އިޓަލީއަށް ކުޅުނު މޮރިއޭރޯ ރާއްޖޭގެ ގައުމީ ޓީމާ ހަވާލުވަނީ

ރާއްޖޭގެ ގައުމީ ފުޓްބޯޅަ ޓީމުގެ އައު ކޯޗަކަށް އިޓަލީ އާއި އިންޓަ މިލާނަށް މީގެ ކުރިން ކުޅުނު މިޑްފީލްޑަރު ފްރެންސެސްކޯ މޮރިއޭރޯ ހަމަޖައްސާފައިވާ ކަމަށް އިޓަލީގެ މީޑިއާ ރިޕޯޓުތައް ބުނެފިއެވެ.

ރިޕޯޓުތައް ބުނާ ގޮތުން އުމުރުން 52 އަހަރުގެ މޮރިއޭރޯ ވަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއެކު އެއް އަހަރު ދުވަހުގެ އެއްބަސްވުމެއްގައި ސޮއިކުރަން ނިންމާފައެވެ. އެހެންކަމުން އަވަސް މުސްތަގުބަލެއްގައި ރަސްމީކޮށް ގައުމީ ޓީމާ މޮރިއޭރޯ ހަވާލުވާނެ ކަމަށްވެސް ރިޕޯޓުތައް ބުނެއެވެ.

ރާއްޖޭގެ ގައުމީ ޓީމާ މޮރިއޭރޯ ހަވާލުވާއިރު، އޭނާ އެންމެ ފަހުން މަސައްކަތް ކުރީ އަލްބޭނިއާގެ ޑީނަމޯ ޓިރަނާގައެވެ. އަދި މީގެ ކުރިން އައިވަރީ ކޯސްޓުގެ ކުލަބު އެފްރިކާ ސްޕޯޓްސްގައިވެސް އޭނާ ވަނީ މަސައްކަތްކޮށްފައެވެ. އަދި އިޓަލީގެ ދެވަނަ ޑިވިޝަނާއި ތިންވަނަ ޑިވިޝަނުގެ ކުލަބުތަކަށްވެސް މޮރިއޭރޯ ވަނީ ކޯޗުކަން ކޮށްދީފައެވެ.

ފުޓްބޯޅަ ކުޅުމުގެ ކެރިއަރަށް ބަލާއިރު މޮރިއޭރޯ ވަނީ އިޓަލީގެ ލެޗޭ އާއި، ކަލިއަރީ އާއި، ރޯމާ އާއި، އިންޓަގެ އިތުރުން ނާޕޮލީއަށްވެސް ކުޅެފައެވެ. އަދި ސެޒާ މަލްޑިނީގެ ކޯޗުކަމުގައި އިޓަލީގެ ގައުމީ ޓީމުން ފުރުސަތު ހޯދި މޮރިއޭރޯ ވަނީ 1998 ވަނަ އަހަރުގެ ފީފާ ވޯލްޑް ކަޕުގައި ކުޅެފައެވެ.

ރާއްޖޭގެ ގައުމީ ޓީމާ މޮރިއޭރޯ ހަވާލުވާނެ ކަމަށް ރިޕޯޓުތައް ބުނިއިރު، މިއީ ގައުމީ ޓީމަކަށް މޮރިއޭރޯ އިރުޝާދުދޭނެ ފުރަތަމަ ޓީމަށެވެ. އަދި މިއީ އޭޝިއާގައި އޭނާ މަސައްކަތް ކުރާނެ ފުރަތަމަ ފަހަރުވެސްމެއެވެ.

މޮރިއޭރޯ ވެގެންދާނީ މި އަހަރު ތެރޭގައި ގައުމީ ޓީމަށް ކޯޗުކަންކޮށްދޭނެ ތިންވަނަ ކޯޗަށެވެ. މީގެ ކުރިން ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެއިން ނެރުނު ދަށް ނަތީޖާތަކުގެ ސަބަބުން ނެދަލެންޑްސްގެ މާޓިން ކޫޕްމަން ވަނީ މަގާމުން ވަކިކޮށްފައެވެ. އަދި މި ފަހުން ނިމުނު ސާފް ޗެމްޕިއަންޝިޕަށް ގައުމީ ޓީމުގެ ކޯޗުކަމުގެ މަގާމާ ވަގުތީ ގޮތުން ހަވާލުވީ އެސިސްޓަންޓް ކޯޗު އަލީ ސުޒޭންއެވެ.

މައުލޫމާތު ލިބޭ ގޮތުން މޮރިއޭރޯއާއެކު ރާއްޖޭން އެންމެ އަވަހަށް ނުކުންނާނީ ސްރީ ލަންކާގައި އަންނަ ނޮވެމްބަރު މަހު ބޭއްވުމަށް ހަމަޖެހިފައިވާ މަހިންދަ ރާޖަޕަކްސަ އިންޓަނޭޝަނަލް މުބާރާތަށެވެ.

ހަތަރު ގައުމު މި މުބާރާތުގައި ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. އަންނަ މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށް މުބާރާތް ބާއްވާއިރު، ރާއްޖޭން ކުޅޭ ފުރަތަމަ މެޗުގައި އަށްވަނަ ދުވަހުގެރޭ ނުކުންނާނީ ލަންކާއާ ދެކޮޅަށެވެ. އަދި އޭގެ ފަހުން 11 ވަނަ ދުވަހު ހަވީރު ބަންގްލަދޭޝްއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހެވެ.