުފުލި އެކަންކަމަށް ޙައްލު ހޯދުމުގައި ސަރުކާރުން އެޅުއްވި ފިޔަވަޅާއެކު އައްޑޫސިޓީއަށް ނިސްބަތްވާ ޑރ. ސާލިޙު ފަދަ ތަޖުރިބާކާރު ބޭފުޅެއްގެ ދުރު ވިސްނުންފުޅާއެކު އެދެވޭ ހެޔޮ ބަދަލުތަކެއް އަންނަމުންދާކަން ވަރަށް ގާތުން ފެނިވަޑައިގަންނަވާ ކަމަށާއި މުޅި އައްޑޫސިޓީގެ ރައްޔިތުންނަށް ވެސް މިކަމުގެ އުފާވެރި ޚަބަރު ފޯރުކޮށްދެއްވަން ބޭނުންފުޅުވާ ކަމަށް ނިޒާރުވިދާޅުވިއެވެ.
ނިޒާރު އިތުރަށް ވިދާޅުވީ ހޮސްޕިޓަލް ބޯޑުގެ ޗެއަރޕާސަން އަޙްމަދު ޒާހިރަށާއި މުޅި ބޯޑަށް ވެސް އިތުބާރު އެބައޮތްކަމަށާއި އެހެންކަމުން ހޮސްޕިޓަލުގެ ކަންކަން ހަމަޔަކަށް އެޅިގެންދާނެ ކަމުގެ އުއްމީދު ވަރަށް ބޮޑު ކަމަށެވެ.
