ގައުމީ ޓީމުގެ އައު ކޯޗަކަށް އިޓަލީއަށް ކުޅުނު މޮރިއޭރޯ

ރާއްޖޭގެ ގައުމީ ފުޓްބޯޅަ ޓީމުގެ އައު ކޯޗަކަށް އިޓަލީ އާއި އިންޓަ މިލާނަށް މީގެ ކުރިން ކުޅުނު މިޑްފީލްޑަރު ފްރެންސެސްކޯ މޮރިއޭރޯ ހަމަޖައްސައިފިއެވެ.

ބުރާސްފަތި ދުވަހުގެރޭ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވަނީ ގައުމީ ޓީމުގެ އައު ކޯޗަކަށް މޮރިއޭރޯ ހަމަޖެއްސިކަން އިއުލާންކުރައްވާފައެވެ. މައުލޫމާތު ލިބޭ ގޮތުން އުމުރުން 52 އަހަރުގެ މޮރިއޭރޯ ރާއްޖޭގެ ގައުމީ ޓީމާ ހަވާލުވީ އެއް އަހަރުގެ އެއްބަސްވުމެއްގެ ދަށުންނެވެ.

ރާއްޖޭގެ ގައުމީ ޓީމާ މޮރިއޭރޯ ހަވާލުވިއިރު، އޭނާ އެންމެ ފަހުން މަސައްކަތްކުރީ އަލްބޭނިއާގެ ޑީނަމޯ ޓިރަނާގައެވެ. އަދި މީގެ ކުރިން އައިވަރީ ކޯސްޓުގެ ކުލަބު އެފްރިކާ ސްޕޯޓްސްގައިވެސް ވަނީ މަސައްކަތްކޮށްފައެވެ. އަދި އިޓަލީގެ ދެވަނަ ޑިވިޝަނާއި ތިންވަނަ ޑިވިޝަނުގެ ކުލަބުތަކަށްވެސް މޮރިއޭރޯ ވަނީ ކޯޗުކަންކޮށްދީފައެވެ.

އެއަށްފަހު ރާއްޖޭގެ ގައުމީ ޓީމާ މޮރިއޭރޯ ހަވާލުވިއިރު، މިއީ ގައުމީ ޓީމަކަށް މޮރިއޭރޯ އިރުޝާދުދޭނެ ފުރަތަމަ ފަހަރެވެ. އަދި މިއީ އޭޝިއާގައި އޭނާ މަސައްކަތް ކުރާނެ ފުރަތަމަ ފަހަރުވެސްމެއެވެ.

މޮރިއޭރޯގެ ފުޓްބޯޅަ ކުޅުމުގެ ކެރިއަރަށް ބަލާއިރު އޭނާ ވަނީ އިޓަލީގެ ލެޗޭ އާއި، ކަލިއަރީ އާއި، ރޯމާ އާއި، އިންޓަގެ އިތުރުން ނާޕޮލީއަށްވެސް ކުޅެފައެވެ. އަދި ސެޒާ މަލްޑިނީގެ ކޯޗުކަމުގައި އިޓަލީގެ ގައުމީ ޓީމުން ފުރުސަތު ހޯދި މޮރިއޭރޯ ވަނީ 1998 ވަނަ އަހަރުގެ ފީފާ ވޯލްޑް ކަޕުގައިވެސް ކުޅެފައެވެ.

ގައުމީ ޓީމުގެ އައު ކޯޗަކަށް މޮރިއޭރޯ ހަމަޖެއްސިއިރު، އޭނާ ވެގެންގޮސްފައިވަނީ މި އަހަރު ތެރޭގައި ގައުމީ ޓީމަށް ކޯޗުކަންކޮށްދޭނެ ތިންވަނަ ކޯޗަށެވެ. އެގޮތުން މީގެ ކުރިން ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެއިން ނެރުނު ދަށް ނަތީޖާތަކުގެ ސަބަބުން ނެދަލެންޑްސްގެ މާޓިން ކޫޕްމަން ވަނީ މަގާމުން ވަކިކޮށްފައެވެ. އަދި މި ފަހުން ނިމުނު "އުރީދޫ ސާފް ޗެމްޕިއަންޝިޕް 2021" ގައި ގައުމީ ޓީމުގެ ކޯޗުކަމުގެ މަގާމާ ވަގުތީ ގޮތުން ހަވާލުވީ އެސިސްޓަންޓް ކޯޗު އަލީ ސުޒޭނެވެ.

ގައުމީ ޓީމުގެ ކޯޗުގެ މަގާމާ މޮރިއޭރޯ ހަވާލުވިއިރު، އަންނަ ނޮވެމްބަރު މަހު ސްރީ ލަންކާގައި ބޭއްވުމަށް ހަމަޖެހިފައިވާ މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) ގައި ރާއްޖެ ވާދަކުރާނެއެވެ. އެ މުބާރާތުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. އަންނަ މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށް މުބާރާތް ބާއްވާއިރު، ރާއްޖޭން ކުޅޭ ފުރަތަމަ މެޗުގައި އަށްވަނަ ދުވަހުގެރޭ ނުކުންނާނީ ލަންކާއާ ދެކޮޅަށެވެ. އަދި އޭގެ ފަހުން 11 ވަނަ ދުވަހު ހަވީރު ބަންގްލަދޭޝްއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހެވެ.