2015 ވަނަ އަހަރު ސިފައިންނާ ޙަވާލުކުރި ސީ އެމްބިއުލާންސްތައް ބޭނުން ނުކުރެވޭ ޙާލަތުގައި
ސީ އެމްބިއުލާންސްގެ ޚިދުމަތަކީ ދިވެހި ރައްޔިތުންނަށް ސަރުކާރުން ފޯރުކޮށްދޭ އަސާސީ ޚިދުމަތެއް
ސިފައިންނާ ޙަވާލުކޮށްފައިވާ ސީއެމްބިއުލާންސްއެއް- ގިނަ އުޅަނދުތައް މިހާރުވެސް ހުރީ ބޭނުން ނުކުރެވޭ ޙާލަތުގައި
2015 ވަނަ އަހަރު ސިފައިންނާ ޙަވާލުކުރި ސީ އެމްބިއުލާންސްތަކަކީ ކުރީގައި ހޮސްޕިޓަލުތަކުގައި ބޭނުންކުރަމުން އައި ލޯންޗުފަހަރުކަމަށާއި، އެ އުޅަނދުތައް ބޭނުން ނުކުރެވޭ މިންވަރަށް ބާވެ މަރާމާތު ކުރަން ޖެހިފައިވާކަމަށް ޑިފެންސް މިނިސްޓަރ މާރިޔާ އަޙުމަދު ދީދީ ވިދާޅުވެއްޖެއެވެ.
މިނިސްޓަރ އެހެން ވިދާޅުވީ، އއ. އަތޮޅު ހޮސްޕިޓަލަށް ވަސީލަތްތައް ފުރިހަމަ، އައު ސީ އެމްބިއުލާންސްއެއް ލިބޭނީ ކޮން ތާރީޚެއްގައިތޯ ތޮއްޑޫ ދާއިރާގެ މެމްބަރު ޙަސަން ޝިޔާން ކުރެއްވި ސުވާލަށް ލިއުމުން ދެއްވި ޖަވާބުގައެވެ.
މެމްބަރު ކުރެއްވި ސުވާލުގައި ވަނީ އއ. އަތޮޅު ހޮސްޕިޓަލުގައި ސީ އެމްބިއުލާންސްގެ ނަމުގައި ބޭނުންކުރާ އާދައިގެ ކުޑަ ލޯންޗު މިހާރު ބޭނުން ނުކުރެވޭ ވަރަށް ބާވެ ފަޅައިގެންގޮސް ޙަލާކުވެފައިވާކަން ފާހަގަކުރައްވާފައެވެ. އަދި އިންޖީނުތައް ވެސް މައްސަލަ ޖެހިފައިވާކަމަށް ވިދާޅުވެ މެމްބަރު ވަނީ އއ. އަތޮޅު ހޮސްޕިޓަލަށް ވަސީލަތްތައް ފުރިހަމަ، އައު ސީ އެމްބިއުލާންސްއެއް ލިބޭނީ ކޮން ތާރީޚެއްގައިތޯ ސުވާލު ކުރައްވާފައެވެ.
އެކަމާ ގުޅޭގޮތުން ލިއުމުން ދެއްވި ޖަވާބުގައި މިނިސްޓަރ ވިދާޅުވީ، ސީ އެމްބިއުލާންސްގެ ޚިދުމަތަކީ ދިވެހި ރައްޔިތުންނަށް ސަރުކާރުން ފޯރުކޮށްދޭ އަސާސީ ޚިދުމަތެއް ކަމަށެވެ. އަދި އެ ޚިދުމަތް ފޯރުކޮށްދެވެން އޮތް އެންމެ ރަނގަޅަށް ފޯރުކޮށްދެވޭތޯ އެމްއެންޑީއެފުން އަބަދުވެސް މަސައްކަތް ކުރާކަން މިނިސްޓަރ ފާހަގަކުރެއްވިއެވެ.
މިނިސްޓަރުގެ ޖަވާބުގައި އިތުރަށް ވިދާޅުވީ، މި ޚިދުމަތް މިހާރުވެސް ފޯރުކޮށްދެމުން ގެންދަނީ ގިނަ ގޮންޖެހުންތަކާއެކު ކަމަށެވެ. އެގޮތުން ސީއެމްބިއުލާންސްގެ ޚިދުމަތް ފެށުމަށްޓަކައި 2015 ވަނަ އަހަރު އެމްއެންޑީއެފާ ޙަވާލުކުރި އުޅަނދުތަކަކީ ގިނަ ދުވަސްތަކެއްވެ ޙާލަތު ދަށްވެފައިވާ އުޅަނދުތަކެއް ކަމަށް މިނިސްޓަރ ވިދާޅުވިއެވެ. އެގޮތުން އޭރު ޙަވާލު ކުރެވުނު 27 އުޅަނދަކީ ވެސް ކުރީގައި ހޮސްޕިޓަލުތަކުގައި ބޭނުންކުރަމުން އައި ލޯންޗުފަހަރުކަން މިނިސްޓަރ ފާހަގަކުރެއްވިއެވެ. އަދި އެއީ ބޭނުންކުރާތާ 10 އަހަރަށްވުރެ ގިނަ ދުވަސްވެފައިވާ އުޅަނދުތަކެއްކަން ވެސް މިނިސްޓަރ ފާހަގަކުރެއްވިއެވެ.
އަދި މުޅި ސީއެމްބިއުލާންސް ފްލީޓަށް ބަލާއިރު މިހާރުވެސް ގްރައުންޑް ކުރެވިފަައިވާ މިންވަރު އިތުރުވުމާއި، ޙާލަތު ދަށްވުމުގެ ސަބަބުން ކައިރި މުސްތަޤުބަލެއްގައި ދޫކޮށްލަންޖެހޭކަމަށް ލަފާކުރެވޭ އުޅަނދުތައް ހުރި ނަމަވެސް ބަޖެޓުގެ ދަތިކަމުގެ ސަބަބުން އެތަކެތި ދޫކޮށްލެވެން ނެތްކަމަށް މިނިސްޓަރ ވިދާޅުވިއެވެ. އެގޮތުން 2021 ގައި ފްލީޓަށް އިތުރުކުރި 6 އުޅަނދު ފިޔަވައި ހުރިހާ އުޅަނދެއް ވެސް ވަރަށް އަވަހަށް މަރާމާތު ކުރަން ޖެހިފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، އއ. ރަސްދޫގައި ބޭނުންކުރާ ސީއެމްބިއުލާންސްއަކީ ވެސް އޭގެ ތެރެއިން އުޅަނދެއް ކަމަށެވެ. އެ ސީއެމްބިއުލާންސް 7 ސެޕްޓެމްބަރު 2021 ގައި ބަލި މީހަކު ގޮވައިގެން އއ. ރަސްދޫއިން މާލެ އައުމަށްފަހު އެނބުރި ދިޔަ ދަތުރުގައި ހަލާކުވެ މިހާރު އޮތީ މަރާމާތުގައެވެ. އަދި އެ އުޅަނދުގައި އިތުރަށް ކުރަން ޖެހިފައިވާ މަރާމާތުތަކުގެ ތަފްސީލު ވެސް މިނިސްޓަރ ވަނީ އަރުވާފައެވެ. އެ މަރާމާތުތަކަށްފަހު 25 އޮކްޓޯބަރު 2021 ގައި ސީއެމްބިއުލާންސް އޮޕަރޭޝަނަށް ގެނެވޭނެކަމަށް ވެސް މިނިސްޓަރ ވިދާޅުވިއެވެ.
އެކަމަށްޓަކައި 65000 ރުފިޔާ ޚަރަދުވާނެކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ އިތުރަށް ވިދާޅުވީ، ސީއެމްބިއުލާންސްތައް މަރާމާތު ކުރުމަށާއި، ބައުވެ ޙާލަތު ދަށްވެފައިވާ އުޅަނދުތައް ބަދަލުކުރުމަށް އެކަށޭނަ މިންވަރަށް ބަޖެޓު ނެތް ކަމަށެވެ. މިހާރުވެސް އޭރު ޙަވާލުކުރި 27 އެމްބިއުލާންސްގެ ތެރެއިން 10 އުޅަނދު ވަނީ ބޭނުން ނުކުރެވޭ އަދި މަރާމާތު ވެސް ނުކުރެވޭ މިންވަރަށް ހަލާކުވުމުން ޚިދުމަތުން ބާކީކޮށްފައެވެ.
