ކޮވިޑްގައި އިތުރު މަރެއް، ޖުމްލަ 239ށް
18 އޮކްޓޯބަރު 2021 | ހޯމަ 15:56ނިޔާވީ އުމުރުން 87 އަހަރުގެ ދިވެހި ފިރިހެނެއް
އައްޑޫސިޓީ
ކޮވިޑް-19 ބަލީގައި އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ އައްޑޫ ކޮވިޑް ފެސިލިޓީގައި އެޑްމިޓުކޮށްގެން ފަރުވާދެމުންދިޔަ އުމުރުން 87 އަހަރުގެ ދިވެހި ފިރިހެނަކު ނިޔާވެފައިވާ ކަމަށެވެ. އޭނާ ނިޔާވީ ހޯމަ ދުވަހުގެ އިރުއޮއްސި 18:35ގައި ކަމަށް އެޗްޕީއޭއިން ބުނެފައިވެއެވެ. މިއީ ކޮވިޑް ބަލީގައި ރާއްޖެއިން ނިޔާވި 239 ވަނަ މީހާއެވެ.
އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތައް ދައްކާ ގޮތުން, ހޮނިހިރު ދުވަހުގެ ހަވީރު 6:00ން ފެށިގެން އާދީއްތަ ދުވަހުގެ ހަވީރު 6:00އާ ހަމައަށް ރާއްޖެއިން 3،210 މީހުން ކޮވިޑަށް ޓެސްޓުކޮށްފައިވެއެވެ. އަދި އޭގެ ތެރެއިން 77 މީހުން ޕޮޒިޓިވްވެފައިވާއިރު، އެއީ މާލެ ސަރަހައްދުން ޕޮޒިޓިވްވި 25 މީހުންނާއި އަތޮޅު ތެރެއިން ޕޮޒިޓިވްވި 37 މީހުންގެ އިތުރުން ރިސޯޓުތަކުން ޕޮޒިޓިވްވި 9 މީހުންނާއި ސަފާރީން ޕޮޒިޓިވްވި 6 މީހުންނެވެ.
އިތުރު 77 މީހުން ކޮވިޑަށް ޕޮޒިޓިވްވުމާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު ވަނީ 86،165ށް އަރާފައެވެ. އަދި އެކްޓިވް ކޭސްތަކުގެ ގޮތުގައި 1،287 ކޭސް ރިޕޯޓް ކޮށްފައިވާއިރު، އޭގެ ތެރެއިން 12 މީހަކަށް ހޮސްޕިޓަލުގައި އެޑްމިޓްކޮށްގެން އަންނަނީ ފަރުވާ ދެމުންނެވެ.
