ޓީ20 ކޮލިފައިންއަށް ގައުމީ ކްރިކެޓް ޓީމު ގަތަރަށް

މި މަހު ކުޅެން ނިންމާފައިވާ ކްރިކެޓުގެ ޓީ20 ވޯލްޑް ކަޕް ކޮލިފައިންގައި ވާދަކުރުމަށް ރާއްޖޭގެ ގައުމީ ކްރިކެޓް ޓީމު ގަތަރަށް ފުރައިފިއެވެ.

މި ފަހަރުގެ ކޮލިފައިންގައި ގައުމީ ޓީމު ވާދަކުރާއިރު، މިއީ ރާއްޖޭން 2019 ވަނަ އަހަރުގެ ސައުތު އޭޝިއަން ގޭމްސްގައި ވާދަކުރި ފަހުން ބައިނަލްއަގުވާމީ ކްރިކެޓް މެޗުތަކަކަށް ނުކުންނަ ފުރަތަމަ ފަހަރެވެ. ކޮލިފައިންގައި ރާއްޖެ ވާދަކުރަން ޖެހޭނީ ގަތަރު، ސައުދީ އަރަބިއްޔާ، ކުވައިތު އަދި ބަހްރޭނެވެ. މި ޒޯނުގެ ކޮލިފައިން މެޗުތައް ގަތަރުގެ ވެރިރަށް ދޯހާގައި ކުޅޭއިރު، މެޗުތައް ތާވަލުކޮށްފައިވަނީ މި މަހުގެ 23 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށެވެ.

ކޮލިފައިން މެޗުތައް ކުޅުމަށް އަންގާރަ ދުވަހުގެ ހެނދުނު ގައުމީ ކްރިކެޓް ޓީމު ފުރިއިރު، ކޮލިފައިންއާ ދިމާކޮށް ކްރިކެޓް ބޯޑް އޮފް މޯލްޑިވްސް (ސީބީއެމް) އިން ވަނީ ގައުމީ ކްރިކެޓް ޓީމުތަކަށް ޚާއްސަ ބޯނަސް ސްކީމެއް އަލުން ތައާރަފުކޮށްފައެވެ.

އެގޮތުން ބައިނަލްއަގުވާމީ ކްރިކެޓް މުބާރާތްތަކުން މޮޅުވާ އަންހެން އަދި ފިރިހެން ޓީމަކަށް ބޯނަހެއްގެ ގޮތުގައި 20،000 ރުފިޔާ ދޭން ނިންމާފައިވާއިރު، 50 ލަނޑު ހަދާ ކުޅުންތެރިއަކަށް 2،500 ރުފިޔާ ދޭން ވަނީ ނިންމާފައެވެ. އަދި ސެންޗަރީއެއް ހަދާ ކުޅުންތެރިއަކަށް 5،000 ރުފިޔާ ދޭއިރު، ތިން ވިކެޓް ނަގާ ކުޅުންތެރިއަކަށް 1،500 ރުފިޔާ ދިނުމަށްވެސް ވަނީ ނިންމާފައެވެ. މީގެ އިތުރުން ފަސް ވިކެޓް ނަގާ ކުޅުންތެރިއަކަށް 2،500 ރުފިޔާގެ ބޯނަހެއް ދިނުމަށްވެސް ވަނީ ނިންމާފައެވެ.

އަންގާރަ ދުވަހުގެ ހެނދުނު ގައުމީ ކްރިކެޓް ޓީމު ގަތަރަށް ފުރިއިރު، ކޮލިފައިންއަށް ފުރުމުގެ ކުރިން ޖާޒީ ދިނުމަށް އާދީއްތަ ދުވަހުގެރޭ ބޭއްވި ރަސްމިއްޔާތަށްފަހު "ރާއްޖެ.އެމްވީ" އަށް ދިން ހާއްސަ އިންޓަވިއުއެއްގައި ގައުމީ ކްރިކެޓް ޓީމުގެ ކޯޗު އަޙްމަދު ނީޝަމް ނާސިރު ބުނީ ވޯލްޑް ކަޕް ކޮލިފިކޭޝަނަށް ތައްޔާރުވާން މީގެ 18 މަސް ދުވަސް ކުރިން މަސައްކަތް ފެށި ކަމަށާއި، އެކަމަކު ކޮވިޑް-19 އާ ގުޅިގެން އެކިކަހަލަ ގޮންޖެހުންތައް ކުރިމަތިވި ކަމަށެވެ. އެކަމަކު ކޮލިފައިންއަށް ޓީމު ނުކުންނައިރު، ޓީމުގެ ރޫހު ރަނގަޅު ކަމަށްވެސް ބުންޏެވެ.

މީގެ އިތުރުން ރާއްޖޭގެ ގައުމީ ޓީމުގެ ކެޕްޓަން މުޙައްމަދު މަހްފޫޒް ބުނީ ފަރިތަކުރުންތައް ދިޔައީ ވަރަށް ރަނގަޅަށް ކަމަށާއި، އެކަމަކު ކޮވިޑުގެ ހާލަތާ ގުޅިގެން ކޮންމެސް ވަރެއްގެ ގޮންޖެހުންތަކެއް ދިމާވި ކަމަށެވެ. ނަމަވެސް ކޮލިފައިންގައި ރަނގަޅު ނަތީޖާއެއް ނެރެވޭނެ ކަމުގެ އުއްމީދު އެބައޮތް ކަމަށްވެސް ބުންޏެވެ.

މި ފަހަރުގެ ކޮލިފައިންގައި ރާއްޖޭން ކުޅޭ ފުރަތަމަ މެޗުގައި މި މަހުގެ 23 ވަނަ ދުވަހު ނުކުންނާނީ ސައުދީ އަރަބިއްޔާއާ ދެކޮޅަށެވެ. އަދި ދެވަނަ މެޗުގައި މި މަހުގެ 24 ވަނަ ދުވަހު ގަތަރާ ދެކޮޅަށް ނުކުންނައިރު، ތިންވަނަ މެޗުގައި މި މަހުގެ 27 ވަނަ ދުވަހު ނުކުންނާނީ ބަހްރޭނާ ދެކޮޅަށެވެ. އަދި ކޮލިފައިންގެ ފަހު މެޗުގައި މި މަހުގެ 28 ވަނަ ދުވަހު ރާއްޖެ ނުކުންނާނީ ކުވައިތާ ދެކޮޅަށެވެ.